Is-27 Ħadd ta' matul is-sena - Sena Ċ
AQRA L-KELMA - Il-liturġija tal-Kelma
L-EWWEL QARI
Qari mill-Ktieb tal-Profeta Ħabakkuk (1:2-3;2:2-4)
Mulej, kemm sa ndum nokrob għall-għajnuna u int ma tismax, jew ngħajjat: «Vjolenza!» u int ma ssalvax? Għaliex turini l-ħażen, u inti toqgħod tħares lejn il-ħtija? Quddiemi qerda u vjolenza, hemm it-tilwim, u l-ġlied dejjem jiżdied.
Imbagħad il-Mulej wieġeb u qalli: «Ikteb id-dehra, onqoxha fuq tavlozzi, hekk li jkun jista’ jħaffef min jaqraha. Għax id-dehra sseħħ meta jkun waqtha, tistenna sa ma ttemm, u ma tqarraqx. Jekk hija ddum ma tasal, int stennieha, għax tiġi żgur, ma tiddawwarx ma tasal! Arah jinfena min mhux ruħu sewwa, iżda l-ġust jgħix bil-fedeltà tiegħu.»
Il-Kelma tal-Mulej. Irroddu ħajr lil Alla.
SALM RESPONSORJALI (Salm 94)
Rit: Isimgħu leħen il-Mulej, u twebbsux qalbkom!
Ejjew, ħa nfaħħru bl-hena l-Mulej,
ħa ngħajtu bil-ferħ lill-blata
tas-salvazzjoni tagħna!
Nersqu quddiemu b’għana ta’ radd il-ħajr,
ngħannulu b’għajjat ta’ ferħ. Rit…
Ejjew inqimuh u ninxteħtu quddiemu,
għarkupptejna quddiem il-Mulej li ħalaqna!
Għaliex hu Alla tagħna, u aħna l-poplu tal-mergħa tiegħu
u n-nagħaġ tiegħu. Rit…
Mhux li kontu llum tisimgħu leħnu!
«La twebbsux qalbkom bħal f’Meriba,
bħal dakinhar f’Massa, fid-deżert,
meta ġarrbuni u ttantawni missirijietkom,
għalkemm raw dak li jien għamilt.» Rit…
IT-TIENI QARI
Qari mit-Tieni Ittra ta’ San Pawl Appostlu lil Timotju (1:6-8.3-14)
Għażiż, infakkrek biex tqajjem fik id-don ta’ Alla, li jinsab fik bit-tqegħid ta’ jdejja; għax Alla ma taniex spirtu ta’ biża’, imma Spirtu ta’ qawwa, ta’ mħabba u ta’ rażan.
Mela tistħi xejn minħabba fix-xhieda għal Sidna, anqas minħabba fija, priġunier tiegħu, imma aqsam miegħi t-tbatija għall-Evanġelju, u afda fil-qawwa ta’ Alla.
Żomm quddiem għajnejk l-eżempju tat-tagħlim sħiħ li smajt mingħandi, fil-fidi u fl-imħabba li huma fi Kristu Ġesù. Ħares bl-għajnuna tal-Ispirtu s-Santu li jgħammar fina t-teżor sabiħ li kien fdat f’idejk.
Il-Kelma tal-Mulej. Irroddu ħajr lil Alla.
AKKLAMAZZJONI QABEL L-EVANĠELJU
Hallelujah. Hallelujah. (1 Piet 1:25)
Il-kelma tal-Mulej tibqa’ għal dejjem: din hi l-kelma tal-Evanġelju li kien imxandar lilkom.
Hallelujah!
L-EVANĠELJU
Qari mill-Evanġelju skont San Luqa (16:19-31)
F’dak iż-żmien, l-appostli qalu lill-Mulej: «Kattar fina l-fidi!» Weġibhom il-Mulej: «Kieku kellkom fidi mqar daqs żerriegħa tal-mustarda, kontu tgħidu lil din is-siġra tat-tut: “Inqala’ u mur tħawwel fil-baħar,” u hi kienet tisma’ minnkom.
Wieħed minnkom ikollu qaddej qiegħed jaħrat jew jirgħa; meta jidħol mill-għalqa x’sa jgħidlu: “Ejja, isa, u oqgħod għall-ikel”? jew: “Lestili x’niekol, ilbes il-fardal u newwilli sa ma niekol u nixrob jien, u mbagħad tiekol u tixrob int”? Jaqaw sa jroddlu ħajr lill-qaddej talli jkun għamel li ordnalu?
Hekk ukoll intom, meta tagħmlu kulma tkunu ordnati, għidu: “Aħna qaddejja li ma niswew għal xejn; għamilna biss dak li kellna nagħmlu.”»
Il-Kelma tal-Mulej. Tifħir lilek Kristu.
IFHEM IL-KELMA - Kummenti dwar il-qari
- VIDEO -
Fr Elija Vella OFMConv.
- AUDIO -
GĦIX IL-KELMA - Il-Kalendarju Liturġiku tal-ġimgħa
It-tielet ġimgħa tas-salterju
■ It-Tnejn 3 ta’ Ottubru: Ferja. Qari: Galatin 1:6-12; Salm 110:1-2.7-10; Luqa 10:25-37.
■ It-Tlieta 4 ta’ Ottubru: San Franġisk ta’ Assisi, Djaknu (TO). Qari: Galatin 1:13-24; Salm 138:1-3.13-15; Luqa 10:38-42.
■ L-Erbgħa 5 ta’ Ottubru: Ferja / Santa Fawstina Kowalska, Verġni (T). Qari: Galatin 2:1-2.7-14; Salm 85:3-6.9-10; Luqa 11:1-4.
■ Il-Ħamis 6 ta’ Ottubru: Ferja / San Bruno, Presbiteru (T). Qari: Galatin 3:1-5; Salm Luqa 1:69-73.75; Luqa 11:5-13.
■ Il-Ġimgħa 7 ta’ Ottubru: L-Imqaddsa Verġni Marija tar-Rużarju (TO). Qari: Galatin 3:7-14; Salm 9:2-3.6.6.8-9; Luqa 11:15-26.
■ Is-Sibt 8 ta’ Ottubru: f’Malta: L-Anniversarju tad-Dedikazzjoni tal-Katidral ta’ Malta (F). Qari: 1 Slaten 8:22-23.27-30; Salm 83:3-5.10-11; Luqa 19:1-10; ■ f’Għawdex: Ferja / L-Imqaddsa Verġni Marija f’Jum is-Sibt (T). Qari: Galatin 3:22-29; Salm 104:2-7; Luqa 11:27-28.
F = Festa; TO = Tifkira Obbligatorja; T = Tifkira
Il-kulur ħdejn id-data jindika l-kulur liturġiku tal-ġurnata.