It-2 Ħadd tal-Avvent - Sena Ċ
AQRA L-KELMA - Il-liturġija tal-Kelma
L-EWWEL QARI
Qari mill-Ktieb tal-Profeta Baruk (5:1-9)
Neħħi minn fuqek, Ġerusalemm, ilbies il-vistu u n-niket tiegħek, u ilbes għal dejjem id-dija tal-glorja ta’ Alla. Ilbes mantar il-ġustizzja ta’ Alla, qiegħed fuq rasek id-dijadema tal-glorja ta’ Alla ta’ dejjem. Għax Alla għad juri sbuħitek lid-dinja taħt ix-xemx, Alla jsemmik għal dejjem: «Sliem tal-Ġustizzja» u «Glorja tal-Qima ta’ Alla.»
Qum, Ġerusalemm, itla’ fl-għoli, u ħares madwarek lejn il-Lvant, ara ’l uliedek miġmugħa, minn fejn tinżel ix-xemx sa fejn titla’, għall-kelma tal-Qaddis, ferħana li Alla ftakar fihom. Telqu mingħandek bil-mixi, imkarkra mill-għedewwa, u issa Alla sa jġibhomlok, merfugħin fil-ġieħ bħalkieku fuq tronijiet is-slaten. Għax Alla ordna; jitniżżlu l-muntanji għolja, u l-għoljiet ta’ dejjem, jimtlew il-widien u titwitta l-art, biex hemm Israel jimxi ’l quddiem, bla tfixkil ta’ xejn, taħt il-ħarsien ta’ Alla.
U l-foresti u s-siġar tal-fwieħa, jixħtu dellhom għal fuq Israel, bl-ordni ta’ Alla. Għax Alla jmexxi lil Israel ferħan, b’dawl il-glorja tiegħu, imsieħba mill-ħniena u l-ġustizzja ħierġa minnu.
Il-Kelma tal-Mulej. Irroddu ħajr lil Alla.
SALM RESPONSORJALI (Salm 125)
Rit: Kbir f’għemilu l-Mulej magħna!
Meta l-Mulej reġġa’ lura l-imjassra ta’ Sijon,
konna qisna mitlufa f’ħolma;
imbagħad bid-daħk imtela fommna,
u bl-għajjat ta’ ferħ ilsienna. Rit…
Imbagħad bdew jgħidu fost il-ġnus:
«Kbir f’għemilu l-Mulej magħhom!»
Kbir f’għemilu l-Mulej magħna!
U aħna bil-ferħ imtlejna. Rit…
Biddel, Mulej, xortina
bħall-widien tan-Negeb!
Dawk li jiżirgħu fid-dmugħ
jaħsdu bl-għana ta’ ferħ. Rit…
Huma u sejrin, imorru jibku,
iġorru ż-żerriegħa għaż-żrigħ.
Iżda huma u ġejjin lura,
jiġu b’għana ta’ ferħ, iġorru l-qatet f’idejhom. Rit…
IT-TIENI QARI
Qari mill-Ittra ta’ San Pawl Appostlu lill-Filippin (1:4-6.8-11)
Ħuti, nitlob dejjem ferħan fit-talb tiegħi għalikom, minħabba s-sehem li intom ħadtu fix-xandir tal-Evanġelju, mill-ewwel jiem sal-lum. Jiena żgur minn dan: li dak li beda din l-opra tajba fikom, iwassalha għat-tmiem tagħha sa ma jasal il-jum ta’ Kristu Ġesù. Iva, jixhidli Alla kemm jien miġbud lejkom bil-qalb ta’ Kristu Ġesù!
U jien dan nitlob: li l-imħabba tagħkom tikber u toktor dejjem iżjed bl-għerf u b’kull dehen, biex tistgħu tagħrfu tagħżlu l-aħjar, u mbagħad tkunu safja u bla ebda ħtija fil-jum ta’ Kristu, mimlijin bil-frott tal-ġustizzja li ġejja permezz ta’ Ġesù Kristu, għall-glorja u l-foħrija ta’ Alla.
Il-Kelma tal-Mulej. Irroddu ħajr lil Alla.
AKKLAMAZZJONI QABEL L-EVANĠELJU (Lq 3:4.6)
Hallelujah. Hallelujah.
Ħejju t-triq tal-Mulej, iddrittaw il-mogħdijiet tiegħu: u l-bnedmin kollha jaraw is-salvazzjoni ta’ Alla.
Hallelujah!
L-EVANĠELJU
Qari mill-Evanġelju skont San Luqa (3:1-6)
Fis-sena ħmistax tal-ħakma ta’ Tiberju Ċesari, meta Ponzju Pilatu kien gvernatur tal-Lhudija, Erodi tetrarka tal-Galilija, ħuh Filippu tetrarka tal-artijiet tal-Iturija u t-Trakonija, u Lisanja tetrarka ta’ Abileni, fiż-żmien meta l-uffiċċju ta’ qassis il-kbir kien f’idejn Anna u Kajfa, il-kelma tal-Mulej ġiet fuq Ġwanni bin Żakkarija, fid-deżert.
U ġie fl-inħawi kollha ta’ madwar il-Ġordan, ixandar magħmudija ta’ ndiema għall-maħfra tad-dnubiet, kif hemm imniżżel fil-ktieb tal-profeziji ta’ Isaija: «Leħen ta’ wieħed jgħajjat fid-deżert: Ħejju t-triq tal-Mulej, iddrittaw il-mogħdijiet tiegħu. Kull wied jimtela, kull muntanja u għolja titbaxxa, il-mogħdijiet mgħawġa jiddrittaw, u t-triqat imħarbta jitwittew. U l-bnedmin kollha jaraw is-salvazzjoni ta’ Alla!»
Il-Kelma tal-Mulej. Tifħir lilek Kristu.
IFHEM IL-KELMA - Kummenti dwar il-qari
- AUDIO -
- VIDEO GĦAT-TFAL -
Catholic Kids Media / Djoċesi ta' Għawdex
- AUDIO -
GĦIX IL-KELMA - Il-Kalendarju Liturġiku tal-ġimgħa
It-tieni ġimgħa tas-salterju
■ It-Tnejn 6 ta’ Diċembru: Ferja tal-Avvent / San Nikola, Isqof (T). Qari: Isaija 35:1-10; Salm 84:9-14; Lq 5:17-26.
■ It-Tlieta 7 ta’ Diċembru: Sant’Ambroġ, Isqof u Duttur tal-Knisja (TO). Qari: Isaija 40:1-11; Salm 95:1-3.10-13: Mattew 18:12-14.
■ L-Erbgħa 8 ta’ Diċembru: It-Tnissil bla tebgħa tal-Verġni Mqaddsa Marija (S). Qari: Ġenesi 3:9-15.20; Salm 98:1-4; Efes 1:3-6.11-12; Luqa 1:26-38.
■ Il-Ħamis 9 ta’ Diċembru: Ferja tal-Avvent / San Ġwann Diegu Cuauhtlatoatzin, Presbiteru (T). Qari: Isaija 41:13-20; Salm 144:1. 9-13; Mattew 11:11-15.
■ Il-Ġimgħa 10 ta’ Diċembru: Ferja tal-Avvent / L-Imqaddsa Verġni Marija ta’ Loreto (T). Qari: Isaija 48:17-19; Salm 1:1-4. 6; Mattew 11:16-19.
■ Is-Sibt 11 ta’ Diċembru: Ferja tal-Avvent / San Damasu I, Papa (T). Qari: Sirak 48:1-4. 9-11; Salm 79: 2-3.15-16.18-19; Mattew 17:10-13.
S = Solennità; TO = Tifkira Obbligatorja; T = Tifkira.
Il-kulur tad-data jindika l-kulur liturġiku tal-ġurnata.