L-1 Ħadd tal-Avvent - Sena Ċ
AQRA L-KELMA - Il-liturġija tal-Kelma
L-EWWEL QARI
Qari mill-Ktieb tal-Profeta Ġeremija (33:14-16)
Ara, għad jiġu jiem – oraklu tal-Mulej – meta nġib fuq dar Israel u dar Ġuda l-ġid li wegħedthom.
F’dawk il-jiem u f’dak iż-żmien intalla’ min-nisel ta’ David rimja tas-sewwa, bniedem li jagħmel il-ġustizzja u s-sewwa fil-pajjiż.
F’dawk il-jiem Ġuda jinħeles u Ġerusalemm tgħammar b’moħħha mistrieħ, u għalhekk isejħulha: Il-Mulej is-sewwa tagħna.
Il-Kelma tal-Mulej. Irroddu ħajr lil Alla.
SALM RESPONSORJALI (Salm 24)
Rit: Lejk jien nerfa’ ruħi, Mulej!
Triqatek, Mulej, għarrafni,
il-mogħdijiet tiegħek għallimni.
Mexxini fis-sewwa tiegħek u għallimni,
għax int Alla tas-salvazzjoni tiegħi. Rit...
Tajjeb u sewwa l-Mulej;
għalhekk juri triqtu lill-ħatja.
Imexxi l-imsejkna fis-sewwa,
jgħallem lill-fqajrin it-triq tiegħu. Rit...
Il-mogħdijiet tal-Mulej kollhom tjieba u fedeltà
għal min iħares il-patt u l-liġijiet tiegħu.
Midħla l-Mulej ta’ dawk li jibżgħu minnu,
lilhom jgħarraf il-patt tiegħu. Rit...
IT-TIENI QARI
Qari mill-Ewwel Ittra ta’ San Pawl Appostlu lit-Tessalonikin (3:12-4:2)
Ħuti, jalla l-Mulej ikattrilkom u jfawwarkom bl-imħabba għal xulxin u lejn kulħadd, l-istess bħalma aħna nħobbu lilkom, ħalli jqawwilkom qalbkom u jkollkom qdusija bla għajb quddiem Alla, Missierna, għal meta jiġi Sidna Ġesù mdawwar bil-qaddisin tiegħu.
Fl-aħħar, ħuti, intom tgħallimtu mingħandna kif għandkom timxu biex togħġbu lil Alla, kif tabilħaqq qegħdin iġġibu ruħkom; aħna f’Sidna Ġesù nitolbukom u nħeġġukom biex tagħmlu xi ħaġa iżjed. Tafu x’tagħlim tajniekom permezz ta’ Sidna Ġesù.
Il-Kelma tal-Mulej. Irroddu ħajr lil Alla.
AKKLAMAZZJONI QABEL L-EVANĠELJU (Salm 84:8)
Hallelujah. Hallelujah.
Uri lilna, Mulej, it-tjieba tiegħek, u s-salvazzjoni tiegħek agħtina.
Hallelujah!
L-EVANĠELJU
Qari mill-Evanġelju skont San Luqa (21:25-28.34-36)
F’dak iż-żmien, Ġesù qal lid-dixxipli tiegħu: «Ikun hemm sinjali fix-xemx u l-qamar u l-kwiekeb. Il-ġnus fuq l-art, b’qalbhom ittaqtaq, ma jafux x’jaqbdu jagħmlu minħabba l-ħsejjes tal-baħar u tal-imwieġ; in-nies ruħhom ħierġa bil-biża’ billi jobsru x’ikun ġej fuq id-dinja, għax il-qawwiet tas-smewwiet jitqallbu.
Imbagħad jaraw lil Bin il-bniedem ġej fi sħaba, b’qawwa u glorja kbira.
Meta jibda jseħħ dan kollu, qawwu qalbkom u erfgħu raskom, għax il-fidwa tagħkom hi fil-qrib. Oqogħdu attenti, u qisu li l-ikel u x-xorb żejjed u s-sokor ma jmewtulkomx qalbkom, u tħallux li l-ħafna tħassib għall-ħtiġiet tal-ħajja jeħdilkom raskom, li ma ssibuhx dak il-Jum fuqkom għal għarrieda. Għax hu Jum li għad jaqa’ bħal nassa fuq kull min jgħammar fuq wiċċ l-art kollha. Ishru, mela, u itolbu l-ħin kollu, biex tkunu tifilħu tgħaddu minn kulma għandu jiġri u tieqfu quddiem Bin il-bniedem.»
Il-Kelma tal-Mulej. Tifħir lilek Kristu.
IFHEM IL-KELMA - Kummenti dwar il-qari
- AUDIO -
- VIDEO GĦAT-TFAL -
Catholic Kids Media / Djoċesi ta' Għawdex
- AUDIO -
GĦIX IL-KELMA - Il-Kalendarju Liturġiku tal-ġimgħa
L-ewwel ġimgħa tas-Salterju
■ It-Tnejn 29 ta’ Novembru: Ferja tal-Avvent. Qari: Isaija 2:1-5; Salm 121:1-9; Mattew 8:5-11.
■ It-Tlieta 30 ta’ Novembru: Sant’Andrija, Appostlu (F). Qari: Rumani 10:9-18; Salm 18:2-5; Mattew 4:18-22.
■ L-Erbgħa 1 ta’ Diċembru: Ferja tal-Avvent. Qari: Isaija 25:6-10; Salm 22:1-6; Mattew 15:29-37.
■ Il-Ħamis 2 ta’ Diċembru: Ferja tal-Avvent. Qari: Isaija 26:1-6; Salm 117:1.8-9.19-21.25-27; Mattew 7: 21.24-27.
■ Il-Ġimgħa 3 ta’ Diċembru: San Franġisk Saverju, Presbiteru (TO). Qari: Isaija 29:17-24; Salm 26: 1.4.13-14; Mattew 9:27-31.
■ Is-Sibt 4 ta’ Diċembru: Ferja tal-Avvent / San Ġwann Damaxxenu, Presbiteru u Duttur tal-Knisja (T). Qari: Isaija 30:19-21.23-26; Salm 146:1-6; Mattew 9:35-10:1.6-8.
F = Festa; TO = Tifkira Obbligatorja; T = Tifkira.
Il-kulur tad-data jindika l-kulur liturġiku tal-ġurnata.