It-18 Ħadd ta' matul is-sena - Sena Ċ
AQRA L-KELMA - Il-liturġija tal-Kelma
L-EWWEL QARI
Qari mill-Ktieb ta’ Koħèlet (1: 2;2:21-23)
O frugħa tal-frugħat, jgħid Koħèlet. O frugħa tal-frugħat! Kollox frugħa!
Għax dan jiġri: wieħed, li jkun ħadem bl-għaqal u l-ħila u b’suċċess, ikollu jgħaddi sehmu lil ħaddieħor li xejn ma tħabat għalih. Dan ukoll frugħa u ħaġa mill-agħar.
Għax x’sa jmissu l-bniedem mit-taħbit u l-kedda li jkun ħa taħt ix-xemx? Għomru kollu jbati u jinħaqar bil-kedda u lanqas billejl ma jserraħ rasu. Dan ukoll hu frugħa!
Il-Kelma tal-Mulej. Irroddu ħajr lil Alla.
SALM RESPONSORJALI (Salm 89)
Rit: Mulej, int kont għalina kenn minn nisel għal nisel!
Int traġġa’ l-bnedmin lejn it-trab,
u tgħidilhom:
«Erġgħu lura, intom bnedmin!»
Elf sena huma għalik
bħal jum tal-bieraħ li għadda,
jew bħal sahra tal-lejl. Rit…
Int taħsadhom, u jsiru bħal ħolma.
Huma bħall-ħaxix li jinbet filgħodu;
filgħodu jwarrad u jħaddar,
filgħaxija jidbiel u jinxef. Rit…
Għalhekk għallimna ngħoddu
jiem ħajjitna,
sabiex aħna nimxu bil-għaqal.
Dur lejna, Mulej! Kemm se ddum?
Ħenn għall-qaddejja tiegħek! Rit…
Imliena kmieni bit-tjieba tiegħek,
biex nifirħu u nithennew
ħajjitna kollha.
Ħa tkun fuqna l-grazzja ta’ Alla Sidna!
Wettqilna inti x-xogħol ta’ jdejna,
wettaq, iva, xogħol idejna. Rit…
IT-TIENI QARI
Qari mill-Ittra ta’ San Pawl Appostlu lill-Kolossin (3:1-5.9-11)
Ħuti, jekk intom irxuxtajtu ma’ Kristu, fittxu l-ħwejjeġ tas-sema, fejn Kristu qiegħed fuq il-lemin ta’ Alla. Aħsbu fil-ħwejjeġ tas-sema, mhux f’dawk tal-art. Għax intom mittu, imma ħajjitkom hi moħbija flimkien ma’ Kristu f’Alla. Meta jidher Kristu, li hu l-ħajja tagħkom, imbagħad intom ukoll tidhru flimkien miegħu fil-glorja.
Mewtu ġo fikom dak kollu li hu tal-art: żína, faħx, ġibdiet, xewqat ħżiena, u r-regħba li hi idolatrija. Tigdbux lil xulxin, intom li nżajtu l-bniedem il-qadim bl-għemil kollu tiegħu, u lbistu l-bniedem il-ġdid, li jiġġedded dejjem skont ix-xbieha ta’ min ħalqu, u jikber fl-għerf.
Fih ma hemmx Grieg jew Lhudi, ċirkonċiż jew mhux, Barbaru jew Skita, ilsir jew ħieles, iżda Kristu f’kollox u f’kulħadd.
Il-Kelma tal-Mulej. Irroddu ħajr lil Alla.
AKKLAMAZZJONI QABEL L-EVANĠELJU
Hallelujah. Hallelujah. (Mt 5:3)
Henjin il-foqra fl-ispirtu, għax tagħhom hija s-Saltna tas-Smewwiet.
Hallelujah!
L-EVANĠELJU
Qari mill-Evanġelju skont San Luqa (10:38-42)
F’dak iż-żmien, xi ħadd mill-folla qal lil Ġesù: «Mgħallem, għid lil ħija jaqsam il-wirt miegħi.» Wieġbu Ġesù: «Ħabib, min qegħedni mħallef fuqkom, jew qabbadni nqassmilkom il-ġid bejnietkom?»
Imbagħad qal lin-nies: «Iftħu għajnejkom u ħarsu rwieħkom minn kull regħba, għax imqar jekk wieħed ikollu bir-radam, ħajtu ma tiddependix mill-ġid li jkollu.»
U qalilhom parabbola: «Wieħed raġel għani ġabar kotra ta’ frott mir-raba’ tiegħu. U beda jaħseb u jgħid bejnu u bejn ruħu: “X’sa nagħmel? Għax dan il-frott kollu ma għandix fejn naħżnu! Ara x’nagħmel,” qal: “inħott l-imħażen li għandi u nibni oħrajn akbar, u naħżen fihom il-qamħ u l-ġid kollu li għandi. Imbagħad ngħid lili nnifsi: Ruħi, għandek ħażna kbira ta’ ġid għal bosta snin; mela strieħ, kul, ixrob, ixxala!” Iżda qallu Alla: “Iblah li int! Dan il-lejl stess jitolbuk ruħek lura. U l-ħwejjeġ li ħejjejt għalik, ta’ min ikunu?” Hekk jiġrilu min jiġma’ l-ġid għalih innifsu bla ma jistagħna quddiem Alla.»
Il-Kelma tal-Mulej. Tifħir lilek Kristu.
IFHEM IL-KELMA - Kummenti dwar il-qari
- VIDEO -
Fr Elija Vella OFMConv.
- AUDIO -
GĦIX IL-KELMA - Il-Kalendarju Liturġiku tal-ġimgħa
It-tieni ġimgħa tas-salterju
■ It-Tnejn 1 ta’ Awwissu: San Alfons Marija de’ Liguori, Isqof u Duttur tal-Knisja (TO). Qari: Ġeremija 28:1-17; Salm 118:29.43.79.80.95.102; Mattew 14:22-36.
■ It-Tlieta 2 ta’ Awwissu: Ferja / San Ewsebju, Isqof ta’ Vercelli (T) / San Pietru Ġiljan Eymard, Presbiteru (T). Qari: Ġeremija 30:1-2.12-15.18-22; Salm 101:16-18.19-21.29 u 22-23; Mattew 14:22-36.
■ L-Erbgħa 3 ta’ Awwissu: Ferja. Qari: Ġeremija 31:1-7; Salm Ġeremija 31:10-13; Mattew 15:21-28.
■ Il-Ħamis 4 ta’ Awwissu: San Ġwann Marija Vianney, Presbiteru (TO). Qari: Ġeremija 31:31-34; Salm 50:12-15.18-19; Mattew 16:13-23.
■ Il-Ġimgħa 5 ta’ Awwissu: Ferja / Id-Dedikazzjoni tal-Bażilka ta’ Santa Marija Maggiore, f’Ruma (T). Qari: Naħum 2:1.3; 3:1-3.6-7; Salm Dewteronomju 32:35-36.39.41; Mattew 16:24-28.
■ Is-Sibt 6 ta’ Awwissu: It-Trasfigurazzjoni tal-Mulej (F). Qari: Danjel 7:9-10.13-14; Salm 96:1-2.5-6.9; 2 Pietru 1:16-19; Mattew 17:1-9.
F = Festa; TO = Tifkira Obbligatorja; T = Tifkira
Il-kulur tad-data jindika l-kulur liturġiku tal-ġurnata.