It-13-il Ħadd ta' matul is-sena - Sena A
AQRA L-KELMA - Il-liturġija tal-Kelma
L-EWWEL QARI
Qari mit-Tieni Ktieb tas-Slaten (4: 8-11.14-16a)
Ġurnata waħda Eliżew kien għaddej minn Sunem. Hawn kienet toqgħod mara għanja, u din ġagħlitu joqgħod jiekol għandha; u kull meta kien jgħaddi minn hemm kien idur għal għandha biex jiekol hemm. U hi qalet lil żewġha: «Ara, jien żgura li dan ir-raġel, li jgħaddi għandna sikwit, hu raġel qaddis ta’ Alla. Ħa ntellgħulu għorfa fuq is-setaħ, u nqegħdulu fiha sodda, mejda, siġġu u mnara, u meta jgħaddi għandna, ikun jista’ jidħol fiha.»
U ġurnata waħda wasal hemm, u daħal fl-għorfa, u raqad hemm. U Eliżew qal lil Ġeħażi, il-qaddej tiegħu: «X’nistgħu nagħmlulha lil din il-mara?» U Ġeħażi wieġbu: «Jaħasra, ma għandhiex tfal, u żewġha xiħ!» U wieġbu: «Sejħilha.» U dak sejħilha u ġiet fil-bieb. U Eliżew qalilha: «Bħal dan iż-żmien sena, int tkun tħaddan iben.»
Il-Kelma tal-Mulej. Irroddu ħajr lil Alla.
SALM RESPONSORJALI (Salm 88)
Rit: It-tjieba tal-Mulej irrid dejjem ngħanni!
It-tjieba tal-Mulej
irrid dejjem ngħanni;
f’kull żmien ixandar fommi l-fedeltà tiegħek.
Għax jien għedt:
«Tjubitek tibqa’ sħiħa għal dejjem;
bħas-smewwiet int wettaqt
il-fedeltà tiegħek.» Rit…
Hieni l-poplu li jaf jgħajjat bil-ferħ,
li jimxi, Mulej, fid-dawl ta’ wiċċek.
B’ismek jithennew il-jum kollu,
u bil-ġustizzja tiegħek jifirħu. Rit…
Għax inti l-foħrija
tal-qawwa tagħhom;
għal tjubitek nerfgħu rasna fl-għoli.
Għax il-Mulej it-tarka tagħna,
il-Qaddis ta’ Israel
is-sultan tagħna. Rit…
IT-TIENI QARI
Qari mill-Ittra ta’ San Pawl Appostlu lir-Rumani (6: 3-4.8-11)
Ħuti, ma tafux li aħna lkoll li tgħammidna fi Kristu Ġesù, tgħammidna fil-mewt tiegħu? Indfinna miegħu fil-mewt permezz tal-magħmudija sabiex kif Kristu kien imqajjem mill-imwiet permezz tal-qawwa glorjuża tal-Missier, hekk aħna ngħixu ħajja ġdida.
Jekk aħna mitna ma’ Kristu, nemmnu wkoll li għad ngħixu ma’ Kristu. Nafu li Kristu qam mill-imwiet u ma jmutx aktar; il-mewt ma għadhiex taħkem fuqu. Hu li miet, miet darba għal dejjem għad-dnub; u issa li qiegħed jgħix, qiegħed jgħix għal Alla. Hekk ukoll intom għandkom tqisu lilkom infuskom mejtin għad-dnub, iżda ħajjin għal Alla fi Kristu Ġesù.
Il-Kelma tal-Mulej. Irroddu ħajr lil Alla.
AKKLAMAZZJONI QABEL L-EVANĠELJU
Hallelujah. Hallelujah. (1 Piet 2:9)
Intom ġens maħtur, saċerdozju rjali, nazzjon qaddis, biex ixxandru t-tifħir ta’ dak li sejħilkom mid-dlam għad-dawl tiegħu tal-għaġeb.
Hallelujah!
L-EVANĠELJU
Qari mill-Evanġelju skond San Mattew (10:26-33)
F’dak iż-żmien, Ġesù qal lill-appostli tiegħu: «Min iħobb lil missieru jew lil ommu iżjed minni ma jistħoqqlux li jkun miegħi; min iħobb lil ibnu jew lil bintu iżjed minni ma jistħoqqlux li jkun tiegħi. U min ma jerfax salibu u jimxi warajja ma jistħoqqlux li jkun miegħi.
Min isib lil ħajtu, jitlifha; u min jitlef lil ħajtu minħabba fija jsibha.
Min jilqa’ lilkom jilqa’ lili, u min jilqa’ lili jkun jilqa’ lil dak li bagħatni.
Min jilqa’ profeta għax hu profeta, ħlas ta’ profeta jieħu; u min jilqa’ bniedem ġust għax hu ġust, ħlas ta’ wieħed ġust jieħu.
U kull min jagħti mqar tazza ilma frisk lil xi ħadd minn dawn l-iżgħar għax hu dixxiplu, tassew ngħidilkom li ma jitlifx il-ħlas tiegħu.»
Il-Kelma tal-Mulej. Tifħir lilek Kristu.
IFHEM IL-KELMA - Kummenti dwar il-qari
- AUDIO -
GĦIX IL-KELMA - Il-Kalendarju Liturġiku tal-ġimgħa
L-ewwel ġimgħa tas-Salterju
■ It-Tnejn 3 ta’ Lulju: San Tumas, appostlu (F). Qari: Efesin 2:19-22; Salm 116:1.2; Ġwanni 20:24-29.
■ It-Tlieta 4 ta’ Lulju: Ferja / Santa Eliżabetta tal-Portugall (T). Qari: Ġenesi 19:15-29; Salm 25:2-3.9-10.11-12; Mattew 8:23-27.
■ L-Erbgħa 5 ta’ Lulju: Ferja / San Anton Marija Zaccaria, presbiteru (T). Qari: Ġenesi 21:5.8-20; Salm 33:7-8.10-11.12-13; Mattew 8:28-34.
■ Il-Ħamis 6 ta’ Lulju: Ferja / Santa Marija Goretti, verġni u martri (T). Qari: Ġenesi 22:1-19; Salm 116:1-2.3-4.5-6.8-9; Mattew 9:1-8.
■ Il-Ġimgħa 7 ta’ Lulju: Ferja. Qari: Ġenesi 23:1-4.19; 24:1-8.62-67; Salm 105:1-2.3-4a.4b-5; Mattew 9;9-13.
■ Is-Sib 8 ta’ Lulju: Ferja / L-Imqaddsa Verġni Marija f’Jum is-Sibt (T). Qari: Ġenesi 27:1-5.15-29; Salm 134:1-2.3-4.5-6; Mattew 9:14-17.
F = Festa; T = Tifkira.
Il-kulur ħdejn id-data jindika l-kulur liturġiku tal-ġurnata.