L-14-IL ĦADD TA’ MATUL IS-SENA B
AQRA L-KELMA - Il-liturġija tal-Kelma
L-Ewwel Qari
Qari mill-Ktieb tal-Profeta Eżekjel (2:2-5)
F’dak iż-żmien, daħal fija l-ispirtu u waqqafni fuq riġlejja; u smajt x’kien qiegħed jgħidli.
Qalli: «O bniedem, qiegħed nibagħtek għand ulied Israel, ġens ta’ nies rashom iebsa, li rvellaw kontra tiegħi; dinbu kontra tiegħi, huma u missirijiethom sal-lum stess. Huma nies wiċċhom sfiq u qalbhom iebsa. Sa nibagħtek għandhom, biex tgħidilhom: “Dan jgħid Sidi l-Mulej.” Jisimgħu u ma jisimgħux - nies ta’ ras iebsa huma - ħa jkunu jafu li hemm profeta f’nofshom.»
Il-Kelma tal-Mulej. Irroddu ħajr lil Alla.
SALM RESPONSORJALI (Salm 122)
R/. Għajnejna lejn il-Mulej, sa ma jkollu ħniena minna!
Lejk nerfa’ għajnejja,
int li tgħammar fis-smewwiet.
Ara, bħal għajnejn il-qaddejja
lejn id sidhom;
hekk għajnejna lejn il-Mulej. R/.
Bħal għajnejn il-qaddejja
lejn id sidtha;
hekk għajnejna lejn il-Mulej,
Alla tagħna,
sa ma jkollu ħniena minna. R/.
Ħenn għalina, Mulej, ħenn għalina,
għax mitmugħa sax-xaba’
bit-tagħjir.
Imxebbgħa għall-aħħar ruħna
biż-żebliħ tal-għonja,
bit-tagħjir tal-kburin. R/.
IT-TIENI QARI
Qari mit-Tieni Ittra ta’ San Pawl Appostlu lill-Korintin (12:7-10)
Ħuti, biex ma mmurx nintefaħ bija nnifsi minħabba fil-kobor tar-rivelazzjonijiet, tqegħditli xewka f’ġismi, messaġġiera tax-Xitan, biex toqgħod tniggiżni ħalli ma nintefaħx.
Fuq hekk tliet darbiet tlabt il-Mulej biex hi titbiegħed minni. Iżda hu weġibni: «Biżżejjed għalik il-grazzja tiegħi; għax il-qawwa tiegħi tidher fl-aqwa tagħha fejn hemm id-dgħajjef.»
Għalhekk niftaħar minn qalbi l-aktar bid-debbulizzi tiegħi biex il-qawwa ta’ Kristu tgħammar fija. Mela bil-qalb kollha nitgħaxxaq bid-debbulizzi tiegħi, bit-tagħjir, bl-għaks, bil-persekuzzjonijiet, bid-dwejjaq minħabba Kristu; għax meta nkun dgħajjef, inkun qawwi.
Il-Kelma tal-Mulej. Irroddu ħajr lil Alla.
AKKLAMAZZJONI QABEL L-EVANĠELJU (Lq 4:18)
Hallelujah. Hallelujah.
L-Ispirtu tal-Mulej fuqi, bagħatni nwassal il-bxara t-tajba lill-fqajrin.
Hallelujah!
L-EVANĠELJU
Qari mill-Evanġelju skont San Mark (6:1-6)
F’dak iż-żmien Ġesù mar lejn pajjiżu u d-dixxipli tiegħu marru miegħu.
Meta wasal is-Sibt, daħal jgħallem fis-sinagoga, u l-ħafna li semgħuh bdew jistagħġbu u jgħidu: «Mnejn kisbu dan kollu? U x’inhu dan l-għerf li ngħatalu biex saħansitra qegħdin isiru dawn l-għeġubijiet kbar b’idejh? Dan mhuwiex il-mastrudaxxa bin Marija u ħu Ġakbu u Ġożè u Ġuda u Xmun? U ħutu l-bniet mhumiex hawn magħna?» U huma skandalizzaw ruħhom minħabba fih.
Qalilhom Ġesù: «Ebda profeta ma hu bla ġieħ jekk mhux f’pajjiżu u fost qrabatu u f’daru stess.» U hemmhekk ma sata’ jagħmel ebda miraklu, ħlief li qiegħed idejh fuq ftit morda u fejjaqhom; u baqa’ mistagħġeb bin-nuqqas ta’ fidi tagħhom. U mar idur l-irħula ta’ dawk l-inħawi jgħallem.
Il-Kelma tal-Mulej. Tifħir lilek Kristu.
IFHEM IL-KELMA - Kummenti dwar il-qari
- AUDIO -
- TEST -
GĦIX IL-KELMA - Il-Kalendarju Liturġiku tal-ġimgħa
It-tieni ġimgħa tas-Salterju
■ It-Tnejn 8 ta’ Lulju: Ferja. Qari: Ħosegħa 2:16-18.21-22; Salm 144:2-9; Mattew 9:18-26.
■ It-Tlieta 9 ta’ Lulju: Ferja / Santu Wistin Zhao Rong, presbiteru, u sħabu, martri (T). Qari: Ħosegħa 8:4-7.11-13; Salm 113:3-10; Mattew 9:32-38.
■ L-Erbgħa 10 ta’ Lulju: Ferja. Qari: Ħosegħa 10:1-3.7-8.12; Salm 104:2-7; Mattew 10:1-7.
■ Il-Ħamis 11 ta’ Lulju: San Benedittu, abbati u patrun tal-Ewropa (F). Qari: Proverbji 2:1-9; Salm 33:2-4.6.9.12.14-15; Mattew 19:27-29.
■ Il-Ġimgħa 12 ta’ Lulju: Ferja. Qari: Ħosegħa 14:2-10; Salm 50:3-4.8-9.12-14; Mattew 10:16-23.
■ Is-Sibt 13 ta’ Lulju: Ferja / L-Imqaddsa Marija f’jum is-Sibt (T) / San Enriku (T). Qari: Isaija 6:1-8; Salm 92:1ab.1ċ-2.5; Matew 10:24-33.
F = Festa; T = Tifkira.
Il-kulur ħdejn id-data jindika l-kulur liturġiku tal-ġurnata.