It-22 Ħadd ta' matul is-sena - Sena A
AQRA L-KELMA - Il-liturġija tal-Kelma
L-EWWEL QARI
Qari mill-Ktieb tal-Profeta Ġeremija (20: 7-9)
Qarraqtni Mulej, u jien tqarraqt: kont aqwa minni, u għelibtni. Jien sirt id-daħka ta’ kuljum, kulħadd jiddieħak bija. Kull meta niġi nitkellem, jien ngħajjat, u nxandar, «Moħqrija u ħsara!» Il-kelma tal-Mulej saret għalija tagħjir u tmaqdir kuljum. U jien għidt: «Ma nsemmihx aktar, ma nitkellimx aktar f’ismu.» Iżda f’qalbi hemm bħal nar jaqbad, magħluq f’għadmi. Għejejt inżommu magħluq ġo fija, ma niflaħx aktar għalih.
Il-Kelma tal-Mulej. Irroddu ħajr lil Alla.
SALM RESPONSORJALI (Salm 62)
Rit: Għalik imxennaq jiena, Mulej, Alla tiegħi!
Alla, Alla tiegħi int; lilek ħerqan infittex.
Ruħi bil-għatx għalik, għalik imxennaq jiena,
bħal art niexfa, maħruqa, bla ilma. Rit…
Għalhekk ġejt narak fit-tempju mqaddes tiegħek,
biex nitgħaxxaq bis-setgħa u l-glorja tiegħek.
Għax it-tjieba tiegħek aħjar mill-ħajja,
xufftejja jxandru t-tifħir tiegħek. Rit…
Għalhekk inbierkek tul ħajti kollha;
ngħolli jdejja u nsejjaħ ismek.
Bħal b’ikel mill-aħjar li jsemmen nimtela,
u jgħannilek fommi b’xufftejn ferrieħa. Rit…
Għax int kont għajnuna għalija,
għad-dell ta’ ġwenħajk ngħanni bil-ferħ.
Miegħek tingħaqad ruħi, int tweżinni
bil-leminija tiegħek. Rit…
IT-TIENI QARI
Qari mill-Ittra ta’ San Pawl Appostlu lir-Rumani (12:1-2)
Nitlobkom ħuti, għall-ħniena ta’ Alla, offru ġisimkom b’sagrifiċċju ħaj, qaddis, jogħġob lil Alla, jiġifieri l-qima spiritwali tagħkom. Timxux max-xejra ta’ din id-dinja, iżda nbidlu skont it-tiġdid ta’ fehmietkom, biex iseħħilkom tagħrfu x’inhi r-rieda ta’ Alla, x’inhu t-tajjeb li jogħġbu, x’inhu perfett.
Il-Kelma tal-Mulej. Irroddu ħajr lil Alla.
AKKLAMAZZJONI QABEL L-EVANĠELJU
Hallelujah. Hallelujah. (Efes 1:17-18)
Alla ta’ Sidna Ġesù Kristu, jagħtikom spirtu ta’ għerf, biex tagħrfu x’inhi t-tama tas-sejħa tagħkom.
Hallelujah!
L-EVANĠELJU
Qari mill-Evanġelju skond San Mattew (16:21-27)
F’dak iż-żmien, Ġesù beda juri lid-dixxipli tiegħu li kien meħtieġ għalih li jmur Ġerusalemm, isofri ħafna mix-xjuħ u l-qassisin il-kbar u l-kittieba, joqtluh, u fit-tielet jum iqum. Pietru ġibdu lejh u beda jlumu u jgħidlu: «Allaħares, Mulej! Ma jkun qatt li dan jgħaddi minn għalik!» Iżda Ġesù dar u qal lil Pietru: «Itlaq minn quddiemi, ja xitan! Int tfixkil għalija, għax m’intix tqis il-ħwejjeġ ta’ Alla, imma qiegħed taħsibha ta’ bniedem li int!» Imbagħad qal lid-dixxipli tiegħu: «Jekk xi ħadd irid jiġi warajja, għandu jiċħad lilu nnifsu, jerfa’ salibu, u jimxi warajja. Għax min irid isalva ħajtu, jitlifha, imma min jitlef ħajtu għall-imħabba tiegħi, isibha. Għax xi jkun jiswielu l-bniedem jekk jikseb id-dinja kollha u mbagħad jitlef ħajtu? Jew xi prezz sa jagħti l-bniedem biex isalva ħajtu? Għax Bin il-bniedem għandu jiġi fil-glorja ta’ Missieru flimkien mal-anġli tiegħu, u mbagħad irodd lil kull wieħed skont ma wieħed ikun għamel.»
Il-Kelma tal-Mulej. Tifħir lilek Kristu.
IFHEM IL-KELMA - Kummenti dwar il-qari
- AUDIO -
GĦIX IL-KELMA - Il-Kalendarju Liturġiku tal-ġimgħa
It-tieni ġimgħa tas-Salterju
■ It-Tnejn 4 ta’ Settembru: Ferja. Qari: 1 Tessalonkin 4:13-18; Salm 95:1 u 3.4-5.11-12.13; Luqa 4:16-30.
■ It-Tlieta 5 ta’ Settembru: Ferja / Santa Tereża ta’ Calcutta, verġni (T). Qari: 1 Tessalonkin 5:1-6.9-11; Salm 26:1.4.13-14; Luqa 4:31-37.
■ L-Erbgħa 6 ta’ Settembru: Ferja. Qari: Kolossin 1:1-8; Salm 51:10.11; Luqa 4:38-44.
■ Il-Ħamis 7 ta’ Settembru: Ferja. Qari: Kolossin 1:9-14; Salm 97:2-3ab.3ċd-4.5-6; Luqa 5:1-11.
■ Il-Ġimgħa 8 ta’ Settembru: It-Twelid tal-Imqaddsa Verġni Marija (S). Qari: Mikea 5:1-4a; Salm 12:6; Rumani 8:28-30; Mattew 1:1-14.18-23.
■ Is-Sibt 9 ta’ Settembru: Ferja / San Pietru Claver, presbiteru (T) L-Imqaddsa Verġni Marija f’Jum is-Sibt (T). Qari: Kolossin 1:21-23; Salm 53:3-4.6 u 8; Luqa 6:1-5.
S = Solennità; T = Tifkira.
Il-kulur ħdejn id-data jindika l-kulur liturġiku tal-ġurnata.