L-34 Ħadd ta' matul is-sena - Sena Ċ
AQRA L-KELMA - Il-liturġija tal-Kelma
L-EWWEL QARI
Qari mit-Tieni Ktieb ta’ Samwel (5:1-3)
F’dak iż-żmien, it-tribujiet kollha ta’ Israel ġew għand David f’Ħebron u qalulu: «Arana, għadmek u laħmek aħna! Fl-imgħoddi, meta Sawl kien sultan fuqna, kont int li kont toħroġ lil Israel għall-gwerra u ġġibhom lura, u l-Mulej qallek: “Int għad tirgħa l-poplu tiegħi u tkun prinċep fuq Israel.”»
U x-xjuħ kollha ta’ Israel ġew għand is-Sultan f’Ħebron u s-sultan David għamel patt magħhom f’Ħebron quddiem il-Mulej; u lil David dilkuh sultan fuq Israel.
Il-Kelma tal-Mulej. Irroddu ħajr lil Alla.
SALM RESPONSORJALI (Salm 121)
Rit: Sejrin ferħana f’dar il-Mulej!
Fraħt meta qaluli:
«Sejrin f’dar il-Mulej!»
Diġà qegħdin riġlejna
fi bwiebek, Ġerusalemm! Rit…
Ġerusalemm, mibnija bħal belt,
magħquda ħaġa waħda.
Lejha t-tribujiet jitilgħu,
it-tribujiet tal-Mulej. Rit…
Biex, skont il-liġi ta’ Israel,
ifaħħru isem il-Mulej.
Għax hemm twaqqfu
t-tronijiet tal-ħaqq,
it-tronijiet tad-dar ta’ David. Rit…
IT-TIENI QARI
Qari mill-Ittra ta’ San Pawl Appostlu lill-Kolossin (1:12-20)
Ħuti, roddu ħajr lill-Missier, li għamilkom denji li tissieħbu fil-wirt tal-qaddisin fis-saltna tad-dawl.
Hu ħelisna mill-ħakma tad-dlam, u daħħalna fis-saltna ta’ Ibnu l-maħbub, li bih għandna l-fidwa, il-maħfra tad-dnubiet. Hu x-xbieha ta’ Alla li ma jidhirx, il-kbir fost il-ħlejjaq kollha; għax fih kien maħluq kollox, fis-sema u fl-art, dak kollu li jidher u dak kollu li ma jidhirx, Troni u Ħakmiet, Prinċipati u Setgħat. Kollox bih u għalih kien maħluq, hu li hu qabel kollox, u kollox fih qiegħed iżomm.
Hu r-Ras tal-Ġisem, li hu l-Knisja. Hu li hu l-bidu, il-kbir li qam mill-imwiet, sabiex ikun hu l-ewwel f’kollox. Hekk Alla għoġbu li tgħammar fih il-milja kollha; bih Alla għoġbu jerġa’ jħabbeb kollox miegħu; bid-demm tiegħu, imxerred fuq is-salib, ġieb is-sliem permezz tiegħu fis-sema u fl-art.
Il-Kelma tal-Mulej. Irroddu ħajr lil Alla.
AKKLAMAZZJONI QABEL L-EVANĠELJU
Hallelujah. Hallelujah. (Mk 11:9.10)
Imbierek min ġej f’isem il-Mulej! Imbierka s-Saltna li ġejja ta’ David missierna!
Hallelujah!
L-EVANĠELJU
Qari mill-Evanġelju skont San Luqa (23:35-43)
F’dak iż-żmien, wara li sallbu lil Ġesù, il-poplu waqaf hemm iħares, waqt li l-kapijiet bdew jiddieħku b’Ġesù u jgħidu: «Salva lil oħrajn; ħa jsalva lilu nnifsu jekk dan hu l-Messija, il-Maħtur ta’ Alla!»
Is-suldati wkoll bdew jgħadduh biż-żmien; u resqu lejh, newlulu nbid qares u qalulu: «Jekk inti s-sultan tal-Lhud salva lilek innifsek.» Fuq rasu kien hemm ukoll kitba li kienet tgħid: «Dan huwa s-sultan tal-Lhud.»
Wieħed mill-ħatjin li kienu msallbin miegħu beda jgħajru u jgħidlu: «Int m’intix il-Messija? Salva lilek innifsek u lilna!» Imma qabeż l-ieħor, ċanfru u qallu: «Anqas minn Alla int ma tibża’, int li qiegħed taħt l-istess kundanna? Tagħna hija ġusta, tassew, għax qegħdin nieħdu li ħaqqna ta’ kulma għamilna; imma dan ma għamel xejn ħażin.»
Imbagħad qal: «Ġesù, ftakar fija meta tidħol fis-Saltna tiegħek.» U Ġesù wieġbu: «Tassew ngħidlek, illum tkun fil-Ġenna miegħi.»
Il-Kelma tal-Mulej. Tifħir lilek Kristu.
IFHEM IL-KELMA - Kummenti dwar il-qari
- VIDEO -
Fr Elija Vella OFMConv.
- AUDIO -
GĦIX IL-KELMA - Il-Kalendarju Liturġiku tal-ġimgħa
It-tieni ġimgħa tas-salterju
■ It-Tnejn 21 ta’ Novembru: Il-Preżentazzjoni tal-Imqaddsa Verġni Marija (TO). Qari: Żakkarija 2:14-17; Salm Luqa 1:46-55; Mattew 12:46-50.
■ It-Tlieta 22 ta’ Novembru: Santa Ċeċilja, verġni u martri (TO). Qari: Apokalissi 14:14-19; Salm 95:10-13; Luqa 21:5-11.
■ L-Erbgħa 23 ta’ Novembru: Ferja / San Klement I, papa u martri (T) / San Kolumbanu, abbati (T). Qari: Apokalissi 15:1-4; Salm 97:1-3.7-9; Luqa 21:12-19.
■ Il-Ħamis 24 ta’ Novembru: Sant’Andrija Dûng Lac, presbiteru, u sħabu, martri (TO). Qari: Apokalissi 1:1-2.21-23; 19:1-3.9; Salm 99:2-5; Luqa 21:20-28.
■ Il-Ġimgħa 25 ta’ Novembru: Ferja / Santa Katerina ta’ Lixandra, verġni u martri (T). Qari: Apokalissi 20:1-4.11–21: 2; Salm 83:3-6.8; Luqa 21:29-33.
■ Is-Sibt 26 ta’ Novembru: Ferja / L-Imqaddsa Verġni Marija f’Jum is-Sibt (T). Qari: Apokalissi 22:1-7; Salm 94:1-3.5-7; Luqa 21:34-36.
TO = Tifkira Obbligatorja; T = Tifkira
Il-kulur ħdejn id-data jindika l-kulur liturġiku tal-ġurnata.