IS-27 ĦADD TA’ MATUL IS-SENA B
AQRA L-KELMA - Il-liturġija tal-Kelma
L-Ewwel Qari
Qari mill-Ktieb tal-Ġenesi (2:18-24)
Il-Mulej Alla qal: «Mhux sewwa li l-bniedem jibqa’ waħdu. Ħa nagħmillu għajnuna tgħodd għalih.»
U l-Mulej Alla sawwar mill-art l-annimali selvaġġi u t-tajr kollu tal-ajru, u ġiebhom quddiem il-bniedem biex jara xi jsemmihom; u skont ma jkun il-bniedem semma’ lil kull ħliqa ħajja, dak ikun isimha. U l-bniedem ta isem lil kull bhima u ’l kull tajra tal-ajru, u ’l kull annimal selvaġġ; imma għall-bniedem ma nstabet ebda għajnuna tgħodd għalih. U l-Mulej Alla tefa’ nagħsa tqila fuq il-bniedem; u dan raqad. U ħadlu waħda minn kustiljih u flokha mlieh bil-laħam. U l-Mulej Alla sawwar il-kustilja, li kien ħa mill-bniedem, f’mara u ġiebha lill-bniedem. Imbagħad il-bniedem qal: «Din id-darba din hi għadma minn għadmi, u laħam minn laħmi, għalhekk tissejjaħ mara, għax mir-raġel ittieħdet hi.» Għalhekk ir-raġel iħalli lil missieru u lil ommu u jingħaqad ma’ martu u jsiru ġisem wieħed.
Il-Kelma tal-Mulej. Irroddu ħajr lil Alla.
SALM RESPONSORJALI (Salm 127)
R/. Iberikna l-Mulej il-jiem kollha ta’ ħajjitna!
Hieni kull min jibża’ mill-Mulej,
kull min jimxi fit-triqat tiegħu!
Mix-xogħol ta’ jdejk inti tiekol;
hieni int, u risqek tajjeb! R/.
Martek tkun bħal dielja għammiela
fl-irkejjen ta’ darek;
uliedek bħal xitel taż-żebbuġ
madwar il-mejda tiegħek. R/.
Ara, kif ikun imbierek
il-bniedem li jibża’ mill-Mulej!
Ibierkek il-Mulej minn Sijon! R/.
Jalla tara l-ġid ta’ Ġerusalemm
tul ħajtek kollha!
Jalla tara wlied uliedek!
Sliem għal Israel! R/.
IT-TIENI QARI
Qari mill-Ittra lil-Lhud (2:9-11)
Ħuti, lil dak li għal ftit taż-żmien kien imniżżel ftit inqas mill-anġli, lil Ġesù, aħna issa qegħdin narawh imżejjen fil-glorja u l-ġieħ minħabba fil-mewt li hu bata, biex għall-grazzja ta’ Alla, il-mewt li daq tkun għall-ġid ta’ kulħadd.
Għax kien jixraq li Alla, li għalih u bih sar kollox, waqt li jwassal ħafna wlied għall-glorja, jagħmel li l-Awtur tas-salvazzjoni tagħhom ikun perfett bis-saħħa tas-sofferenzi.
Għax kemm dak li jqaddes, u kemm dawk li huma mqaddsin, ilkoll huma mill-istess wieħed. U għalhekk Ġesù ma jistħix isejħilhom ħutu.
Il-Kelma tal-Mulej. Irroddu ħajr lil Alla.
AKKLAMAZZJONI QABEL L-EVANĠELJU (1Ġw 4:12)
Hallelujah. Hallelujah.
Lil Alla għadu ħadd ma rah, imma jekk inħobbu ’l xulxin hu jgħammar fina, u mħabbtu ssib il-milja tagħha fina.
Hallelujah!
L-EVANĠELJU
Qari mill-Evanġelju skont San Mark (10:2-16)
(Is-silta bejn qawsejn tista’ ma tinqarax)
F’dak iż-żmien, resqu xi Fariżej lejn Ġesù u biex iġarrbuh staqsewh jekk raġel jistax jitlaq lil martu. Weġibhom u qal: «X’ordnalkom Mosè?» Qalulu: «Mosè ta l-permess li wieħed jagħmel il-kitba tad-divorzju, u jibgħatha.» Imbagħad weġibhom Ġesù: «Minħabba l-ebusija ta’ qalbkom kitbilkom dan l-ordni. Iżda sa mill-bidu tal-ħolqien Alla għamilhom raġel u mara.
Għalhekk mela raġel iħalli lil missieru u ’l ommu u jingħaqad ma’ martu, u t-tnejn isiru ġisem wieħed. Għalhekk mhumiex iżjed tnejn, imma ġisem wieħed. Mela dak li għaqqad Alla ma għandux jifirdu l-bniedem.»
Xħin daħlu d-dar id-dixxipli reġgħu staqsewh fuq dan, u hu qalilhom: «Min jitlaq lil martu u jiżżewweġ oħra jkun ħati ta’ adulterju kontra l-ewwel waħda; u jekk mara titlaq lil żewġha u tiżżewweġ ieħor tkun ħatja ta’ adulterju.»
(Ġibulu quddiemu xi tfal ċkejknin biex iberikhom, iżda d-dixxipli tiegħu qabdu jgħajtu magħhom. Ġesù, meta ra hekk, inkorla u qalilhom: «Ħalluhom it-tfal żgħar jiġu għandi; iżżommuhomx, għax ta’ min hu bħalhom hija s-Saltna ta’ Alla. Tassew ngħidilkom, li min is-Saltna ta’ Alla ma jilqagħhiex bħal tifel ċkejken ma jidħolx fiha.» Imbagħad ħaddanhom miegħu u qiegħed idejh fuqhom u berikhom.)
Il-Kelma tal-Mulej. Tifħir lilek Kristu.
IFHEM IL-KELMA - Kummenti dwar il-qari
- AUDIO -
- TEST -
- TEST -
GĦIX IL-KELMA - Il-Kalendarju Liturġiku tal-ġimgħa
It-tielet ġimgħa tas-Salterju
■ It-Tnejn 7 ta’ Ottubru: L-Imqaddsa Verġni Marija tar-Rużarju (TO). Qari: Galatin 1:6-12; Salm 110:1-2.7-10; Luqa 10:25-37.
■ It-Tlieta 8 ta’ Ottubru: f’Malta: L-Anniversarju tad-Dedikazzjoni tal-Katidral ta’ Malta (F). Qari: 1 Slaten 8:22-23.27-30; Salm 83:3-5.10-11; Luqa 19:1-10; ■ f’Għawdex: Ferja. Qari: Galatin 1:13-24; Salm 138:1-3.13-15; Luqa 10:38-42.
■ L-Erbgħa 9 ta’ Ottubru: Ferja / San Djonisju, isqof u sħabu, martri (T) / San Ġwann Leonardi, presbiteru (T). Qari: Galatin 2:1-2.7-14; Salm 85:3-6.9-10; Luqa 11:1-4.
■ Il-Ħamis 10 ta’ Ottubru: Ferja. Qari: Galatin 3:1-5; Salm Luqa 1:69-73.75; Luqa 11:5-13.
■ Il-Ġimgħa 11 ta’ Ottubru: f’Malta: Ferja / San Ġwanni XXIII, papa (T). Qari: Galatin 3:7-14; Salm 9:2-3.6.6.8-9; Luqa 11:15-26; ■ f’Għawdex: L-Anniversarju tad-Dedikazzjoni tal-Katidral (F). Qari: 1 Slaten 8:22-23.27-30; Salm 83:3-5.10-11; Luqa 19:1-10.
■ Is-Sibt 12 ta’ Ottubru: Ferja / L-Imqaddsa Marija Verġni f’jum is-Sibt (T). Qari: Galatin 3:22-29; Salm 104:2-7; Luqa 11:27-28.
F = Festa; TO = Tifkira Obbligatorja; T= Tifkira.
Il-kulur ħdejn id-data jindika l-kulur liturġiku tal-ġurnata.