L-1 Ħadd tal-Avvent - Sena A
AQRA L-KELMA - Il-liturġija tal-Kelma
L-EWWEL QARI
Qari mill-Ktieb tal-Profeta Isaija (2:1-5)
Il-kelma li ġiet f’dehra lil Isaija bin Amos, dwar Ġuda u Ġerusalemm. Għad jiġri fl-aħħar jiem li l-għolja tad-dar tal-Mulej togħla ’l fuq mill-qċaċet tal-muntanji, u tintrefa’ ’l fuq mill-għoljiet, lejha għad jiġru l-ġnus kollha.
Kotra ta’ popli għad jiġu u jgħidu: “Ħalli mmorru u nitilgħu fuq l-għolja tal-Mulej, lejn id-dar ta’ Alla ta’ Ġakobb, biex jgħallimna triqatu, u nimxu fil-mogħdijiet tiegħu.” Għax minn Sijon joħroġ it-tagħlim, u l-kelma tal-Mulej minn Ġerusalemm. Il-Mulej jagħmel il-ħaqq bejn il-ġnus, u jaqta’ s-sentenza bejn ħafna popli; u huma jibdlu x-xwabel tagħhom f’sikek tal-moħriet, u l-lanez tagħhom fi mnieġel. Ebda ġens ma jerfa’ x-xabla kontra ġens ieħor, u s-sengħa tal-gwerra ma jitgħallmuhiex iżjed. Ejja, dar Ġakobb, ħalli nimxu fid-dawl tal-Mulej!
Il-Kelma tal-Mulej. Irroddu ħajr lil Alla.
SALM RESPONSORJALI (Salm 121)
Rit: Immorru ferħana f’dar il-Mulej!
Fraħt meta qaluli:
“Sejrin f’dar il-Mulej!”
Diġà qegħdin riġlejna
fi bwiebek, Ġerusalemm! Rit…
Lejha t-tribujiet jitilgħu,
it-tribujiet tal-Mulej,
biex, skont il-liġi ta’ Israel,
ifaħħru isem il-Mulej.
Għax hemm twaqqfu
t-tronijiet tal-ħaqq,
it-tronijiet tad-dar ta’ David. Rit…
Itolbu s-sliem għal Ġerusalemm:
ħa jkollhom is-sliem dawk kollha
li jħobbuk!
Ħa jkun hemm is-sliem ġewwa
l-ħitan tiegħek,
u l-ġid fil-palazzi tiegħek! Rit…
Minħabba ħuti u ħbiebi,
ħallini ngħidlek: “Is-sliem għalik!”
Minħabba f’dar il-Mulej,
Alla tagħna,
nixtieq illi jkollok il-ġid. Rit…
IT-TIENI QARI
Qari mill-Ittra ta’ San Pawl Appostlu lir-Rumani (13:11-14a)
Ħuti, waslet is-siegħa li intom tqumu min-ngħas; għax is-salvazzjoni tagħna hi eqreb minn meta bdejna nemmnu.
Il-lejl għoddu għadda, u qorob il-jum. Inwarrbu mela l-għemil tad-dlam u nilbsu l-armi tad-dawl.
Ngħixu kif jixraq, bħal f’binhar; mhux bl-ikel iż-żejjed u s-sokor, mhux biż-żina u t-tbaħrid, mhux bil-ġlied u l-għejra. Imma ilbsu lil Sidna Ġesù Kristu u ħallukom mill-ħsieb tal-ġisem u l-ġibdiet tiegħu.
Il-Kelma tal-Mulej. Irroddu ħajr lil Alla.
AKKLAMAZZJONI QABEL L-EVANĠELJU (Salm 84:8)
Hallelujah. Hallelujah.
Uri lilna, Mulej, it-tjieba tiegħek, u s-salvazzjoni tiegħek agħtina.
Hallelujah!
L-EVANĠELJU
Qari mill-Evanġelju skont San Luqa (24:37-44)
F’dak iż-żmien: Ġesù qal lid-dixxipli tiegħu: “Bħal fi żmien Noè, hekk tkun il-miġja ta’ Bin il-bniedem. Għax kif fiż-żmien ta’ qabel id-dilluvju kienu jieklu u jixorbu, jiżżewġu u jżewġu sa dakinhar li Noè daħal fl-arka, u b’xejn ma ntebħu sa ma wasal id-dilluvju u ġarr lil kulħadd, hekk tkun il-miġja ta’ Bin il-bniedem. Imbagħad tnejn ikunu fl-għalqa: wieħed jittieħed u l-ieħor jitħalla; żewġ nisa jkunu jitħnu flimkien: waħda tittieħed u l-oħra titħalla.
Ishru, mela, għax ma tafuhx il-jum li fih jiġi Sidkom. Kunu afu dan, li kieku sid id-dar kellu jkun jaf f’liema sahra tal-lejl sa jiġi l-ħalliel, kien jishar u ma jħallix min jinfidlu l-ħitan ta’ daru. Mela kunu lesti intom ukoll, għax qatt ma tistgħu tobsru s-siegħa li fiha jiġi Bin il-bniedem.”
Il-Kelma tal-Mulej. Tifħir lilek Kristu.
IFHEM IL-KELMA - Kummenti dwar il-qari
- VIDEO -
Fr Elija Vella OFMConv.
- AUDIO -
- AUDIO -
GĦIX IL-KELMA - Il-Kalendarju Liturġiku tal-ġimgħa
L-ewwel ġimgħa tas-salterju
■ It-Tnejn 28 ta’ Novembru: Ferja tal-Avvent. Qari: Isaija 4:2-6; Salm 121:1-9; Mattew 8:5-11.
■ It-Tlieta 29 ta’ Novembru: Ferja tal-Avvent. Qari: Isaija 11:1-10; Salm 71:2.7-8.12-13.17; Luqa 10:21-24.
■ L-Erbgħa 30 ta’ Novembru: Sant’Andrija, appostlu (F). Qari: Rumani 10:9-18; Salm 18:2-5; Mattew 4:18-22.
■ Il-Ħamis 1 ta’ Diċembru: Ferja tal-Avvent. Qari: Isaija 26:1-6; Salm 117:1.8-9.19-21.25-27; Mattew 7:21.24-27.
■ Il-Ġimgħa 2 ta’ Diċembru: Ferja tal-Avvent. Qari: Isaija 29:17-24; Salm 26:1.4.13-14; Mattew 9:27-31.
■ Is-Sibt 3 ta’ Diċembru: San Franġisk Saverju, presbiteru (TO). Qari: Isaija 30:19-21.23-26; Salm 146:1-6; Mattew 9:35–10:1.6-8.
F = Festa; TO = Tifkira Obbligatorja
Il-kulur ħdejn id-data jindika l-kulur liturġiku tal-ġurnata.