It-12-il Ħadd ta' matul is-sena - Sena A
AQRA L-KELMA - Il-liturġija tal-Kelma
L-EWWEL QARI
Qari mill-Ktieb tal-Profeta Ġeremija (20:10-13)
F’dak iż-żmien, Ġeremija qal: Ma nismax ħlief taqsis il-kotra; biża’ madwari kollu! «Ixluh! Ħa nixluh!» Jgħajtu saħansitra ħbiebi kollha, ifittxu l-qerda tiegħi: «Għandu mnejn jitqarraq u negħlbuh; ta’ kollox nitħallsu minnu!»
Il-Mulej miegħi bħal raġel qalbieni, għalhekk dawk li jagħmlu għalija jogħtru, ma jagħmlu xejn, jitħawdu bis-sħiħ, għax ħsiebhom ma jseħħx; għajb għalihom li ma jintesa qatt.
Int, Mulej tal-eżerċti, li ġġarrab il-ġust, li tara l-ġewwieni u l-qalb, ħallini nara l-vendetta tiegħek kontrihom, għax f’idejk ħallejt il-kawża tiegħi. Għannu lill-Mulej, faħħru lill-Mulej, għaliex ħajjet l-imsejken ħelisha minn id il-ħżiena.
Il-Kelma tal-Mulej. Irroddu ħajr lil Alla.
SALM RESPONSORJALI (Salm 68)
Rit: Fil-kobor ta’ tjubitek weġibni, O Alla!
Minħabba fik qiegħed nilqa’ t-tmaqdir,
u l-mistħija tiksili wiċċi.
Sirt barrani għal ħuti,
ulied ommi ma jagħrfunix.
Għax il-ħeġġa għal darek fnietni,
it-tagħjir ta’ min jgħajjar
lilek waqa’ fuqi. Rit…
Imma jien lilek nitlob, Mulej;
meta jogħġbok, o Alla, weġibni,
fil-kobor ta’ tjubitek u skont
il-wegħda tas-salvazzjoni tiegħek.
Weġibni, Mulej,
għax mill-aħjar tjubitek;
dur lejja fil-kobor
tal-ħniena tiegħek. Rit…
Hekk jaraw l-imsejkna u jifirħu;
u tagħmlu l-qalb,
intom li tfittxu lil Alla.
Għax jisma’ l-fqajrin il-Mulej,
ma jistmellx l-imjassrin tiegħu.
Ifaħħruh is-sema u l-art,
l-ibħra u kulma
jitħarrek fihom. Rit…
IT-TIENI QARI
Qari mill-Ittra ta’ San Pawl Appostlu lir-Rumani (5:12-15)
Ħuti, kien permezz ta’ bniedem wieħed li fid-dinja daħal id-dnub, u permezz tad-dnub il-mewt, u hekk il-mewt laħqet il-bnedmin kollha, għax kollha dinbu.
Kienet għadha ma waslitx il-Liġi, id-dnub kien ġa fid-dinja: imma d-dnub ma kienx magħdud, ladarba Liġi ma kienx hemm. Madankollu l-mewt saltnet ukoll minn Adam sa Mosè, mqar fuq dawk li ma waqgħux fid-dnub li fih kien waqa’ Adam, li kien xbieha ta’ dak li kellu jiġi.
Imma d-don mhuwiex bħall-ħtija. Għax jekk permezz ta’ ħtija waħda mietet il-kotra, aktar u aktar issa l-grazzja ta’ Alla u d-don mogħti bil-grazzja ta’ bniedem wieħed li hu Ġesù Kristu, xterdu bil-bosta fuq il-kotra.
Il-Kelma tal-Mulej. Irroddu ħajr lil Alla.
AKKLAMAZZJONI QABEL L-EVANĠELJU
Hallelujah. Hallelujah. (Ġw 15:26b.27a)
L-Ispirtu tal-verità jixhed għalija, jgħid il-Mulej; u intom ukoll tixhdu.
Hallelujah!
L-EVANĠELJU
Qari mill-Evanġelju skond San Mattew (10:26-33)
F’dak iż-żmien, Ġesù qal lill-Appostli tiegħu: «La tibżgħux mill-bnedmin. Għax xejn ma hu mgħotti li ma jinkixifx, u xejn ma hu moħbi li ma jsirx magħruf.
Dak li jien ngħidilkom fid-dlam għiduh fid-dawl, u dak li ngħidilkom f’widnejkom xandruh minn fuq il-bjut. U tibżgħux minn dawk li joqtlu l-ġisem bla ma jistgħu joqtlu r-ruħ; imma aktar ibżgħu minn dak li jista’ jeqred kemm ir-ruħ u kemm il-ġisem fl-infern. Żewġ għasafar tal-bejt mhux b’ħabba jinbiegħu? U b’danakollu anqas wieħed minnhom ma jaqa’ fl-art mingħajr ir-rieda ta’ missierkom.
Intom imbagħad sax-xagħar ta’ raskom kollu hu magħdud. Mela xejn la tibżgħu; intom aqwa minn ħafna għasafar tal-bejt.
Kull min jistqarr quddiem il-bnedmin li hu miegħi, jien ukoll nistqarr li jiena miegħu quddiem Missieri li hu fis-smewwiet.
Iżda min jiċħad lili quddiem il-bnedmin, jien ukoll niċħad lilu quddiem Missieri li hu fis-smewwiet.»
Il-Kelma tal-Mulej. Tifħir lilek Kristu.
IFHEM IL-KELMA - Kummenti dwar il-qari
- VIDEO -
Fr Elija Vella OFMConv.
- AUDIO -
GĦIX IL-KELMA - Il-Kalendarju Liturġiku tal-ġimgħa
Ir-raba’ ġimgħa tas-Salterju
■ It-Tnejn 26 ta’ Ġunju: Ferja. Qari: Ġenesi 12:1-9; Salm 32:12-13.18-19.20 u 22; Mattew 7:1-5.
■ It-Tlieta 27 ta’ Ġunju: Ferja / San Ċirillu ta’ Lixandra, isqof u duttur tal-Knisja (T). Qari: Ġenesi 13:2.5-18; Salm 14:2-3ab.3ċd-4ab.5; Mattew 7:6.12-14.
■ L-Erbgħa 28 ta’ Ġunju: San Irinew, isqof u martri (TO). Qari: Ġenesi 15:1-12.17-18; Salm 104:1-2.3-4.6-7.8-9; Mattew 7:15-20.
■ Il-Ħamis 29 ta’ Ġunju: San Pietru u San Pawl, appostli (S). Qari: Atti 12:1-11; Salm 33:2-9; 2 Timotju 4:6-8.17-18; Mattew 16:13-19.
■ Il-Ġimgħa 30 ta’ Ġunju: Ferja / L-ewwel Martri tal-Knisja ta’ Ruma (T). Qari: Ġenesi 17:1.9-10.15-22; Salm 127:1-2.3.4-5; Mattew 8:1-4.
■ Is-Sibt 1 ta’ Lulju: Ferja / Beatu Nazju Falzon, kjeriku sekulari (T) / Il-Verġni Mqaddsa Marija f’Jum is-Sibt (T). Qari: Ġenesi 18:1-15; Salm Luqa 1:46-47.48-49.50 u 53.54-55; Mattew 8:5-17.
S = Solennità; TO = Tifkira Obbligatorja; T = Tifkira.
Il-kulur ħdejn id-data jindika l-kulur liturġiku tal-ġurnata.