L-1 Ħadd tal-Avvent - Sena B
AQRA L-KELMA - Il-liturġija tal-Kelma
L-EWWEL QARI
Qari mill-Ktieb tal-Profeta Isaija (63:16b-17.19b; 64:1-7)
Int, Mulej, missierna, ismek il-Feddej tagħna minn dejjem. Għaliex, Mulej, iġġegħelna nwarrbu minn triqatek, u twebbsilna qalbna biex ma nibżgħux minnek? Erġa’ lura minħabba l-qaddejja tiegħek, it-tribujiet li huma wirtek.
Mhux li kont iċċarrat is-smewwiet u tinżel minn hemm! U jitheżżu l-muntanji quddiemek meta int tagħmel għeġubijiet li ma konniex nistennew, u sa mill-qedem qatt ma smajna bihom! Widna qatt ma semgħet, għajn qatt ma rat Alla bħalek, Alla li jħabrek għal min jittama fih. Int tilqa’ lil min jagħmel is-sewwa bil-ferħ, lil dawk li jiftakru fi triqatek. Ara! Int kont mgħaddab għalina, u aħna dnibna. Domna fi dnubna, u kontrik qomna għal ħafna żmien. Tniġġisna lkoll kemm aħna, bħal ċarruta maħmuġa l-aħjar għemejjel tagħna; bħal werqa lkoll dbielna u ħżunijietna bħal riħ ġarrewna.
Ħadd ma hawn li jsejjaħ ismek, li jitħarrek biex iżomm miegħek. Għax int ħbejt wiċċek minna, u rħejtna f’idejn ħżunijietna. Madankollu, Mulej, int missierna; aħna t-tafal, u inti l-fuħħari; aħna lkoll għemil idejk.
Il-Kelma tal-Mulej. Irroddu ħajr lil Alla.
SALM RESPONSORJALI (Salm 24)
R/.: Reġġagħna għal li konna, Alla tal-eżerċti; itfa’ fuqna d-dija ta’ wiċċek, u nkunu salvi!
O Ragħaj ta’ Israel, agħti widen,
int li qiegħed fuq il-kerubini, iddi:
Qajjem il-qawwa tiegħek,
u ejja ħa ssalvana. R/.
Erġa’ ejja, Alla tal-eżerċti;
ħares mis-sema, u ara,
u żur ’il din id-dielja.
Ħu ħsieb dak li ħawlet lemintek,
ir-rimja li int kabbart għalik. R/.
Ħa tkun idek fuq
il-bniedem ta’ lemintek,
fuq il-bniedem li int saħħaħt għalik.
Aħna ma nitbegħdux minnek;
roddilna l-ħajja,
u aħna nsejħu ismek. R/.
IT-TIENI QARI
Qari mill-Ewwel Ittra ta’ San Pawl Appostlu lill-Korintin (13:33-37)
Ħuti: Grazzja u sliem mingħand Alla Missierna u l-Mulej Ġesù Kristu! Jiena niżżi ħajr dejjem lil Alla tiegħi minħabba fikom għall-grazzja li Alla takom, lilkom fi Kristu Ġesù; fih intom stagħnejtu f’kollox, f’kull kelma, f’kull għerf daqskemm ix-xhieda ta’ Kristu kienet imwettqa fikom. Għalhekk m’intom nieqsa minn ebda don, intom u tistennew id-dehra ta’ Sidna Ġesù Kristu. Huwa hu li jwettaqkom sal-aħħar biex tkunu bla ħtija fil-jum ta’ Sidna Ġesù Kristu. Alla jżomm kelmtu, minnu kontu msejħin biex tidħlu fix-xirka ta’ Ibnu Sidna Ġesù Kristu.
Il-Kelma tal-Mulej. Irroddu ħajr lil Alla.
AKKLAMAZZJONI QABEL L-EVANĠELJU (Salm 85:8)
Hallelujah. Hallelujah.
Uri lilna, Mulej, it-tjieba tiegħek, u s-salvazzjoni tiegħek agħtina.
Hallelujah!
L-EVANĠELJU
Qari mill-Evanġelju skont San Luqa (21:25-28.34-36)
F’dak iż-żmien, Ġesù qal lid-dixxipli tiegħu: «Kunu għajnejkom miftuħa, ishru, għax ma tafux meta sa jasal il-waqt. Jiġri bħal meta bniedem ikun siefer u telaq mid-dar, iħalli kollox f’idejn il-qaddejja tiegħu, kull wieħed fuq xogħlu, u lil tal-bieb jordnalu biex jibqa’ jishar.
Mela ishru, għax ma tafux meta jiġi Sid id-dar, jekk hux filgħaxija, jew f’nofsillejl, jew xħin jidden is-serduk, jew inkella mas-sebħ, li ma jmurx jiġi għal għarrieda u jsibkom reqdin.
U dak li qiegħed ngħid lilkom, qiegħed ngħidu għal kulħadd: ishru!»
Il-Kelma tal-Mulej. Tifħir lilek Kristu.
IFHEM IL-KELMA - Kummenti dwar il-qari
- AUDIO -
GĦIX IL-KELMA - Il-Kalendarju Liturġiku tal-ġimgħa
L-ewwel ġimgħa tas-Salterju
■ It-Tnejn 4 ta’ Diċembru: Ferja tal-Avvent / San Ġwann Damaxxenu, presbiteru u duttur tal-Knisja (T). Qari: Isaija 2:1-5; Salm 121:1-2.3-4a.4b-5.6-7.8-9; Mattew 8:5-11.
■ It-Tlieta 5 ta’ Diċembru: Ferja tal-Avvent. Qari: Isaija 11:1-10; Salm 71:2.7-8.12-13.17; Luqa 10:21-24.
■ L-Erbgħa 6 ta’ Diċembru: Ferja tal-Avvent / San Nikola, isqof (T). Qari: Isaija 25:6-10a; Salm 22:1-3a.3b-4.5.6; Mattew 15:29-37.
■ Il-Ħamis 7 ta’ Diċembru: San Ambroġ, isqof u duttur tal-Knisja (TO). Qari: Isaija 26:1-6; Salm 117:1 u 8-9.19-21.25-27a; Mattew 7:21.24-27.
■ Il-Ġimgħa 8 ta’ Diċembru: It-Tnissil bla Tebgħa tal-Imqaddsa Verġni Marija (S). Qari: Ġenesi 3:9-15.20; Salm 97:1-4; Efesin 1:3-6.11-12; Luqa 1:26-38.
■ Is-Sibt 9 ta’ Diċembru: Ferja tal-Avvent / San Ġwann Diegu Cuauhtlatoatzin (T). Qari: Isaija 30:19-21.23-26; Salm 146:1-2.3-4.5-6; Mattew 9:35 – 10:1.6-8.
S = Solennità; TO = Tifkira Obbligatorja; T = Tifkira.
Il-kulur ħdejn id-data jindika l-kulur liturġiku tal-ġurnata.