IS-6 ĦADD TA’ MATUL IS-SENA - B
AQRA L-KELMA - Il-liturġija tal-Kelma
L-Ewwel Qari
Qari mill-Ktieb tal-Levitiku (13:1-2.45-46)
Il-Mulej kellem lil Mosè u lil Aron u qalilhom: «Meta xi ħadd ikollu fil-ġilda xi qxur jew xi bużżieqa, jew xi tebgħa bajda, qisha ġerħa tal-ġdiem, jeħduh għand Aron il-qassis, jew għand xi ħadd minn uliedu l-qassisin.
Il-marid bil-ġdiem għandu jilbes ħwejjeġ imqattgħa u jħalli rasu mikxufa, u jitgħatta sa geddumu, u jgħajjat: “Imniġġes! Imniġġes!”
Kemm idum marid ikun miżmum b’imniġġes li hu, u jgħix waħdu f’postu barra mill-kamp.»
Il-Kelma tal-Mulej. Irroddu ħajr lil Alla.
SALM RESPONSORJALI (Salm 31)
R/. Int kenn għalija, iddawwarni u tferraħni bil-ħelsien tiegħek!
Hieni l-bniedem li ħtijietu maħfura,
li għandu d-dnub tiegħu mistur!
Hieni l-bniedem li ebda ħażen
ma jgħoddlu l-Mulej,
u ma għandu ebda qerq f’qalbu! R/.
Id-dnub tiegħi jien stqarrejtlek,
u l-ħażen tiegħi ma ħbejtulekx.
Jien għedt: «Quddiem il-Mulej nistqarr ħtijieti.»
U int ħfirtli l-ħażen tad-dnub tiegħi. R/.
Ifirħu, twajbin, u thennew fil-Mulej;
għajtu bil-ferħ,
intom ilkoll ta’ qalbkom safja. R/.
IT-TIENI QARI
Qari mill-Ewwel Ittra ta’ San Pawl Appostlu lill-Korintin (10:31–11:1)
Ħuti, sew jekk tieklu, sew jekk tixorbu, tagħmlu x’tagħmlu, agħmlu kollox għall-glorja ta’ Alla. Tkunux ta’ tfixkil, la għal-Lhud, la għall-Griegi, u lanqas għall-Knisja ta’ Alla. Hekk jiena nogħġob lil kulħadd f’kollox, bla ma nfittex l-interessi tiegħi, imma tal-ħafna biex isalvaw.
Ixbhu lili, bħalma jien nixbah lil Kristu.
Il-Kelma tal-Mulej. Irroddu ħajr lil Alla.
AKKLAMAZZJONI QABEL L-EVANĠELJU (Lq 7:16)
Hallelujah. Hallelujah.
Profeta kbir qam fostna, u Alla żar il-poplu tiegħu.
Hallelujah!
L-EVANĠELJU
Qari mill-Evanġelju skont San Mark (1:40-45)
F’dak iż-żmien, resaq fuq Ġesù wieħed lebbruż jitolbu bil-ħerqa, inxteħet għarkupptejh quddiemu u qallu: «Jekk trid, tista’ tfejjaqni!» Imqanqal mill-ħniena, Ġesù medd idu fuqu, messu u qallu: «Irrid, kun imnaddaf!»
U minnufih il-lebbra marritlu u ġismu ndaf. U widdbu bis-sħiħ, bagħtu malajr u qallu: «Qis li ma tgħid xejn lil ħadd; iżda mur uri ruħek lill-qassis, u agħmel offerta għall-fejqan tiegħek kif ordna Mosè, biex tkunilhom ta’ xhieda.»
Iżda dak, meta telaq, beda jxandar ma’ kullimkien u jxerred l-aħbar, hekk li Ġesù f’ebda belt ma sata’ iżjed jidħol bid-dieher, imma kien jibqa’ barra fil-kampanja u kienu jmorru ħdejh nies minn kullimkien.
Il-Kelma tal-Mulej. Tifħir lilek Kristu.
IFHEM IL-KELMA - Kummenti dwar il-qari
- AUDIO -
- TEST -
GĦIX IL-KELMA - Il-Kalendarju Liturġiku tal-ġimgħa
It-tieni ġimgħa tas-Salterju
■ It-Tnejn 12 ta’ Frar: Ferja. Qari: Ġakbu 1:1-11; Salm 118:67.68.71.72.75.76; Mark 8:11-13.
■ It-Tlieta 13 ta’ Frar: Ferja. Qari: Ġakbu 1:12-18; Salm 93:12-13a.14-15.18-19; Mark 8:14-21.
Ir-raba’ ġimgħa tas-Salterju
■ L-Erbgħa 14 ta’ Frar: L-Erbgħa tal-Irmied. Qari: Ġoel 2:12-18; Salm 50:3-6. 12-14.17; 2 Korintin 5:20–6:2; Mattew 6:1-6.16-18.
■ Il-Ħamis 15 ta’ Frar: Ferja tar-Randan. Qari: Dewteronomju 30:15-20; Salm 1:1-4.6; Luqa 9:22-25.
■ Il-Ġimgħa 16 ta’ Frar: Ferja tar-Randan. Qari: Isaija 58:1-9; Salm 50:3-6.18-19; Mark 9:14-15.
■ Is-Sibt 17 ta’ Frar: Ferja tar-Randan / Is-Seba’ Fundaturi tas-Serviti ta’ Marija (TL). Qari: Isaija 58:9-14; Salm 85:1-6; Luqa 5:27-32.
TL = Tifkira Limitata.
Il-kulur ħdejn id-data jindika l-kulur liturġiku tal-ġurnata.