IT-28 ĦADD TA’ MATUL IS-SENA B
AQRA L-KELMA - Il-liturġija tal-Kelma
L-Ewwel Qari
Qari mill-Ktieb tal-Għerf (7:7-11)
Jien tlabt u qlajt l-għaqal; sejjaħt, u ġie fuqi l-ispirtu tal-għerf. Dan l-għerf qistu aqwa minn kull xettru u tron, u ntbaħt li l-għana mhu xejn ħdejh. Ma xebbahtx miegħu l-ħaġra l-aktar prezzjuża, għax id-deheb kollu ħdejh mhuwiex ħlief ftit ramel, u l-fidda quddiemu qisha ftit tajn.
Aktar mis-saħħa u s-sbuħija ħabbejtu, u għoġobni aktar mid-dawl; għax id-dija tiegħu ma tgħib qatt. Mal-għerf ġieni l-ġid kollu, u miegħu ġiebli għana bla qjies.
Il-Kelma tal-Mulej. Irroddu ħajr lil Alla.
SALM RESPONSORJALI (Salm 89)
R/. Imliena bit-tjieba tiegħek, Mulej!
Għallimna ngħoddu jiem ħajjitna,
sabiex aħna nimxu bil-għaqal.
Dur lejna, Mulej! Kemm sa ddum?
Ħenn għall-qaddejja tiegħek. R/.
Imliena kmieni bit-tjieba tiegħek,
biex nifirħu u nithennew
ħajjitna kollha.
Ferraħna daqskemm għakkistna,
għas-snin li fihom rajna l-ħsara. R/.
Ħa jidher għemilek quddiem
il-qaddejja tiegħek,
u l-kobor tiegħek quddiem uliedhom.
Ħa tkun fuqna l-grazzja ta’ Alla Sidna!
Wettqilna inti x-xogħol ta’ jdejna,
wettaq, iva, xogħol idejna. R/.
IT-TIENI QARI
Qari mill-Ittra lil-Lhud (4:12-13)
Ħuti, il-kelma ta’ Alla hi ħajja u qawwija, taqta’ aktar minn xabla b’żewġt ixfar; hija tinfed sa tifred minn xulxin ir-ruħ u l-ispirtu u l-ġogi u l-mudullun; u tgħarbel il-ħsibijiet u l-fehmiet tal-qalb.
Xejn ma hemm fil-ħolqien li hu moħbi għalih, imma kollox hu miftuħ għal għajnejn Alla, li lilu rridu nagħtu kont.
Il-Kelma tal-Mulej. Irroddu ħajr lil Alla.
AKKLAMAZZJONI QABEL L-EVANĠELJU (Mt 5:3)
Hallelujah. Hallelujah.
Henjin il-foqra fl-ispirtu, għax tagħhom hija s-Saltna tas-Smewwiet.
Hallelujah!
L-EVANĠELJU
Qari mill-Evanġelju skont San Mark (10:17-30)
(Is-silta bejn qawsejn tista’ ma tinqarax)
F’dak iż-żmien, Ġesù kien sa jaqbad it-triq lejn Ġerusalemm, meta mar fuqu wieħed jgħaġġel, niżel għarkupptejh quddiemu u qallu: «Mgħallem tajjeb, x’għandi nagħmel biex nikseb il-ħajja ta’ dejjem?» Qallu Ġesù: «Għaliex qiegħed issejjaħli tajjeb? Ħadd mhu tajjeb ħlief Alla biss. Inti l-kmandamenti tafhom: la toqtolx, la tiżnix, la tisraqx, la tixhidx fil-falz, la tiħux bil-qerq dak li hu ta’ ħaddieħor; weġġaħ lil missierek u ’l ommok.»
U dak wieġbu u qallu: «Mgħallem, jiena dan kollu ili nħarsu minn żgħożiti.» Imbagħad Ġesù xeħet fuqu ħarsa ta’ mħabba u qallu: «Ħaġa waħda tonqsok: mur bigħ li għandek, agħtih lill-fqar, u jkollok teżor fis-sema; imbagħad ejja u imxi warajja.» Imma għal dan il-kliem ir-raġel qarras wiċċu u telaq b’qalbu sewda, għaliex kellu bosta ġid.
Ġesù mbagħad ħares ħarsa madwaru u qal lid-dixxipli tiegħu: «Kemm hi iebsa għall-għonja li jidħlu fis-Saltna ta’ Alla!» Id-dixxipli stagħġbu għal din il-kelma, imma Ġesù raġa’ qalilhom: «Kemm hi iebsa, uliedi, li wieħed jidħol fis-Saltna ta’ Alla! Eħfef li ġemel jgħaddi minn għajn ta’ labra milli wieħed għani jidħol fis-Saltna ta’ Alla.» Huma stagħġbu wisq aktar, u bdew jgħidu wieħed lil ieħor: «Mela min jista’ jsalva?» Ġesù ħares lejhom u qalilhom: «Għall-bnedmin dan ma jistax ikun, imma għal Alla iva; għax għal Alla kollox jista’ jkun.»
(Qabeż Pietru u qallu: «Tajjeb! Aħna ħallejna kollox u ġejna warajk.» Qallu Ġesù: «Tassew ngħidilkom, li fost dawk kollha li minħabba fija u l-Evanġelju jħallu lil darhom jew lil ħuthom jew lil ommhom jew lil missierhom jew lil uliedhom jew l-għelieqi tagħhom, ma hemm ħadd fosthom li minn issa, f’din id-dinja stess, ma jirċevix, għal mitt darba iktar, djar, aħwa, subien u bniet, ommijiet, ulied u għelieqi flimkien ma’ persekuzzjonijiet, u l-ħajja ta’ dejjem fiż-żmien li ġej.»)
Il-Kelma tal-Mulej. Tifħir lilek Kristu.
IFHEM IL-KELMA - Kummenti dwar il-qari
- AUDIO -
GĦIX IL-KELMA - Il-Kalendarju Liturġiku tal-ġimgħa
Ir-raba’ ġimgħa tas-Salterju
■ It-Tnejn 14 ta’ Ottubru: Ferja / San Kallistu, papa u martri (T). Qari: Galatin 4:22-24.26-27.31 – 5:1; Salm 112:1-7; Luqa 11:29-32.
■ It-Tlieta 15 ta’ Ottubru: Santa Tereża ta’ Ġesù, verġni u duttur tal-Knisja (TO). Qari: Galatin 5:1-6; Salm 118:41.43-45.47-48; Luqa 11:37-41.
■ L-Erbgħa 16 ta’ Ottubru: Ferja / Santa Edwiġe, reliġjuża (T) / Santa Margerita Marija Alacoque, verġni (T). Qari: Galatin 5:18-25; Salm 1:1-4.6; Luqa 11:42-46.
■ Il-Ħamis 17 ta’ Ottubru: San Injazju ta’ Antjokja, isqof u martri (TO). Qari: Efesin 1:1-10; Salm 97:1-6; Luqa 11:47-54.
■ Il-Ġimgħa 18 ta’ Ottubru: San Luqa, evanġelista (F). Qari: 2 Timotju 4:10-17; Salm 144:10-13.17-18; Luqa 10:1-9.
■ Is-Sibt 19 ta’ Ottubru: Ferja / L-Imqaddsa Marija Verġni f’jum is-Sibt (T) / San Ġwann de Brébeuf u San Iżakk Jogues, presbiteri u sħabhom, martri (T) / San Pawl tas-Salib, presbiteru (T). Qari: Efesin 1:15-23; Salm 8:2-7; Luqa 12:8-12.
F = Festa; TO = Tifkira Obbligatorja; T= Tifkira.
Il-kulur ħdejn id-data jindika l-kulur liturġiku tal-ġurnata.