Is-26 Ħadd ta' matul is-sena - Sena A
AQRA L-KELMA - Il-liturġija tal-Kelma
L-EWWEL QARI
Qari mill-Ktieb tal-Profeta Eżekjel (18:25-28)
Dan jgħid il-Mulej: «Intom tgħidu: “Mhijiex sewwa l-imġiba tal-Mulej!” Issa isimgħu, dar Israel: Forsi l-imġiba tiegħi mhijiex sewwa? Mhux l-imġiba tagħkom li mhijiex sewwa?
Jekk wieħed ġust jitbiegħed mill-ġustizzja tiegħu u jagħmel il-ħażen, u jmut minħabba dan, minħabba ħżunitu jkun miet.
Imma jekk il-midneb jerġa’ lura mid-dnub li jkun għamel, u jagħmel il-ħaqq u l-ġustizzja, hu jsalva ruħu. Għax ikun intebaħ u reġa’ lura mid-dnubiet kollha li jkun għamel, u jibqa’ ħaj u ma jmutx.»
Il-Kelma tal-Mulej. Irroddu ħajr lil Alla.
SALM RESPONSORJALI (Salm 24)
R/. Ftakar fil-ħniena u t-tjieba tiegħek, Mulej!
Triqatek, Mulej, għarrafni,
il-mogħdijiet tiegħek għallimni.
Mexxini fis-sewwa tiegħek
u għallimni,
għax int Alla
tas-salvazzjoni tiegħi.
Għalik nixxennaq il-jum kollu. R/.
Ftakar fil-ħniena
u fit-tjieba tiegħek,
għax huma minn dejjem, Mulej.
Tiftakarx fil-ħtijiet
u fid-dnubiet ta’ żgħożiti:
inti tajjeb, Mulej;
ftakar fija skont
it-tjieba tiegħek. R/.
Tajjeb u sewwa l-Mulej;
għalhekk juri triqtu lill-ħatja.
Imexxi l-imsejkna fis-sewwa,
jgħallem lill-fqajrin
it-triq tiegħu. R/.
IT-TIENI QARI
Qari mill-Ittra ta’ San Pawl Appostlu lill-Filippin (2:1-11)
(Is-silta bejn qawsejn tista’ ma tinqarax)
Ħuti, jekk hemm fikom xi faraġ fi Kristu; jekk hemm xi kelma ta’ ħlewwa fl-imħabba; jekk hemm xi xirka fl-Ispirtu; jekk hemm xi ħniena u mogħdrija; kunu fehma waħda u mlewni bil-ferħ! Ħa jkollkom l-istess imħabba, u ruħ waħda u ħsieb wieħed.
Tagħmlu xejn b’pika ta’ partit, anqas għall-ftaħir fieragħ; imma kunu umli u kull wieħed minnkom iqis lill-ieħor aħjar minnu. Ħadd minnkom ma għandu jfittex li jaqbillu, imma li jaqbel lil ħaddieħor.
Aħsbu bħalma kien jaħseb Kristu Ġesù: (hu li għad li kellu n-natura ta’ Alla, ma qagħadx ifittex tiegħu li hu daqs Alla, iżda xejjen lilu nnifsu billi ħa n-natura ta’ lsir; sar jixbah lill-bnedmin, u deher minn barra bħala bniedem; ċekken lilu nnifsu, billi obda sal-mewt, anzi sal-mewt tas-salib. Għalhekk Alla għollieh sas-smewwiet u żejnu bl-isem li hu fuq kull isem, biex fl-isem ta’ Ġesù – fis-sema, fl-art u f’qiegħ l-art – il-ħlejjaq kollha jinżlu għarkupptejhom, u kull ilsien jistqarr: «Ġesù Kristu hu l-Mulej,» għall-glorja ta’ Alla l-Missier.)
Il-Kelma tal-Mulej. Irroddu ħajr lil Alla.
AKKLAMAZZJONI QABEL L-EVANĠELJU
Hallelujah. Hallelujah. (Ġw 10:27)
In-nagħaġ tiegħi jisimgħu leħni, u jiena nagħrafhom, u huma jimxu warajja.
Hallelujah!
L-EVANĠELJU
Qari mill-Evanġelju skond San Mattew (16:21-27)
F’dak iż-żmien, Ġesù qal lill-qassisin il-kbar u lix-xjuħ tal-poplu: «Intom x’jidhrilkom? Kien hemm raġel li kellu żewġ ulied. Resaq fuq il-kbir u qallu: “Ibni, illum mur aħdem l-għalqa tad-dwieli.” U dak qallu: “Ma rridx.” Iżda mbagħad biddel il-fehma u mar. Resaq fuq l-ieħor u qallu l-istess. “Arani sejjer, sidi,” qallu dan, u ma mar xejn. Min minnhom it-tnejn għamel kif ried il-missier?» «L-ewwel wieħed,» weġbuh. U qalilhom Ġesù: «Tassew, ngħidilkom, li l-pubblikani u n-nisa tat-triq deħlin qabilkom fis-Saltna ta’ Alla. Għax Ġwanni ġie għandkom miexi fit-triq tal-ġustizzja, u intom ma emmintuhx iżda l-pubblikani u n-nisa tat-triq emmnuh; u għalkemm intom rajtu dan kollu, bqajtu sa l-aħħar ma biddiltux il-fehma tagħkom, u ma emmintuhx.»
Il-Kelma tal-Mulej. Tifħir lilek Kristu.
IFHEM IL-KELMA - Kummenti dwar il-qari
- AUDIO -
GĦIX IL-KELMA - Il-Kalendarju Liturġiku tal-ġimgħa
It-tieni ġimgħa tas-Salterju
■ It-Tnejn 2 ta’ Ottubru: L-Anġli Kustodji Mqaddsa (TO). Qari: Eżodu 23:20-23; Salm 90:1-6.10-11; Mattew 18:1-5.10.
■ It-Tlieta 3 ta’ Ottubru: Ferja. Qari: Żakkarija 8:20-23; Salm 86:1-3.4-5.6-7; Luqa 9:51-56.
■ L-Erbgħa 4 ta’ Ottubru: San Franġisk ta’ Assisi, djaknu (TO). Qari: Neħemija 2:1-8; Salm 136:1-2.3.4-5.6; Luqa 9:57-62.
■ Il-Ħamis 5 ta’ Ottubru: Ferja / Santa Fawstina Kowalska, verġni (T). Qari: Neħemija 8:1-4a.5-6.7b-12; Salm 18:8.9.10.11; Luqa 10:1-12.
■ Il-Ġimgħa 6 ta’ Ottubru: Ferja / San Bruno, presbiteru (T). Qari: Baruk 1:15-22; Salm 78:1-2.3-5.8.9; Luqa 10:13-16.
■ Is-Sibt 7 ta’ Ottubru: L-Imqaddsa Verġni Marija tar-Rużarju (TO). Qari: Baruk 4:5-12.27-29; Salm 68:33-35.36-37; Luqa 10:17-24.
TO = Tifkira Obbligatorja; T = Tifkira.
Il-kulur ħdejn id-data jindika l-kulur liturġiku tal-ġurnata.