It-2 Ħadd ta' matul is-sena - Sena A
AQRA L-KELMA - Il-liturġija tal-Kelma
L-EWWEL QARI
Qari mill-Ktieb tal-Profeta Isaija (49:3.5-6)
Il-Mulej qalli: «Israel, inti l-qaddej tiegħi, bik jiena nkun imfaħħar.»
Issa tkellem il-Mulej, li minn ġuf ommi għamilni qaddej tiegħu, biex għandu rraġġa’ lura lil Ġakobb, u biex Israel jinġabar miegħu mill-ġdid – għax jien kont imfaħħar f’għajnejn il-Mulej, u Alla tiegħi kien il-qawwa tiegħi – u hu qalli: «Tkun ħaġa żgħira wisq għalik, li inti tkun il-qaddej tiegħi, biex tqajjem it-tribù ta’ Ġakobb, u traġġa’ lura l-fdal ta’ Israel. Jien nagħmel minnek dawl għall-ġnus, biex is-salvazzjoni tiegħi sa truf l-art tinfirex.»
Il-Kelma tal-Mulej. Irroddu ħajr lil Alla.
SALM RESPONSORJALI (Salm 39)
Rit: Hawn jien, Mulej, ġej nagħmel ir-rieda tiegħek!
Ittamajt b’tama qawwija fil-Mulej;
hu niżel ħdejja u sama’ l-għajta tiegħi.
Qegħedli fuq fommi għanja ġdida,
għanja ta’ tifħir lil Alla tagħna. Rit…
Int ma titgħaxxaqx b’sagrifiċċji u b’offerti;
imma widnejja inti ftaħtli;
ma tlabtnix vittmi tal-ħruq u tat-tpattija.
Imbagħad jien għedt: «Hawn jien, ġej.» Rit…
«Fil-bidu tal-ktieb hemm miktub fuqi
li nagħmel ir-rieda tiegħek.
Alla tiegħi, dan jogħġobni;
il-liġi tiegħek ġewwa qalbi.» Rit…
Xandart il-ġustizzja f’ġemgħa kbira;
xufftejja ma żammejthomx magħluqa.
Mulej, dan inti tafu. Rit…
IT-TIENI QARI
Bidu tal-Ewwel Ittra ta’ San Pawl Appostlu lill-Korintin (1:1-3)
Pawlu, li Alla ried isejjaħlu biex ikun appostlu ta’ Kristu Ġesù, u Sòsteni ħuna, lill-knisja ta’ Alla li qiegħda f’Korintu; lil dawk li tqaddsu fi Kristu Ġesù, imsejħa biex ikunu qaddisin flimkien ma’ dawk kollha li f’kull pajjiż isejħu l-isem ta’ Ġesù Kristu, is-Sid tagħhom u tagħna; grazzja u sliem mingħand Alla missierna u l-Mulej Ġesù Kristu.
Il-Kelma tal-Mulej. Irroddu ħajr lil Alla.
AKKLAMAZZJONI QABEL L-EVANĠELJU
Hallelujah. Hallelujah. (Ġw 1:14a.12a)
Il-Verb sar bniedem u għammar fostna, u lil dawk li laqgħuh tahom is-setgħa li jsiru wlied Alla.
Hallelujah!
L-EVANĠELJU
Qari mill-Evanġelju skont San Ġwann (1:29-34)
F’dak iż-żmien, Ġwanni, ra lil Ġesù riesaq lejh, u qal: «Araw il-Ħaruf ta’ Alla, li jneħħi d-dnub tad-dinja. Dan hu li għalih għedtilkom: “Warajja ġej bniedem li hu aqwa minni, għax kien qabli.” Anqas jien stess ma kont nafu, imma jien għalhekk ġejt ngħammed bl-ilma, biex hu jkun mgħarraf lil Israel.»
U Ġwanni xehed għalih u qal: «Jiena rajt l-Ispirtu nieżel mis-sema bħal ħamiema u joqgħod fuqu. Tabilħaqq, anqas jien ma kont nafu; imma dak li bagħatni ngħammed bl-ilma, hu stess qalli: “Fuq min tara l-Ispirtu jinżel u joqgħod, dak hu li jgħammed bl-Ispirtu s-Santu.” Dan rajtu b’għajnejja, u għalhekk xhedt, dan hu l-Iben ta’ Alla.»
Il-Kelma tal-Mulej. Tifħir lilek Kristu.
IFHEM IL-KELMA - Kummenti dwar il-qari
- VIDEO -
Fr Elija Vella OFMConv.
- AUDIO -
- AUDIO -
GĦIX IL-KELMA - Il-Kalendarju Liturġiku tal-ġimgħa
It-tieni ġimgħa tas-salterju
■ It-Tnejn 16 ta’ Jannar: Ferja. Qari: Lhud 5:1-10; Salm109:1.2.3.4; Mark 2:18-22.
■ It-Tlieta 17 ta’ Jannar: Sant’Anton, abbati (TO). Qari: Lhud 6:10-20; Salm 110:1-2.4-5.9 u 10ċ; Mark 2:23-28.
■ L-Erbgħa 18 ta’ Jannar: Ferja. Qari: Lhud 7:1-3.15-17; Salm 109:1.2.3.4; Mark 3:1-6.
■ Il-Ħamis 19 ta’ Jannar: Ferja. Qari: Lhud 7:25 – 8, 6; Salm 39:7-8a.8b-9.10.17; Mark 3:7-12.
■ Il-Ġimgħa 20 ta’ Jannar: Ferja / San Fabjan, papa u martri (T) / San Sebastjan, martri (T). Qari: Lhud 8:6-13; Salm 84:8 u 10.11-12.13-14; Mark 3:13-19.
■ Is-Sibt 21 ta’ Jannar: Sant’Anjeże, verġni u martri (TO). Qari: Lhud 9:2-3.11-14; Salm 46:2-3.6-7.8-9; Mark 3:20-21.
TO = Tifkira Obbligatorja; T = Tifkira.
Il-kulur ħdejn id-data jindika l-kulur liturġiku tal-ġurnata.