Il-5 Ħadd tal-Għid - Jum il-Mulej

Title
Go to content
Il-5 Ħadd tal-Għid - Sena Ċ
AQRA L-KELMA - Il-liturġija tal-Kelma
L-EWWEL QARI
Qari mill-Ktieb tal-Atti tal-Appostli (14:21b-27)

F’dak iż-żmien, Pawlu u Barnaba reġgħu lura lejn Listra, Ikonju u Antjokja, jagħmlu l-qalb lid-dixxipli u jħeġġuhom biex jibqgħu fil-fidi, għaliex, kif kienu jgħidulhom, «jeħtiġilna nbatu ħafna biex nidħlu fis-Saltna ta’ Alla.»
Għamlulhom ukoll presbiteri f’kull Knisja, u bit-talb u s-sawm ħallewhom f’idejn il-Mulej, li fih kienu emmnu. Imbagħad għaddew minn Pisidja u ġew fil-Pamfilja. Wara li xandru l-kelma f’Perge, niżlu Attalija; minn hemm marru bil-baħar lejn Antjokja, mnejn kienu bagħtuhom u rrikkmandawhom f’idejn il-grazzja ta’ Alla għax-xogħol li temmew.
Meta waslu, laqqgħu l-membri tal-Knisja u qagħdu jgħarrfuhom b’dak kollu li Alla għamel magħhom, u wrewhom kif fetaħ il-bieb tal-fidi għall-pagani
Il-Kelma tal-Mulej.      Irroddu ħajr lil Alla.
SALM RESPONSORJALI (Salm 117)
Rit: Imbierek ismek għal dejjem, Mulej!
jew Hallelujah, Hallelujah, Hallelujah!

Twajjeb u ħanin il-Mulej,
idum biex jagħdab u kollu tjieba.
Twajjeb ma’ kulħadd il-Mulej,
tjubitu fuq kulma għamel. Rit…

Kulma għamilt iroddlok ħajr, Mulej;
iberkuk il-ħbieb tiegħek kollha.
Is-sebħ tas-saltna tiegħek ixandru,
fuq is-setgħa tiegħek jitkellmu. Rit…

Jgħarrfu lill-bniedem il-qawwa tiegħek,
u s-sebħ u l-ġmiel tas-saltna tiegħek.
Saltnatek hi saltna għaż-żminijiet kollha,
minn nisel għal nisel il-ħakma tiegħek. Rit…
IT-TIENI QARI
Qari mill-Ktieb tal-Apokalissi ta’ San Ġwann Appostlu (21:1-5a)

Jiena, Ġwanni, rajt sema ġdid u art ġdida, għax is-sema ta’ qabel u l-art ta’ qabel għabu, u ma kienx hemm iżjed baħar. U l-Belt il-qaddisa, Ġerusalemm il-ġdida, rajtha nieżla mis-sema mingħand Alla, imħejjija bħal għarusa mżejna għall-għarus tagħha.
U smajt leħen qawwi ġej mit-tron jgħid: «Din hi l-għamara ta’ Alla mal-bnedmin! Hu jgħammar magħhom, u huma jkunu l-poplu tiegħu, u Alla nnifsu jkun magħhom, Alla tagħhom. Hu jixxuttalhom kull demgħa minn għajnejhom; ma jkunx hemm iżjed mewt, anqas biki jew għajjat jew tbatija ma jkun hemm iżjed, għax għabu l-ħwejjeġ ta’ qabel.»
Imbagħad dak li hu bilqiegħda fuq it-tron qal: «Ara, sa nġedded kollox.»
Il-Kelma tal-Mulej.     Irroddu ħajr lil Alla.



AKKLAMAZZJONI QABEL L-EVANĠELJU
Hallelujah. Hallelujah. (Ġw 13:34)
Nagħtikom kmandament ġdid, jgħid il-Mulej, li tħobbu lil xulxin bħalma ħabbejtkom jien.
Hallelujah.


L-EVANĠELJU
Qari mill-Evanġelju skont San Ġwann (13:31-33a.34-35)

Kif ħareġ Ġuda miċ-ċenaklu, Ġesù qal: «Bin il-bniedem huwa gglorifikat issa, u permezz tiegħu huwa gglorifikat Alla. Jekk Alla huwa gglorifikat permezz ta’ Bin il-bniedem, Alla wkoll permezz tiegħu nnifsu għad jigglorifika lilu, u dalwaqt jigglorifikah.
Uliedi, ftit ieħor sa ndum magħkom. Nagħtikom kmandament ġdid, li tħobbu lil xulxin. Bħalma ħabbejtkom jien, hekk ukoll ħobbu intom lil xulxin.
Minn dan jagħraf kulħadd li intom dixxipli tiegħi, jiġifieri, jekk ikollkom l-imħabba bejnietkom.»
Il-Kelma tal-Mulej.       Tifħir lilek Kristu.
IFHEM IL-KELMA - Kummenti dwar il-qari
- VIDEO -
Fr Elija Vella OFMConv.

- AUDIO -
- VIDEO -
Parroċċa Burmarrad (Patri Allister Aquilina)

- AUDIO -
GĦIX IL-KELMA - Il-Kalendarju Liturġiku tal-ġimgħa
L-ewwel ġimgħa tas-salterju
It-Tnejn 16 ta’ Mejju: Ferja tal-Għid. Qari: Atti 14:5-18; Salm 113b:1-4.15-16; Ġwanni 14:21-26.
It-Tlieta 17 ta’ Mejju: Ferja tal-Għid. Qari: Atti 14:19-28; Salm 144:10-13.21; Ġwanni 14:27-31.
L-Erbgħa 18 ta’ Mejju: Ferja tal-Għid / San Ġwann I, Papa u Martri (T). Qari: Atti 15:1-6; Salm 121:1-5; Ġwanni 15:1-8.
Il-Ħamis 19 ta’ Mejju: Ferja tal-Għid. Qari: Atti 15:7-21; Salm 95:1-3.10; Ġwanni 15:9-11.
Il-Ġimgħa 20 ta’ Mejju: Ferja tal-Għid / San Bernardinu ta’ Siena, Presbiteru (T). Qari: Atti 15:22-31; Salm 56:8-12; Ġwanni 15:12-17.
Is-Sibt 21 ta’ Mejju: Ferja tal-Għid / San Kristofru Magallanes, Presbiteru, u sħabu, Martri (T). Qari: Atti 16:1-10; Salm 99:1-3.5; Ġwanni 15:18-21.

T = Tifkira
Il-kulur ħdejn id-data jindika l-kulur liturġiku tal-ġurnata.

ĊAK Ltd. Triq S. Sommier, Birkirkara BKR4611- MALTA
Tel: +00 356 21 498 343  | jim@cakmalta.org
© Copyright ĊAK Ltd. Malta 2023 - All right reserved.
Back to content