It-13 Ħadd ta' matul is-sena - Sena Ċ
AQRA L-KELMA - Il-liturġija tal-Kelma
L-EWWEL QARI
Qari mill-Ewwel Ktieb tas-Slaten (19:16b.19-21)
F’dak iż-żmien, il-Mulej qal lil Elija: «Lil Eliżew bin Safat, ta’ Abel-mehola, idilku profeta flokok.»
Elija telaq minn hemm u sab lil Eliżew bin Safat, waqt li kien qiegħed jaħrat bi tnax-il żewġ gniedes quddiemu; u hu kien qiegħed imexxi t-tnax-il wieħed. Resaq lejh Elija, u xeħet fuqu l-mantell tiegħu. Dan ħalla l-gniedes u mar jiġri wara Elija jgħidlu: «Ħallini mmur insellem lil missieri u ’l ommi, imbagħad niġi warajk.» Qallu Elija: «Mur u erġa’ ejja; għaliex x’għamiltlek jiena?»
Eliżew tbiegħed minnu, qabad żewġ gniedes, qatilhom u offriehom sagrifiċċju. U bl-għodda tal-ħrit sajjar il-laħam, qassmu lin-nies, u kielu. U hu mar wara Elija, u beda jservih.
Il-Kelma tal-Mulej. Irroddu ħajr lil Alla.
SALM RESPONSORJALI (Salm 15)
Rit: Mulej, inti s-sehem tal-wirt u r-risq tiegħi!
Ħarisni, o Alla, għax fik jien nistkenn.
Jien għidt lill-Mulej: «Int Sidi,
m’għandix ġid ieħor ħliefek.»
Mulej, inti s-sehem tal-wirt u r-risq tiegħi,
inti żżomm f’idejk xortija. Rit…
Inbierek lill-Mulej li tani l-fehma;
imqar billejl qalbi tgħallimni.
Inżomm il-Mulej dejjem quddiemi,
għax bih f’leminti qatt ma nitħarrek. Rit…
Hekk tifraħ qalbi u tithenna ruħi,
u ġismi wkoll jistrieħ fil-kwiet.
Għax int ma titlaqnix fl-imwiet,
ma tħallix il-maħbub tiegħek jara l-qabar. Rit…
Int tgħallimni t-triq tal-ħajja;
hemm il-milja tal-ferħ quddiemek,
hemm l-għaxqa għal dejjem f’lemintek. Rit…
IT-TIENI QARI
Qari mill-Ittra ta’ San Pawl Appostlu lill-Galatin (5:1.13-18)
Ħuti, Kristu ħelisna biex ngħixu ta’ nies ħielsa. Żommu sħiħ, u terġgħux tmiddu għonqkom għall-madmad tal-jasar.
Intom imma, ħuti, intom ġejtu msejħa għall-ħelsien; imma tinqdewx b’dan il-ħelsien għall-ġisem, iżda aqdu lil xulxin fl-imħabba. Il-Liġi kollha tinġabar f’liġi waħda: «Ħobb lil għajrek bħalek innifsek.» Jekk intom tgiddmu u tieklu lil xulxin, oqogħdu attenti li ma tikkunsmawx lil xulxin!
Jien ngħidilkom, imxu fl-Ispirtu u taqgħux għall-passjonijiet tal-ġisem. Il-passjonijiet tal-ġisem huma kontra l-Ispirtu, u l-Ispirtu hu kontra l-ġisem; dawn it-tnejn huma kontra xulxin, biex ma jħallukomx tagħmlu dak li tixtiequ.
Jekk lilkom imexxikom l-Ispirtu, m’intomx taħt il-Liġi.
Il-Kelma tal-Mulej. Irroddu ħajr lil Alla.
AKKLAMAZZJONI QABEL L-EVANĠELJU
Hallelujah. Hallelujah. (1 Sam 3:9; Ġw 6,68ċ)
Tkellem, Mulej, għax il-qaddej tiegħek qiegħed jisma’; Inti għandek il-kliem tal-ħajja ta’ dejjem.
Hallelujah!
L-EVANĠELJU
Qari mill-Evanġelju skont San Luqa (9:51-62)
Meta Ġesù qorob għalih iż-żmien li fih kellu jittieħed mid-dinja, b’rieda sħiħa dar u telaq lejn Ġerusalemm. U bagħat xi messaġġiera qablu li, huma u sejrin, daħlu f’raħal tas-Samarija biex iħejjulu fejn joqgħod. Iżda hemmhekk ma laqgħuhx, billi hu kien sejjer Ġerusalemm. Meta raw dan, id-dixxipli Ġakbu u Ġwanni qalulu: «Mulej, tridx ngħidu lin-nar jinżel mis-sema u jeqridhom?» Iżda hu dar fuqhom u ċanfarhom. U marru f’raħal ieħor.
Huma u miexja fit-triq kien hemm wieħed li qallu: «Tmur fejn tmur, jiena niġi warajk.» U qallu Ġesù: «Il-volpijiet għandhom l-għerien tagħhom u l-għasafar tal-ajru l-bejtiet, iżda Bin il-bniedem ma għandux fejn imidd rasu.»
Lil wieħed ieħor qallu: «Imxi warajja.» Iżda dak wieġbu: «Ħallini l-ewwel immur nidfen lil missieri.» Iżda hu wieġbu: «Ħalli l-mejtin jidfnu l-mejtin tagħhom; iżda int mur u xandar is-Saltna ta’ Alla.»
U ieħor ukoll qallu: «Jien niġi, Mulej, warajk, imma l-ewwel ħallini nsellem lil tad-dar.» Qallu Ġesù: «Min iqiegħed idu fuq il-moħriet u jħares lura mhuwiex tajjeb għas-Saltna ta’ Alla.»
Il-Kelma tal-Mulej. Tifħir lilek Kristu.
IFHEM IL-KELMA - Kummenti dwar il-qari
- VIDEO -
- AUDIO -
GĦIX IL-KELMA - Il-Kalendarju Liturġiku tal-ġimgħa
L-ewwel ġimgħa tas-salterju
■ It-Tnejn 27 ta’ Ġunju: Ferja / San Ċirillu ta’ Lixandra, Isqof u Duttur tal-Knisja (T). Qari: Għamos 2:6-10.13-16; Salm 49:16-23; Mattew 8:18-22.
■ It-Tlieta 28 ta’ Ġunju: Sant’Irinew, Isqof u Martri (TO). Qari: Għamos 3:1-8; 4:11-12; Salm 5:5-8; Mattew 8:23-27.
■ L-Erbgħa 29 ta’ Ġunju: San Pietru u San Pawl, Appostli (S). Qari: Atti 12:1-11; Salm 33:2-9; 2 Timotju 4:6-8.17-18; Mattew 16:13-19.
■ Il-Ħamis 30 ta’ Ġunju: Ferja / L-Ewwel Martri tal-Knisja ta’ Ruma (T). Qari: Għamos 7:10-17; Salm 18:8-11; Mattew 9:1-8.
■ Il-Ġimgħa 1 ta’ Lulju: Ferja / Beatu Nazju Falzon, Kjeriku sekulari (T). Qari: Għamos 8:4-6.9-12; Salm 118:2.10.20.30.40.131; Mattew 9:9-13.
■ Is-Sibt 2 ta’ Lulju: Ferja / L-Imqaddsa Verġni Marija f’Jum is-Sibt (T). Qari: Għamos 9:11-15; Salm 84:9.11-14; Mattew 9:14-17.
Il-kulur tad-data jindika l-kulur liturġiku tal-ġurnata.