It-2 Ħadd tal-Avvent - Sena B
AQRA L-KELMA - Il-liturġija tal-Kelma
L-EWWEL QARI
Qari mill-Ktieb tal-Profeta Isaija (40:1-5.9-11)
«Farrġu, farrġu l-poplu tiegħi - jgħid Alla tagħkom. Kellmu lil qalb Ġerusalemm u għidulha li ntemm il-jasar tagħha, tħallset ħżunitha, ħadet mingħand il-Mulej darbtejn għal dnubietha kollha.»
Leħen jgħajjat: «Ħejju t-triq għall-Mulej fid-deżert, wittu għal Alla tagħna mogħdija fix-xagħri. Jintradam kull wied, u jitniżżlu l-muntanji u l-għoljiet; kull art imħattba titwitta, kull art imħarbta ssir maqgħad. U tfiġġ il-glorja tal-Mulej, u l-bnedmin jarawha lkoll f’daqqa, għax fomm il-Mulej tkellem.»
Itla’ fuq il-muntanja għolja, int li ġġib il-bxara t-tajba lil Sijon; għolli leħnek bil-qawwa kollha, int li tagħti l-aħbar it-tajba lil Ġerusalemm; għajjat, la tibżax.
Għid lill-ibliet ta’ Ġuda: «Hawn hu Alla tagħkom! Hawn hu Sidi l-Mulej, li ġej bil-qawwa, u jaħkem bil-qawwa ta’ driegħu. Hawn hu bi ħlasu miegħu, u r-rebħa tiegħu quddiemu. Bħal ragħaj li jirgħa l-merħla tiegħu; bi driegħu jiġmagħha, u l-ħrief fi ħdanu jerfagħhom; u n-nagħaġ ireddgħu bil-mod imexxihom.»
Il-Kelma tal-Mulej. Irroddu ħajr lil Alla.
SALM RESPONSORJALI (Salm 84)
R/.: Uri lilna, Mulej, it-tjieba tiegħek, u s-salvazzjoni tiegħek agħtina!
Ħa nisma’ xi jgħid Alla;
il-Mulej is-sliem ixandar,
għall-poplu u l-ħbieb tiegħu.
Qrib hi tassew is-salvazzjoni tiegħu
għal dawk li jibżgħu minnu,
biex jgħammar is-sebħ f’artna. R/.
It-tjieba u l-fedeltà jiltaqgħu,
il-ġustizzja u s-sliem jitbewsu.
Il-fedeltà mill-art tinbet,
u l-ġustizzja mis-sema tixref. R/.
Il-Mulej ukoll jagħti l-ġid tiegħu,
u artna tagħti l-frott tagħha.
Il-ġustizzja quddiemu timxi,
u s-sliem fuq il-passi tiegħu. R/.
IT-TIENI QARI
Qari mit-Tieni Ittra ta’ San Pietru Appostlu (3:8-14)
Ħuti għeżież, dan għandkom tkunu tafu: li quddiem il-Mulej jum wieħed hu bħal elf sena, u elf sena bħal jum wieħed. Mhux għax jiddawwar il-Mulej li jtemm il-wegħdiet tiegħu, kif jaħsbu xi wħud, imma qiegħed jistabar bikom għax ma jridx li xi ħadd jintilef, imma, li kulħadd jersaq għall-indiema.
Jasal, tabilħaqq, Jum il-Mulej bħal ħalliel; jintemmu mbagħad is-smewwiet bi ħsejjes kbar, jinħallu bin-nar l-elementi tad-dinja, u l-art b’kulma fiha tkun maħruqa bin-nar.
Ladarba hekk kollox għandu jintemm, araw daqsxejn kif għandkom iġġibu ruħkom, kemm għandha tkun qaddisa u tajba ħajjitkom, waqt li tistennew b’ħerqa kbira l-miġja tal-Jum ta’ Alla. Hu minħabba f’dan il-Jum li s-smewwiet jinħarqu u jinħallu, u l-elementi tad-dinja jinqerdu bin-nar. Imma aħna, skont il-wegħda tiegħu, nistennew smewwiet ġodda u art ġdida, li fihom tgħammar il-ġustizzja.
Għalhekk, ħuti għeżież, waqt li nistennew dan kollu, qisu li jsibkom fis-sliem, bla tebgħa u bla dnub.
Il-Kelma tal-Mulej. Irroddu ħajr lil Alla.
AKKLAMAZZJONI QABEL L-EVANĠELJU (ara Lq 3:4-6)
Hallelujah. Hallelujah.
Ħejju t-triq tal-Mulej, iddrittaw il-mogħdijiet tiegħu: u l-bnedmin kollha jaraw is-salvazzjoni ta’ Alla.
Hallelujah!
L-EVANĠELJU
Bidu tal-Evanġelju skont San Mark (1:1-8)
Il-bidu tal-Evanġelju ta’ Ġesù Kristu, l-Iben ta’ Alla.
Bħalma hu miktub fil-ktieb ta’ Isaija l-profeta: «Ara, jien nibgħat qablek il-ħabbar tiegħi biex iħejji triqtek. Leħen ta’ wieħed jgħajjat fid-deżert: Ħejju t-triq tal-Mulej, iddrittaw il-mogħdijiet tiegħu.» Hekk Ġwanni deher jgħammed fid-deżert u jxandar magħmudija ta’ ndiema għall-maħfra tad-dnubiet. U kienet tmur għandu l-Lhudija kollha u n-nies kollha ta’ Ġerusalemm, jitgħammdu minnu fix-xmara Ġordan waqt li jistqarru dnubiethom.
Ġwanni kien jilbes libsa tax-xagħar tal-ġemel, bi ħżiem tal-ġild madwar qaddu, u kien jiekol ġradijiet u għasel selvaġġ. U kien ixandar u jgħid: «Ġej warajja min hu aqwa minni, li jien ma jistħoqqlix nitbaxxa quddiemu u nħoll il-qfieli tal-qorq tiegħu. Jien għammidtkom bl-ilma, iżda huwa jgħammidtkom bl-Ispirtu s-Santu.»
Il-Kelma tal-Mulej. Tifħir lilek Kristu.
IFHEM IL-KELMA - Kummenti dwar il-qari
- AUDIO -
GĦIX IL-KELMA - Il-Kalendarju Liturġiku tal-ġimgħa
It-tieni ġimgħa tas-Salterju
■ It-Tnejn 11 ta’ Diċembru: Ferja tal-Avvent / San Damasu, papa (T). Qari: Isaija 35:1-10; Salm 84:9ab-10.11-12.13-14; Luqa 5:17-26.
■ It-Tlieta 12 ta’ Diċembru: Ferja tal-Avvent / L-Imqaddsa Verġni Marija ta’ Gwadalupe (T). Qari: Isaija 40:1-11; Salm 95:1-2.3 u 10aċ.11-12.13; Mattew 18:12-14.
■ L-Erbgħa 13 ta’ Diċembru: Santa Luċija, verġni u martri (TO). Qari: Isaija 40:25-31; Salm 102:1-2.3-4.8 u 10; Mattew 11:28-30.
■ Il-Ħamis 14 ta’ Diċembru: San Ġwann tas-Salib, presbiteru u duttur tal-Knisja (TO). Qari: Isaija 41:13-20; Salm 144:1 u 9.10-11.12-13ab; Mattew 11:11-15.
■ Il-Ġimgħa 15 ta’ Diċembru: Ferja tal-Avvent. Qari: Isaija 48:17-19; Salm 1:1-2.3.4 u 6; Mattew 11:16-19.
■ Is-Sibt 16 ta’ Diċembru: Ferja tal-Avvent. Qari: Sirak 48:1-4.9-11; Salm 79:2aċ u 3b.15-16.18-19; Mattew 17:10-13.
TO = Tifkira Obbligatorja; T = Tifkira.
Il-kulur ħdejn id-data jindika l-kulur liturġiku tal-ġurnata.