Is-7 Ħadd ta' matul is-sena - Sena A
AQRA L-KELMA - Il-liturġija tal-Kelma
L-EWWEL QARI
Qari mill-Ktieb tal-Levitku (19:1-2.17-18)
Il-Mulej kellem lil Mosè u qallu: «Għid lill-ġemgħa kollha ta’ wlied Israel: “Għandkom tkunu qaddisin, għax qaddis jien, il-Mulej Alla tagħkom.
La tbejjitx lil ħuk f’qalbek, imma lil għajrek wissih u erġa’ wissih, biex ma tkunx ħati tiegħu.
La titħallasx b’idejk, u la żżommx f’qalbek għal ulied niesek, imma ħobb lil għajrek bħalek innifsek: Jiena l-Mulej.”»
Il-Kelma tal-Mulej. Irroddu ħajr lil Alla.
SALM RESPONSORJALI (Salm 102)
Rit: Ħanin u twajjeb il-Mulej!
Bierek, ruħ tiegħi, lill-Mulej!
B’qalbi kollha nbierek l-isem qaddis tiegħu.
Bierek, ruħ tiegħi, lill-Mulej, u la tinsiex il-ġid kollu
li għamel miegħek. Rit…
Hu li jaħfer dnubietek kollha;
ifejjaq il-mard tiegħek kollu;
jifdi lil ħajtek mill-qabar;
iħaddnek bit-tjieba u bil-ħniena. Rit…
Ħanin u twajjeb il-Mulej,
idum ma jagħdab u kollu mogħdrija.
Ma mexiex magħna skont ma ħaqqhom ħtijietna;
ma ħallasniex skont ma ħaqqha ħżunitna. Rit…
Daqs kemm hu mbiegħed il-Lvant mill-Punent,
hekk hu jbiegħed minna ħtijietna.
Bħalma jħenn il-missier għal uliedu,
hekk iħenn il-Mulej għal min għandu l-biża’ tiegħu. Rit…
IT-TIENI QARI
Qari mill-Ewwel Ittra ta’ San Pawl Appostlu lill-Korintin (3:16-23)
Ħuti, ma tafux li intom tempju ta’ Alla, u li l-Ispirtu ta’ Alla jgħammar fikom? Jekk xi ħadd jeqred it-tempju ta’ Alla, Alla jeqred lilu. Għax qaddis hu t-tempju ta’ Alla, li huwa intom.
Ħadd ma għandu jitqarraq! Jekk xi ħadd fostkom jaħseb li hu għaref f’din id-dinja, ħa jiblieh, biex isir għaref. Għax l-għerf ta’ din id-dinja hu bluha quddiem Alla. Għax hemm miktub: «Hu li jaqbad l-għorrief fil-ħażen tagħhom»; u terġa’: «Il-Mulej jaf li fiergħa huma l-ħsibijiet tal-għorrief.»
Għalhekk ħadd ma għandu jiftaħar bil-bnedmin, għax kollox hu tagħkom: sew jekk Pawlu, sew jekk Apollo, sew jekk Kefa, sew jekk id-dinja, sew jekk il-ħajja, sew jekk il-mewt, sew jekk iż-żmien ta’ issa, sew jekk li ġej; kollox hu tagħkom, u intom ta’ Kristu, u Kristu ta’ Alla.
Il-Kelma tal-Mulej. Irroddu ħajr lil Alla.
AKKLAMAZZJONI QABEL L-EVANĠELJU
Hallelujah. Hallelujah. (1Ġw 2:5)
Kull min iżomm il-kelma ta’ Kristu, fih hemm tassew l-imħabba ta’ Alla fil-milja tagħha.
Hallelujah!
L-EVANĠELJU
Qari mill-Evanġelju skont San Mattew (5:38-48)
F’dak iż-żmien, Ġesù qal lid-dixxipli tiegħu: «Smajtu xi ntqal: “Għajn b’għajn u sinna b’sinna.” Imma jiena ngħidilkom biex bniedem ħażin ma tiqfulux; anzi jekk xi ħadd jagħtik daqqa ta’ ħarta fuq ħaddek tal-lemin, dawwarlu l-ieħor ukoll; u lil min ikun irid itellgħek il-qorti u jeħodlok il-libsa, ħallilu wkoll il-mantar. U jekk xi ħadd iġagħlek timxi miegħu mil wieħed, mur miegħu tnejn. Agħti lil min jitolbok u ddawwarx spallejk lil min ikun irid jissellef mingħandek.
Smajtu xi ntqal: “Ħobb lil għajrek, u obgħod lill-għadu tiegħek.” Imma jiena ngħidilkom: Ħobbu lill-għedewwa tagħkom, u itolbu għal dawk li jippersegwitawkom, biex tkunu wlied Missierkom li hu fis-smewwiet; għax hu jtalla’ x-xemx tiegħu sew fuq il-ħżiena u sew fuq it-tajbin, u jniżżel ix-xita sew fuq min hu tajjeb u sew fuq min mhuwiex.
Għax jekk intom tħobbu lil min iħobbkom, xi ħlas jistħoqqilkom? Mhux il-pubblikani wkoll jagħmluh dan? U jekk issellmu lil ħutkom biss, xi tkunu tagħmlu żejjed? Mhux il-pagani wkoll jagħmluh dan? Kunu mela perfetti, bħalma hu perfett Missierkom li hu fis-smewwiet.»
Il-Kelma tal-Mulej. Tifħir lilek Kristu.
IFHEM IL-KELMA - Kummenti dwar il-qari
- VIDEO -
Fr Elija Vella OFMConv.
- AUDIO -
GĦIX IL-KELMA - Il-Kalendarju Liturġiku tal-ġimgħa
It-tielet ġimgħa tas-salterju
■ It-Tnejn 20 ta’ Frar: Ferja. Qari: Sirak 1:1-10; Salm 92:1ab.1ċ-2.5; Mark 9:14-29.
■ It-Tlieta 21 ta’ Frar: Ferja / San Pietru Damiani, isqof u duttur tal-Knisja (T). Qari: Sirak 2:1-13; Salm 36:3-4.18-19.27-28.39-40; Mark 9:30-37.
■ L-Erbgħa 22 ta’ Frar: L-Erbgħa tal-Irmied. Qari: Ġoel 2:12-18; Salm 50:3-4.5-6a.12-13.14 u 17; 2 Korintin 5:20 – 6:2; Mattew 6:1-6.16-18.
■ Il-Ħamis 23 ta’ Frar: Ferja tar-Randan. Qari: Dewteronomju 30:15-20; Salm 1:1-2.3.4 u 6; Luqa 9:22-25 .
■ Il-Ġimgħa 24 ta’ Frar: Ferja tar-Randan. Qari: Isaija 58:1-9a; Salm 50:3-4.5-6a.18-19; Mattew 9:14-15.
■ Is-Sibt 25 ta’ Frar: Ferja tar-Randan / Il-Beata Marija Adeodata Pisani, verġni (TL). Qari: Isaija 58:9b-14; Salm 85:1-2.3-4.5-6; Luqa 5:27-32.
T = Tifkira; TL= Tifkira Limitata.
Il-kulur ħdejn id-data jindika l-kulur liturġiku tal-ġurnata.