It-3 Ħadd tal-Avvent - Sena B
AQRA L-KELMA - Il-liturġija tal-Kelma
L-EWWEL QARI
Qari mill-Ktieb tal-Profeta Isaija (61:1-2a.10-11)
L-ispirtu ta’ Sidi l-Mulej fuqi, għax il-Mulej ikkonsagrani, biex inwassal il-bxara t-tajba lill-fqajrin, bagħatni ndewwi l-qalb miksura; biex inħabbar il-ħelsien lill-imjassrin, u lill-ħabsin il-ftuħ tal-ħabs; biex inniedi s-sena tal-grazzja tal-Mulej.
Nifraħ fuq li nifraħ bil-Mulej, taqbeż bil-ferħ ruħi b’Alla tiegħi. Għax hu libbisni bi lbies is-salvazzjoni, bil-mantar tal-ġustizzja għattieni, bħal għarus imżejjen b’kuruna, bħal għarusa tlellex bil-ġawhar tagħha. Bħalma l-art tnibbet, bħalma l-ġnien inibbet il-miżrugħ fih, hekk il-Mulej inibbet il-ġustizzja u l-foħrija, quddiem kollha kemm huma l-ġnus.
Il-Kelma tal-Mulej. Irroddu ħajr lil Alla.
SALM RESPONSORJALI (Lq 1:46-50.53-54)
R/.: Taqbeż bil-ferħ ruħi b’Alla tiegħi!
Ruħi tfaħħar il-kobor tal-Mulej,
u l-ispirtu tiegħi jifraħ
f’Alla s-Salvatur tiegħi,
għax hu xeħet għajnejh
fuq iċ-ċokon tal-qaddejja tiegħu.
Iva, minn issa ’l quddiem
kull nisel isejjaħli hienja. R/.
Għax is-Setgħani għamel miegħi ħwejjeġ kbar;
qaddis hu l-isem tiegħu.
Il-ħniena tiegħu
tinfirex f’kull żmien
fuq dawk li jibżgħu minnu. R/.
Mela b’kull ġid lil min hu bil-ġuħ,
u l-għonja bagħathom
’il barra b’xejn.
Ħa ħsieb Israel qaddej tiegħu,
għax ftakar fil-ħniena tiegħu. R/.
IT-TIENI QARI
Qari mill-Ewwel Ittra ta’ San Pawl Appostlu lit-Tessalonkin (5:16-24)
Ħuti, ifirħu dejjem, itolbu bla heda, iżżu ħajr lil Alla f’kollox. Dan hu li jrid Alla mingħandkom fi Kristu Ġesù.
Ixxekklux l-Ispirtu, tmaqdrux il-profezija. Ippruvaw kollox: it-tajjeb żommuh, u fuq kollox, warrbu kull xorta ta’ ħażen.
U Alla tas-sliem iqaddiskom f’kollox, u jżommkom sħaħ bla mittiefsa fl-ispirtu, fir-ruħ u fil-ġisem, sa ma jiġi Sidna Ġesù Kristu. Fidil hu Alla li sejħilkom, u huwa jagħmel dan.
Il-Kelma tal-Mulej. Irroddu ħajr lil Alla.
AKKLAMAZZJONI QABEL L-EVANĠELJU (ara Lq 3:4-6)
Hallelujah. Hallelujah.
L-Ispirtu ta’ Sidi l-Mulej fuqi: biex inwassal il-bxara t-tajba lill-fqajrin.
Hallelujah!
L-EVANĠELJU
Qari mill-Evanġelju skont San Ġwann (1: 6-8.19-28)
Kien hemm raġel mibgħut minn Alla, jismu Ġwanni. Dan ġie bħala xhud, biex jixhed għad-dawl, biex bih kulħadd jemmen. Ġwanni ma kienx id-dawl, imma ġie biex jixhed għad-dawl.
Ix-xhieda ta’ Ġwanni kienet din, meta l-Lhud ta’ Ġerusalemm bagħtu għandu xi qassisin u Leviti biex jistaqsuh: «Int min int?» Hu stqarr bla ma ċaħad: «Jien m’iniex il-Messija.» Huma reġgħu staqsewh: «Mela min int? Elija?» «M’iniex,» qalilhom. «Int il-Profeta?» «Le,» weġibhom. Imbagħad qalulu: «Mela min int? Biex nagħtu tweġiba lil dawk li bagħtuna. Min tgħid li int?» U hu wieġeb kif qal il-profeta Isaija: «Jiena l-leħen ta’ wieħed jgħajjat fid-deżert: Wittu t-triq tal-Mulej.»
Issa dawk il-messaġġiera kienu min-naħa tal-Fariżej. Huma staqsewh: «Mela kif qiegħed tgħammed la m’intix il-Messija, u la Elija u lanqas il-Profeta?» «Jiena ngħammed bl-ilma,» weġibhom Ġwanni, «imma f’nofskom hemm wieħed li intom ma tafuhx, u li ġej warajja; jien anqas ma jistħoqqli nħoll il-qafla tal-qorq tiegħu.»
Dan ġara f’Betanja, in-naħa l-oħra tal-Ġordan, fejn Ġwanni kien jgħammed.
Il-Kelma tal-Mulej. Tifħir lilek Kristu.
IFHEM IL-KELMA - Kummenti dwar il-qari
- AUDIO -
GĦIX IL-KELMA - Il-Kalendarju Liturġiku tal-ġimgħa
It-tielet ġimgħa tas-Salterju
■ It-Tnejn 18 ta’ Diċembru: Ferja tal-Avvent privileġġjata. Qari: Ġeremija 23:5-8; Salm 71:2.12-13.18-19; Hallelujah: “O Mexxej tad-dar ta’ Israel”; Mattew 1:18-24.
■ It-Tlieta 19 ta’ Diċembru: Ferja tal-Avvent privileġġjata. Qari: Mħallfin 13:2-7.24-25a; Salm 70:3-4a.5-6ab.16-17; Hallelujah: “O Għerq ta’ Ġesse”; Luqa 1:5-25.
■ L-Erbgħa 20 ta’ Diċembru: Ferja tal-Avvent privileġġjata. Qari: Isaija 7:10-14; Salm 23:1-2.3-4ab.5-6; Hallelujah: “O Muftieħ ta’ David”; Luqa 1:26-38.
■ Il-Ħamis 21 ta’ Diċembru: Ferja tal-Avvent privileġġjata / San Pietru Kanisju, presbiteru u duttur tal-Knisja (TL). Qari: Għanja tal-Għanjiet 2:8-14; jew Sofonija 3:14-18a; Salm 32:2-3.11-12.20-21; Hallelujah: ”O Xemx tielgħa”; Luqa 1:39-45.
■ Il-Ġimgħa 22 ta’ Diċembru: Ferja tal-Avvent privileġġjata. Qari: 1 Samwel 1:24-28; Salm 1 Samwel 2:1.4-5.6-7.8abċd; Hallelujah: “O sultan tal-ġnus”; Luqa 1:46-55.
■ Is-Sibt 23 ta’ Diċembru: Ferja tal-Avvent privileġġjata / San Ġwann de Kety, presbiteru (TL). Qari: Malakija 3:1-4.23-24; Salm 24:4bċ-5ab.8-9.10 u 14; Hallelujah: “O Għimanu-El”; Luqa 1:57-66.
TL = Tifkira Limitata
Il-kulur ħdejn id-data jindika l-kulur liturġiku tal-ġurnata.