It-3 Ħadd tal-Avvent - Sena Ċ
AQRA L-KELMA - Il-liturġija tal-Kelma
L-EWWEL QARI
Qari mill-Ktieb tal-Profeta Sofonija (3:14-18a)
Għajjat bil-ferħ ta’ qalbek, bint Sijon, Israel, samma’ leħnek! Infexx fl-hena u ifraħ b’qalbek kollha, bint Ġerusalemm! Neħħa l-Mulej minn fuqek is-sentenza li kellek kontrik, keċċa l-għedewwa tiegħek. Is-sultan ta’ Israel, il-Mulej, hu f’nofsok; ma jkollokx iżjed ħsara minn xiex tibża’. Dakinhar jgħidu lil Ġerusalemm: «Tibżax, Sijon, tħallix idejk jintelqu! Il-Mulej, Alla tiegħek, qiegħed f’nofsok, gwerrier li jsalva; minħabba fik jithenna b’hena kbir, fi mħabbtu jġeddek, jinfexx minħabba fik f’għajjat ta’ ferħ, bħalkieku f’jum ta’ festa.»
Il-Kelma tal-Mulej. Irroddu ħajr lil Alla.
SALM RESPONSORJALI (Is 12:2-3.4bċd.5-6)
Rit: Kbir hu f’nofsok il-Qaddis ta’ Israel!
Alla s-salvazzjoni tiegħi,
jiena nittama u ma jkollix mniex nibża’.
Għax qawwieti u għanjieti hu l-Mulej,
għalija sar is-salvazzjoni.
Kollkom ferħana
jimlew l-ilma mill-għejjun tas-salvazzjoni. Rit…
Roddu ħajr lill-Mulej, sejħu ismu,
għarrfu lill-ġnus bl-għemejjel tiegħu,
xandru li ismu huwa fl-għoli. Rit…
Għannu lill-Mulej għax għamel ħwejjeġ kbar;
ħa jkun dan magħruf mal-art kollha.
Aqbeż bil-ferħ, għanni,
int li tgħammar f’Sijon,
għax kbir hu f’nofsok il-Qaddis ta’ Israel. Rit…
IT-TIENI QARI
Qari mill-Ittra ta’ San Pawl Appostlu lill-Filippin (4:4-7)
Ħuti, ifirħu dejjem fil-Mulej; nerġa’ ngħidilkom, ifirħu. Il-ħlewwa tagħkom, ħa jkunu jafuha l-bnedmin kollha. Il-Mulej qorob!
Tħabbtu raskom b’xejn. Fit-talb kollu tagħkom itolbu u uru lil Alla xi jkollkom bżonn, u iżżuh ħajr.
U s-sliem ta’ Alla, sliem li jgħaddi kulma l-moħħ jista’ jifhem, iżommilkom qalbkom u moħħkom sħaħ fi Kristu Ġesù.
Il-Kelma tal-Mulej. Irroddu ħajr lil Alla.
AKKLAMAZZJONI QABEL L-EVANĠELJU (Is 61:1)
Hallelujah. Hallelujah.
L-ispirtu ta’ Sidi l-Mulej fuqi, għax il-Mulej ikkonsagrani, biex inwassal il-bxara t-tajba lill-fqajrin.
Hallelujah!
L-EVANĠELJU
Qari mill-Evanġelju skont San Luqa (21:25-28.34-36)
F’dak iż-żmien, in-nies kienu jistaqsu lil Ġwanni u jgħidulu: «Mela x’għandna nagħmlu?» U huwa kien iweġibhom: «Min għandu żewġ ilbiesi, jaqsam ma’ min ma għandu xejn, u min għandu x’jiekol jagħmel l-istess.»
Resqu wkoll xi pubblikani biex jitgħammdu u qalulu: «Mgħallem, x’għandna nagħmlu aħna?» U huwa weġibhom: «Tissikkaw lil ħadd biex jagħtikom taxxi iżjed milli jmisskom tieħdu.» Staqsewh ukoll xi suldati u qalulu: «U aħna, x’għandna nagħmlu?» U huwa weġibhom: «Tisirqu lil ħadd bit-tehdid jew bil-qerq tagħkom, u kkuntentaw ruħkom bil-paga li għandkom.»
Il-poplu kien qiegħed jistenna ħerqan, u kulħadd kien jistaqsi lilu nnifsu dwar Ġwanni, jekk kienx hu l-Messija. Għalhekk Ġwanni qabad u qal lil kulħadd: «Jien, ngħid għalija, ngħammidkom bl-ilma, imma ġej wieħed aqwa minni, li ma jistħoqqlix inħollu l-qfieli tal-qorq tiegħu. Hu jgħammidkom bl-Ispirtu s-Santu u n-nar. Il-midra qiegħda f’idu, biex iderri l-qiegħa u jiġbor il-qamħ fil-maħżen tiegħu, imma t-tiben jaħarqu b’nar li ma jintefiex.» U b’ħafna twissijiet oħra kien ixandar lill-poplu l-bxara t-tajba.
Il-Kelma tal-Mulej. Tifħir lilek Kristu.
IFHEM IL-KELMA - Kummenti dwar il-qari
- AUDIO -
- VIDEO GĦAT-TFAL -
Catholic Kids Media / Djoċesi ta' Għawdex
- AUDIO -
GĦIX IL-KELMA - Il-Kalendarju Liturġiku tal-ġimgħa
It-tielet ġimgħa tas-salterju
■ It-Tnejn 13 ta’ Diċembru: Santa Luċija, Verġni u Martri (TO). Qari: Numri 24:2-7.15-17; Salm 24:4-9; Mattew 21:23-27.
■ It-Tlieta 14 ta’ Diċembru: San Ġwann tas-Salib, Presbiteru u Duttur tal-Knisja (TO). Qari: Sofonija 3:1-2.9-13; Salm 33:2-3.6-7.17-19.23; Mattew 21:28-32.
■ L-Erbgħa 15 ta’ Diċembru: Ferja tal-Avvent. Qari: Isaija 45:6-8.18.21-25; Salm 84:9-14; Luqa 7:19-23.
■ Il-Ħamis 16 ta’ Diċembru: Ferja tal-Avvent. Qari: Isaija 54:1-10; Salm 29:2.4-6.11-13; Luqa 7:24-30.
■ Il-Ġimgħa 17 ta’ Diċembru: Ferja privileġġjata. Qari: Ġenesi 49:2.8-10; Salm 71:1-4.7-8.17 Hallelujah “O Għerf tal-Għoli”; Mattew 1:1-17.
■ Is-Sibt 18 ta’ Diċembru: Ferja privileġġjata. Qari: Ġeremija 23:5-8; Salm 71:1-2.12-13.18-19; Hallelujah “O Mexxej”; Mattew 1:18-24.
TO = Tifkira Obbligatorja.
Il-kulur tad-data jindika l-kulur liturġiku tal-ġurnata.