Ir-4 Ħadd tal-Għid - Sena A
AQRA L-KELMA - Il-liturġija tal-Kelma
L-EWWEL QARI
Qari mill-Ktieb tal-Atti tal-Appostli (2:14a.36-41)
Nhar Għid il-Ħamsin, Pietru flimkien mal-Ħdax qam u qal lil-Lhud b’leħen għoli: «Ħa jkun jaf fiż-żgur il-poplu kollu ta’ Israel li lil dan Ġesù, li intom sallabtuh, Alla għamlu Mulej u Messija.»
Dan il-kliem li semgħu laqtilhom qalbhom, u qalu lil Pietru u lill-appostli l-oħra: «L-aħwa, x’għandna nagħmlu aħna?»
U Pietru weġibhom: «Indmu, u jitgħammed kull wieħed minnkom fl-isem ta’ Ġesù Kristu għall-maħfra ta’ dnubietkom; u intom tirċievu d-don tal-Ispirtu s-Santu. Għax il-wegħda qiegħda għalikom u għal uliedkom u għal dawk kollha li huma fil-bogħod, dawk kollha li l-Mulej Alla tagħna sejħilhom.»
U b’ħafna kliem ieħor tahom xhieda u wissiehom billi qalilhom: «Salvaw lilkom infuskom minn dan in-nisel ħażin.» Għalhekk dawk li laqgħu kliemu tgħammdu u dakinhar ingħaqdu mad-dixxipli madwar tlitt elef ruħ.
Il-Kelma tal-Mulej. Irroddu ħajr lil Alla.
SALM RESPONSORJALI (Salm 22)
Rit: Il-Mulej hu r-ragħaj tiegħi: xejn ma jonqosni!
jew Hallelujah, hallelujah, hallelujah!
Il-Mulej hu r-ragħaj tiegħi:
xejn ma jonqosni.
F’mergħat kollha ħdura jqegħedni,
ħdejn l-ilma, fejn nistrieħ, jeħodni.
Hemm hu jrejjaqni. Rit...
Imexxini fit-triq tas-sewwa
minħabba l-isem tiegħu.
Imqar jekk nimxi f’wied mudlam,
ma nibżax mill-ħsara, għax inti miegħi.
Il-ħatar tiegħek u l-għasluġ tiegħek,
huma jwennsuni. Rit...
Inti tħejji mejda għalija
quddiem l-għedewwa tiegħi.
Biż-żejt tidlikli rasi,
u l-kalċi tiegħi tfawwarli. Rit...
Miegħi, iva, jimxu t-tjieba u l-ħniena
il-jiem kollha ta’ ħajti.
U ngħammar f’dar il-Mulej
sakemm indum ħaj! Rit...
IT-TIENI QARI
Qari mill-Ewwel Ittra ta’ San Pietru Appostlu (2:20b-25)
Għeżież, jekk tagħmlu t-tajjeb u ssofru t-tbatija bis-sabar, din tkun grazzja quddiem Alla. Għal dan intom kontu msejħa, għax Kristu wkoll bata għalikom u ħallielkom eżempju, biex timxu fuq il-passi tiegħu: hu li ma kien għamel ebda dnub, u ebda qerq ma nstab f’fommu, meta għajruh ma weġibx bit-tagħjir, meta bata ma heddidx imma ħalla f’idejn l-Imħallef ġust.
Hu tgħabba bi dnubietna sa fuq is-salib, biex aħna mmutu għad-dnubiet, u ngħixu għall-ġustizzja. Bil-ġrieħi tiegħu intom fiqtu.
Intom kontu bħal nagħaġ mitlufa, imma issa rġajtu lura għand ir-ragħaj u l-għassies ta’ ruħkom.
Il-Kelma tal-Mulej. Irroddu ħajr lil Alla.
AKKLAMAZZJONI QABEL L-EVANĠELJU
Hallelujah. Hallelujah. (Ġw 10:14)
Jiena r-ragħaj it-tajjeb, jgħid il-Mulej; jiena nagħraf in-nagħaġ tiegħi, u n-nagħaġ tiegħi jagħrfu lili.
Hallelujah.
L-EVANĠELJU
Qari mill-Evanġelju skont San Ġwann (10:1-10)
F’dak iż-żmien, Ġesù qal: «Tassew tassew ngħidilkom, min ma jidħolx fil-maqjel tan-nagħaġ mill-bieb imma jaqbeż ġewwa minn naħa oħra, dak hu ħalliel u brigant. Imma min jidħol mill-bieb hu r-ragħaj tan-nagħaġ.
Min ikun mal-bieb lilu jiftaħ, in-nagħaġ minn leħnu jisimgħu, u hu jsejjaħ in-nagħaġ tiegħu waħda waħda b’isimhom u joħroġhom barra. U meta joħroġ in-nagħaġ tiegħu, huwa jmur quddiemhom u n-nagħaġ jimxu warajh, għax jisimgħu leħnu. Imma wara wieħed barrani ma jimxux, anzi jaħarbu minnu, għax leħen barrani ma jafuhx.»
Din il-parabbola qalhielhom Ġesù, iżda huma ma fehmux x’ried jgħidilhom biha.
Għalhekk Ġesù raġa’ qalilhom: «Tassew, tassew ngħidilkom li l-bieb tan-nagħaġ huwa jien. Dawk kollha li ġew sa issa qabli huma ħallelin u briganti. Iżda n-nagħaġ lilhom ma semgħuhomx. Jiena hu l-bieb; jekk xi ħadd jidħol ġewwa permezz tiegħi jsalva, u jidħol u joħroġ u jsib fejn jirgħa.
Il-ħalliel ma jidħolx jekk mhux biex jisraq u joqtol u jeqred. Jiena ġejt biex ikollkom il-ħajja, u ħajja bil-kotra.»
Il-Kelma tal-Mulej. Tifħir lilek Kristu.
IFHEM IL-KELMA - Kummenti dwar il-qari
- VIDEO -
Fr Elija Vella OFMConv.
- AUDIO -
GĦIX IL-KELMA - Il-Kalendarju Liturġiku tal-ġimgħa
Ir-raba’ ġimgħa tas-Salterju
■ It-Tnejn 1 ta’ Mejju: San Ġużepp Ħaddiem (TO). Qari: Ġenesi 1:26 – 2:3 jew Kolossin 3:14-15.17.23-24; Salm 89:2-4.12-14.16; Mattew 13:54-58.
■ It-Tlieta 2 ta’ Mejju: San Atanasju, isqof u duttur tal-Knisja (TO). Qari: Atti 11:19-26; Salm 86:1-3.4-5.6-7; Ġwanni 10:22-30.
■ L-Erbgħa 3 ta’ Mejju: San Filippu u San Ġakbu, appostli (F). Qari: 1 Korintin 15:1-8; Salm 18:2-5; Ġwanni 14:6-14.
■ Il-Ħamis 4 ta’ Mejju: Ferja tal-Għid. Qari: Atti 13:13-25; Salm 88:2-3.21-22.25 u 27; Ġwanni 13:16-20.
■ Il-Ġimgħa 5 ta’ Mejju: Ferja tal-Għid. Qari: Atti 13:26-33; Salm 2:6-7.8-9.10-11; Ġwanni 14:1-6.
■ Is-Sibt 6 ta’ Mejju: Ferja tal-Għid. Qari: Atti 13:44-52; Salm 97:1.2-3ab.3ċd-4; Ġwanni 14:7-14.
T = Tifkira.
Il-kulur ħdejn id-data jindika l-kulur liturġiku tal-ġurnata.