It-23 Ħadd ta' matul is-sena - Sena A
AQRA L-KELMA - Il-liturġija tal-Kelma
L-EWWEL QARI
Qari mill-Ktieb tal-Profeta Eżekje (33:7-9)
Dan jgħid il-Mulej: «Lilek, o bniedem, qegħedtek għassies ta’ dar Israel. Meta tisma’ minn fommi xi kelma, għandek twiddibhom f’ismi.
Jekk jien ngħid lill-midneb: “Int tmut żgur,” u int ma tkellmux u ma twiddbux biex jitlaq triqtu, hu, il-midneb, imut fi ħżunitu, imma demmu nfittxu minn idejk.
Imma jekk inti twiddeb il-midneb dwar triqtu biex jerġa’ lura minnha u ma jerġax, hu jmut fi dnubu, imma int tkun salvajt ħajtek.»
Il-Kelma tal-Mulej. Irroddu ħajr lil Alla.
SALM RESPONSORJALI (Salm 94)
Rit: Isimgħu leħen il-Mulej u la twebbsux qalbkom!
Ejjew, ħa nfaħħru bl-hena l-Mulej, ħa ngħajtu bil-ferħ
lill-blata tas-salvazzjoni tagħna!
Nersqu quddiemu b’għana ta’ radd il-ħajr,
ngħannulu b’għajjat ta’ ferħ. Rit…
Ejjew inqimuh u ninxteħtu quddiemu,
għarkopptejna quddiem
il-Mulej li ħalaqna!
Għaliex hu Alla tagħna,
u aħna l-poplu tal-mergħa tiegħu
u n-nagħaġ tiegħu. Rit…
Mhux li kontu illum tisimgħu leħnu!
«La twebbsux qalbkom bħal f’Meriba,
bħal dakinhar f’Massa, fid-deżert,
meta ġarrbuni u ttantawni missirijietkom,
għalkemm raw dak li jien għamilt.» Rit…
IT-TIENI QARI
Qari mill-Ittra ta’ San Pawl Appostlu lir-Rumani (13:8-10)
Ħuti, tkunu obbligati lejn ħadd ħlief li tħobbu lil xulxin. Kull min iħobb ikun iħares il-bqija tal-Liġi.
Għax il-kmandamenti: «La tagħmilx adulterju, la toqtolx, la tisraqx, la tkunx rgħib,» u kull preċett ieħor, hu liema hu, kollha jinġabru f’kelma waħda: «Ħobb il-proxxmu tiegħek bħalek innifsek.»
L-imħabba ma tagħmilx deni lill-proxxmu; mela l-imħabba hi l-milja tal-Liġi.
Il-Kelma tal-Mulej. Irroddu ħajr lil Alla.
AKKLAMAZZJONI QABEL L-EVANĠELJU
Hallelujah. Hallelujah. (2 Kor 5:19)
Alla kien li ħabbeb il-ħolqien miegħu nnifsu permezz ta’ Kristu, u fdalna l-ministeru ta’ din il-ħbiberija.
Hallelujah!
L-EVANĠELJU
Qari mill-Evanġelju skond San Mattew (16:21-27)
F’dak iż-żmien, Ġesù qal lid-dixxipli tiegħu: «Jekk ħuk jaqa’ f’xi dnub, mur sibu waħdu u widdbu. Jekk jisma’ minnek, tkun irbaħt lura lil ħuk. Jekk ma jismax, erġa’ mur u ħu miegħek wieħed jew tnejn oħra, biex kull ma jingħad jissaħħaħ bil-kelma ta’ żewġ xhieda jew tlieta. Jekk imbagħad anqas minnhom ma jkun irid jisma’, mur għid lill-knisja. U jekk anqas mill-knisja ma jkun irid jisma’ żommu b’wieħed pagan jew pubblikan.
Tassew ngħidilkom, li kulma torbtu fuq l-art ikun marbut fis-sema, u kulma tħollu fuq l-art ikun maħlul fis-sema.
Ngħidilkom ukoll li jekk tnejn minnkom fuq l-art jgħollu leħinhom flimkien biex jitolbu xi ħaġa, Missieri li hu fis-smewwiet, jagħtihielhom. Għax fejn tnejn jew tlieta jkunu miġbura f’ismi hemm inkun jien f’nofshom.»
Il-Kelma tal-Mulej. Tifħir lilek Kristu.
IFHEM IL-KELMA - Kummenti dwar il-qari
- AUDIO -
GĦIX IL-KELMA - Il-Kalendarju Liturġiku tal-ġimgħa
It-tielet ġimgħa tas-Salterju
■ It-Tnejn 11 ta’ Settembru: Ferja. Qari: Kolossin 1:24 – 2:3; Salm 61:6-7.9; Luqa 6:6-11.
■ It-Tlieta 12 ta’ Settembru: Ferja / L-Isem tal-Imqaddsa Verġni Marija (T). Qari: Kolossin 2:6-15; Salm 144:1-2.8-9.10-11; Luqa 6:12-19.
■ L-Erbgħa 13 ta’ Settembru: San Ġwann Krisostmu, isqof u duttur tal-Knisja (TO). Qari: Kolossin 3:1-11; Salm 144:2-3.10-11.12-13ab; Luqa 6:20-26.
■ Il-Ħamis 14 ta’ Settembru: L-Eżaltazzjoni tas-Salib Imqaddes (F). Qari: Numri 21:4b-9; jew Filippin 2:6-11; Salm 77:1-2.34-38; Ġwanni 3:13-17.
■ Il-Ġimgħa 15 ta’ Settembru: Il-Verġni Mqaddsa Marija tad-Duluri (TO). Qari: Lhud 5:7-9; Salm 30:2-6.15-16.20; Ġwanni 19:25-27; jew Luqa 2:33-35.
■ Is-Sibt 16 ta’ Settembru: Arċidjoċesi ta’ Malta San Kornelju, papa u San Ċiprijanu, isqof, martri (TO). Qari: 1 Timotju 1:15-17; Salm 112:1-2.3-4.5a u 6-7; Luqa 6:43-49.
■ Djoċesi ta’ Għawdex L-anniversarju mit-twaqqif tad-Djoċesi (1864) (F). Qari: Isaija 63:7-9; Salm 144:1-11; Luqa 1:39-55.
F = Festa; TO = Tifkira Obbligatorja; T = Tifkira.
Il-kulur ħdejn id-data jindika l-kulur liturġiku tal-ġurnata.