It-32 Ħadd ta' matul is-sena - Sena A
AQRA L-KELMA - Il-liturġija tal-Kelma
L-EWWEL QARI
Qari mill-Ktieb tal-Għerf (6:12-16)
L-għerf jiddi, bla qatt ma jnemnem, malajr jagħrfuh dawk li jħobbuh, u jsibuh dawk li jfittxuh.
Hu jħabrek biex jidher lil dawk li jixtiquh. Min ibakkar ifittxu, ma jitħabatx, għax ħdejn biebu bilqiegħda jsibu. L-aqwa tal-għaqal hu li taħseb fl-għerf, u min jishar għalih malajr jeħles mill-inkwiet.
L-għerf idur u jfittex lil dawk li jixirqulu, kollu ħlewwa jidhrilhom fit-triq, u jiltaqa’ magħhom f’kull ħsieb tagħhom.
Il-Kelma tal-Mulej. Irroddu ħajr lil Alla.
SALM RESPONSORJALI (Salm 62)
R/. Mulej, Alla tiegħi, ruħi bil-għatx għalik!
Alla, Alla tiegħi int;
lilek ħerqan infittex.
Ruħi bil-għatx għalik,
għalik imxennaq jiena,
bħal art niexfa,
maħruqa, bla ilma. R/.
Għalhekk ġejt narak
fit-tempju mqaddes tiegħek,
biex nitgħaxxaq
bis-setgħa u l-glorja tiegħek.
Għax it-tjieba
tiegħek aħjar mill-ħajja,
xufftejja jxandru
t-tifħir tiegħek. R/.
Għalhekk inbierkek tul ħajti kollha;
ngħolli jdejja u nsejjaħ ismek.
Bħal b’ikel mill-aħjar
li jsemmen nimtela,
u jgħannilek fommi
b’xufftejn ferrieħa. R/.
Meta, mimdud fuq friexi, fik niftakar,
u naħseb fuqek fis-sahriet tal-lejl.
Għax inti kont għajnuna għalija,
għad-dell ta’ ġwenħajk
ngħanni bil-ferħ. R/.
IT-TIENI QARI
Bidu tal-Ewwel Ittra ta’ San Pawl Appostlu lit-Tessalonkin (4:13-18)
Ma rridux li ma tkunux tafu, ħuti, fuq il-mejtin biex ma ssewdux qalbkom bħall-oħrajn li ma għandhomx tama. Jekk aħna nemmnu li Ġesù miet u qam mill-imwiet, hekk ukoll Alla jiġbor miegħu lil dawk li raqdu f’Ġesù.
Dan ngħidulkom fuq il-kelma tal-Mulej, jiġifieri li aħna li nkunu għadna hawn ħajjin għall-miġja tal-Mulej, ma mmorrux qabel dawk li jkunu raqdu. Għaliex il-Mulej innifsu mal-kmand, mal-leħen tal-arkanġlu u t-tromba ta’ Alla, jinżel mis-sema, u dawk li jkunu mietu fi Kristu jqumu l-ewwel. Imbagħad aħna li nkunu ħajjin, li nkunu għadna hawn, ninħatfu magħhom fis-sħab biex niltaqgħu mal-Mulej fl-ajru. Hekk inkunu dejjem mal-Mulej.
Agħmlu l-qalb lil xulxin b’dan il-kliem.
Il-Kelma tal-Mulej. Irroddu ħajr lil Alla.
AKKLAMAZZJONI QABEL L-EVANĠELJU
Hallelujah. Hallelujah. (Ġw 24:42a.44)
Ishru, mela, u kunu lesti, għax qatt ma tistgħu tobsru s-siegħa li fiha jiġi Bin il-bniedem.
Hallelujah!
L-EVANĠELJU
Qari mill-Evanġelju skond San Mattew (25:1-13)
F’dak iż-żmien, Ġesù qal lid-dixxipli tiegħu din il-parabbola: «Is-Saltna tas-Smewwiet ixebbhuha ma’ għaxar xebbiet li ħarġu bl-imsiebaħ tagħhom biex jilqgħu l-għarus. Ħamsa minnhom kienu boloh u ħamsa għaqlin, għax il-boloh ħadu l-imsiebaħ imma ma ħadux żejt magħhom, waqt li l-għaqlin ħadu mhux biss l-imsiebaħ iżda wkoll iż-żejt fil-kwies. L-għarus iddawwar ma ġie, u għalhekk ilkoll ħadhom in-ngħas u raqdu. Imbagħad f’nofs ta’ lejl instama’ min jgħajjat: “Ara l-għarus! Oħorġu ilqgħuh!” Dawk ix-xebbiet qamu lkoll u ħejjew l-imsiebaħ tagħhom. Iżda l-boloh qalu lill-għaqlin: “Agħtuna ftit żejt minn tagħkom, għax l-imsiebaħ tagħna jintfew.” Qabżu l-għaqlin u qalu: “Għandu mnejn ma jibqax biżżejjed, la għalina u lanqas għalikom! L-aħjar morru għand tal-ħanut u ixtru għalikom.” Xħin dawk marru biex jixtru jiġi l-għarus; dawk li kienu lesti daħlu miegħu għall-festa tat-tieġ, u l-bieb ingħalaq. Saflaħħar waslu wkoll ix-xebbiet l-oħra, u bdew jgħidu: “Sinjur, Sinjur, iftħilna!” Iżda hu weġibhom u qal: “Tassew, ngħidilkom, lilkom ma nafkomx.”
Ishru, mela, għaliex la tafu l-jum u lanqas is-siegħa.»
Il-Kelma tal-Mulej. Tifħir lilek Kristu.
IFHEM IL-KELMA - Kummenti dwar il-qari
- VIDEO -
KUN MOĦĦOK HEMM!
- AUDIO -
GĦIX IL-KELMA - Il-Kalendarju Liturġiku tal-ġimgħa
Ir-raba’ ġimgħa tas-Salterju
■ It-Tnejn 13 ta’ Novembru: Ferja. Qari: Għerf 1:1-7; Salm 138:1-3.4-6.7-8.9-10; Luqa 17:1-6.
■ It-Tlieta 14 ta’ Novembru: Ferja. Qari: Għerf 2:23 – 3:9; Salm 33:2-3.16-17,18-19; Luqa 17:7-10.
■ L-Erbgħa 15 ta’ Novembru: Ferja / San Albertu l-Kbir, isqof u duttur tal-Knisja (T). Qari: Għerf 6:1-11; Salm 81:3-4.6-7; Luqa 17:11-19.
■ Il-Ħamis 16 ta’ Novembru: Ferja / Santa Margerita tal-Iskozja (T) / Santa Ġertrude, verġni (T). Qari: Għerf 7:22 – 8:1; Salm 118:89.90.91.130.135.175; Luqa 17:20-25.
■ Il-Ġimgħa 17 ta’ Novembru: Santa Eliżabetta tal-Ungerija (TO). Qari: Għerf 13:1-9; Salm 18:2-3.4-5; Luqa 17:26-37.
■ Is-Sibt 18 ta’ Novembru: Ferja / Id-dedikazzjoni tal-Bażilki ta’ San Pietru u San Pawl, appostli (T) / L-Imqaddsa Verġni Marija f’Jum is-Sibt (T). Qari: Għerf 18:14-16; 19:6-9; Salm 104:2-3.36-37.42-43; Luqa 18:1-8. Jekk issir it-tifkira tad-Dedikazzjoni: Qari: Atti 28:11-16.30-31; Salm 97:1-6; Mattew 14:22-23.
TO = Tifkira Obbligatorja; T = Tifkira.
Il-kulur ħdejn id-data jindika l-kulur liturġiku tal-ġurnata.