L-24 Ħadd ta' matul is-sena - Sena A
AQRA L-KELMA - Il-liturġija tal-Kelma
L-EWWEL QARI
Qari mill-Ktieb ta’ Bin Sirak (27:30-28:7)
Għadab u qilla, dawn ukoll ta’ min jistmerrhom, u l-bniedem midneb mimli bihom. Min ifittex jitħallas b’idejh, isib ħlasu mingħand il-Mulej, li jifli sewwa dnubietu. Aħfer lill-proxxmu dnubietu, u mbagħad titlob u dnubietek jinħafrulek.
Bniedem irawwem għadab għal ieħor, u mbagħad sa jfittex fejqan mingħand il-Mulej? Minn bniedem bħalu m’għandux ħniena, u mbagħad sa jitlob għal dnubietu? Jekk bniedem jibqa’ mgħaddab, min sa jpattilu għal dnubietu?
Ftakar fl-aħħar ta’ ħajtek, u ieqaf mill-mibegħda; ftakar fit-taħsir u l-mewt, u oqgħod għall-kmandamenti. Ftakar fil-kmandamenti u tobgħodx il-proxxmu; ftakar fil-patt tal-Għoli u agħlaq għajnejk għall-offiża.
Il-Kelma tal-Mulej. Irroddu ħajr lil Alla.
SALM RESPONSORJALI (Salm 102)
Rit: Ħanin u twajjeb il-Mulej!
Bierek, ruħ tiegħi, il-Mulej!
B’qalbi kollha nbierek l-isem qaddis tiegħu.
Bierek, ruħ tiegħi, il-Mulej,
u la tinsiex il-ġid kollu li għamel miegħek. Rit…
Hu jaħfer dnubietek kollha;
ifejjaq il-mard tiegħek kollu;
jifdi lil ħajtek mill-qabar;
iħaddnek bit-tjieba u l-ħniena. Rit…
Ma joqgħodx jitlewwem magħna,
u anqas jinkorla għal dejjem.
Ma mexiex magħna skont ma ħaqqhom ħtijietna;
ma ħallasniex skont ma ħaqqha ħżunitna. Rit…
Daqskemm huma s-smewwiet ’il fuq mill-art,
hekk hi kbira tjubitu ma’ min jibża’ minnu;
daqs kemm hu mbiegħed il-Lvant mill-Punent,
hekk hu jbiegħed minna ħtijietna. Rit…
IT-TIENI QARI
Qari mill-Ittra ta’ San Pawl Appostlu lir-Rumani (14:7-9)
Ħuti, ħadd minna ma jgħix għalih innifsu, u ħadd ma jmut għalih innifsu. Jekk ngħixu, ngħixu għall-Mulej; jekk immutu, immutu għall-Mulej. Sew jekk ngħixu, mela, sew jekk immutu, aħna tal-Mulej. Kristu għalhekk miet u rxoxta, biex ikun Sid kemm tal-ħajjin u kemm tal-mejtin.
Il-Kelma tal-Mulej. Irroddu ħajr lil Alla.
AKKLAMAZZJONI QABEL L-EVANĠELJU
Hallelujah. Hallelujah. (Ġw 13:34)
Nagħtikom kmandament ġdid, jgħid il-Mulej; li tħobbu lil xulxin bħalma ħabbejtkom jien.
Hallelujah!
L-EVANĠELJU
Qari mill-Evanġelju skond San Mattew (16:21-27)
F’dak iż-żmien, Pietru resaq lejn Ġesù u qallu: «Mulej, xi kemm-il darba jrid jonqosni ħija biex jiena naħfirlu? Sa seba’ darbiet?» Wieġbu Ġesù: «Ma ngħidlekx sa seba’ darbiet, imma sa sebgħa u sebgħin darba. Għalhekk is-Saltna tas-Smewwiet nistgħu nxebbhuha ma’ wieħed sultan, li ried jagħmel il-kontijiet mal-qaddejja tiegħu. Kif beda jagħmel dan, ħadulu quddiemu wieħed li kellu jagħtih għaxart elef talent. Billi ma kellux minn fejn irroddhomlu, is-sinjur ordna li jinbiegħu hu, martu, uliedu u kull ma kellu, ħalli b’hekk jitħallas id-dejn. Imma l-qaddej inxteħet quddiemu jitolbu u jgħidlu: “Sinjur, stabar ftit bija, kollox irroddlok.” Is-sinjur ġietu ħasra minn dak il-qaddej, bagħtu u ħafirlu dejnu.
Mela dak il-qaddej joħroġ, u jiltaqa’ ma’ wieħed minn sħabu, li kellu jagħtih mitt dinar; qabdu minn għonqu u beda jagħfsu. “Ħallas dejnek,” qallu. Il-qaddej sieħbu nxteħet quddiemu jitolbu bil-ħniena u jgħidlu: “Stabar ftit bija u rroddlok.” Imma dak ma riedx jaf, mar u xeħtu l-ħabs sa ma jrodd kull ma kellu jagħtih.
Sħabu l-qaddejja raw il-ġrajja kollha u sewdu qalbhom ħafna; marru għand is-sinjur tagħhom u tarrfulu kulma kien ġara. Imbagħad is-sinjur bagħat għalih u qallu: “Ja qaddej ħażin, meta jiena ħfirtlek dak id-dejn kollu wara li tlabtni bil-ħniena, ma kienx imissek int ukoll tħenn għal sieħbek kif ħennejt jien għalik?” U saħan bl-aħrax is-sinjur għalih, u tah f’idejn min jaħqru sa ma jrodd kull ma kellu jagħti. Hekk jagħmel lilkom Missieri li hu fis-Smewwiet jekk ma taħfrux lil xulxin minn qalbkom.»
Il-Kelma tal-Mulej. Tifħir lilek Kristu.
IFHEM IL-KELMA - Kummenti dwar il-qari
- AUDIO -
GĦIX IL-KELMA - Il-Kalendarju Liturġiku tal-ġimgħa
Ir-raba’ ġimgħa tas-Salterju
■ It-Tnejn 18 ta’ Settembru: Ferja. Qari: 1 Timotju 2:1-8; Salm 27:2.7.8-9; Luqa 7:1-10.
■ It-Tlieta 19 ta’ Settembru: Ferja / San Ġennaru, isqof u martri (T). Qari: 1 Timotju 3:1-13; Salm 100:1-2ab.2ċd-3ab.5.6; Luqa 7:11-17.
■ L-Erbgħa 20 ta’ Settembru: San Andrija Kim Taegon, presbiteru, u San Pawl Chong Hasang, u sħabhom, martri (TO). Qari: 1 Timotju 3:14-16; Salm 110:1-2.3-4.5-6; Luqa 7:31-35.
■ Il-Ħamis 21 ta’ Settembru: San Mattew, appostlu u evanġelista (F). Qari: Efesin 4:1-7.11-13; Salm 18:2-5; Mattew 9:9-13.
■ Il-Ġimgħa 22 ta’ Settembru: Ferja. Qari: 1 Timotju 6:2ċ-12; Salm 48:6-7.8-10.17-18.19-20; Luqa 8:1-3.
■ Is-Sibt 23 ta’ Settembru: San Piju ta’ Pietrelcina, presbiteru (TO). Qari: 1 Timotju 6:13-16; Salm 99:2.3.4.5; Luqa 8:4-15.
F = Festa; TO = Tifkira Obbligatorja; T = Tifkira.
Il-kulur ħdejn id-data jindika l-kulur liturġiku tal-ġurnata.