Ir-4 Ħadd tal-Għid - Sena Ċ
AQRA L-KELMA - Il-liturġija tal-Kelma
L-EWWEL QARI
Qari mill-Ktieb tal-Atti tal-Appostli (13:14.43-52)
F’dak iż-żmien, Pawlu u Barnaba minn Perge baqgħu sejrin sa ma waslu f’Antjokja ta’ Pisidja. F’jum is-Sibt daħlu fis-sinagoga u qagħdu bilqiegħda. U meta xterdet il-ġemgħa tas-sinagoga, ħafna, kemm mil-Lhud u kemm mill-prosèliti twajba, marru ma’ Pawlu u ma’ Barnaba, u dawn ħeġġewhom biex jibqgħu fil-grazzja ta’ Alla.
Is-Sibt ta’ wara, tista’ tgħid il-belt kollha nġabret biex tisma’ l-kelma tal-Mulej. Il-Lhud, meta raw il-folol, imtlew bl-għejra u bdew imieru lil Pawlu u jidgħulu. Imma Pawlu u Barnaba bil-kuraġġ kollu qalu: «Hekk kien meħtieġ, li l-kelma ta’ Alla titħabbar lilkom l-ewwel. Billi intom qegħdin twarrbuha, u jidhrilkom li ma tistħoqqilkomx il-ħajja ta’ dejjem, aħna sa nduru fuq il-pagani. Għax hekk ordnalna l-Mulej: “Jien għamiltek dawl tal-ġnus, biex twassal is-salvazzjoni sa truf l-art.”»
Il-pagani, meta semgħu dan, bdew jifirħu u jigglorifikaw il-kelma tal-Mulej, u dawk kollha li kienu magħżula għall-ħajja ta’ dejjem emmnu. Hekk il-kelma tal-Mulej baqgħet tixtered mal-art kollha. Imma l-Lhud xewxu n-nisa twajba u magħrufa u wkoll il-kbarat tal-belt, u qajmu persekuzzjoni kontra Pawlu u Barnaba u keċċewhom ’il barra minn arthom. Huma farfru għal fuqhom it-trab minn ma’ riġlejhom u marru Ikonju. Iżda d-dixxipli mtlew bil-ferħ u bl-Ispirtu s-Santu.
Il-Kelma tal-Mulej. Irroddu ħajr lil Alla.
SALM RESPONSORJALI (Salm 99)
Rit: Aħna l-poplu tiegħu u n-nagħaġ tal-mergħa tiegħu.
jew Hallelujah, hallelujah, hallelujah!
Għajtu bil-ferħ lill-Mulej fl-art kollha,
aqdu bil-ferħ lill-Mulej,
idħlu quddiemu b’għana ferrieħi. Rit…
Kunu afu li Jaħweh hu Alla:
hu ħalaqna, u aħna tiegħu,
aħna l-poplu tiegħu
u n-nagħaġ tal-mergħa tiegħu. Rit…
Għax twajjeb il-Mulej,
għal dejjem it-tjieba tiegħu;
minn żmien għal żmien
il-fedeltà tiegħu. Rit…
IT-TIENI QARI
Qari mill-Ktieb tal-Apokalissi ta’ San Ġwann Appostlu (7:9.14b-17)
Jiena, Ġwanni, ħarist, u ara, kien hemm kotra kbira li ħadd ma jista’ jgħoddha, minn kull ġens u tribù, minn kull poplu u lsien, weqfin quddiem it-tron u quddiem il-Ħaruf, lebsin ilbiesi twal bojod, u bil-friegħi tal-palm f’idejhom.
U wieħed mix-Xjuħ qalli: «Dawn huma dawk li ġejjin mit-taħbit il-kbir, u l-ilbiesi tagħhom ħasluhom u bajduhom fid-demm tal-Ħaruf. Għalhekk jinsabu quddiem it-tron ta’ Alla, lejl u nhar jaqduh fit-tempju tiegħu; u dak li qiegħed fuq it-tron jeħodhom jgħammru taħt il-kenn tiegħu.
Ma jbatux aktar ġuħ, anqas għatx ma jagħmel bihom aktar; ix-xemx ma taħkimhomx, u anqas ebda għomma, ladarba l-Ħaruf, li hemm f’nofs it-tron, ikun ir-ragħaj tagħhom; u hu jwassalhom ħdejn ilmijiet tal-għejjun tal-ħajja. U Alla jixxuttalhom kull demgħa minn għajnejhom.»
Il-Kelma tal-Mulej. Irroddu ħajr lil Alla.
AKKLAMAZZJONI QABEL L-EVANĠELJU
Hallelujah. Hallelujah. (Ġw 10:14)
Jiena r-ragħaj it-tajjeb, jgħid il-Mulej; jiena nagħraf in-nagħaġ tiegħi, u n-nagħaġ tiegħi jagħrfu lili.
Hallelujah.
L-EVANĠELJU
Qari mill-Evanġelju skont San Ġwann (20:19-31)
F’dak iż-żmien, Ġesù qal: «In-nagħaġ tiegħi jisimgħu leħni, u jiena nagħrafhom, u huma jimxu warajja.
U jiena nagħtihom il-ħajja ta’ dejjem; u huma ma jintilfu qatt, u minn idejja ma jaħtafhomli ħadd.
Missieri, li tahomli, hu akbar minn kulħadd, u ħadd ma jista’ jaħtafhom minn id il-Missier. Jien u l-Missier aħna ħaġa waħda.»
Il-Kelma tal-Mulej. Tifħir lilek Kristu.
IFHEM IL-KELMA - Kummenti dwar il-qari
- VIDEO -
Fr Elija Vella OFMConv.
- AUDIO -
GĦIX IL-KELMA - Il-Kalendarju Liturġiku tal-ġimgħa
Ir-raba’ ġimgħa tas-salterju
■ It-Tnejn 9 ta’ Mejju: San Ġorġ Preca, Presbiteru u Fundatur tas-Soċjetà tad-Duttrina Nisranija, M.U.S.E.U.M. (F). Qari: Sirak 21:11-17:21 jew 2 Timotju 2:1-11; Salm 119:33-42; Mark 16:14.16-20.
■ It-Tlieta 10 ta’ Mejju: Ferja tal-Għid / San Ġwann ta’ Avila, Presbiteru u Duttur tal-Knisja (T). Qari: Atti 11:19-26; Salm 86:1-7; Ġwanni 10:22-30.
■ L-Erbgħa 11 ta’ Mejju: Ferja tal-Għid. Qari: Atti 12:24-13: 5; Salm 66:2-3.5.6.8; Ġwanni 12:44-50.
■ Il-Ħamis 12 ta’ Mejju: Ferja tal-Għid / San Nerew u San Akille, Martri (T) / San Pankrazju, Martri (T). Qari: Atti 13:13-25; Salm 88:2-3.21-22.25.27; Ġwanni 13:16-20.
■ Il-Ġimgħa 13 ta’ Mejju: Ferja tal-Għid / L-Imqaddsa Verġni Marija ta’ Fatima (T). Qari: Atti 13:26-33; Salm 2:6-11; Ġwanni 14:1-6.
■ Is-Sibt 14 ta’ Mejju: San Mattija, Appostlu (F). Qari: Atti 1:15-17.20-26; Salm 112:1-8; Ġwanni 15:9-17.
F = Festa; T = Tifkira
Il-kulur ħdejn id-data jindika l-kulur liturġiku tal-ġurnata.
