It-Twelid ta' Sidna Ġesù
AQRA L-KELMA - Il-liturġija tal-Kelma
L-EWWEL QARI
Qari mill-Ktieb tal-Profeta Isaija (52: 7-10)
Kemm huma sbieħ fuq il-muntanji r-riġlejn ta’ min iħabbar il-bxara, ta’ min ixandar is-sliem, ta’ min iħabbar ir-risq, ta’ min ixandar is-salvazzjoni, u jgħid lil Sijon: “Alla tiegħek isaltan.”
Ismagħha l-għajta! L-għassiesa tiegħek għollew leħenhom, ilkoll flimkien jgħajtu bil-ferħ, għax raw b’għajnejhom lill-Mulej rieġa’ lura f’Sijon. Intom, ħerbiet ta’ Ġerusalemm, għajtu lkoll bil-ferħ, għax farraġ il-Mulej il-poplu tiegħu, feda lil Ġerusalemm. Kixef il-Mulej id-driegħ tiegħu qaddis, quddiem il-ġnus kollha, u raw it-truf kollha tal-art is-salvazzjoni ta’ Alla tagħna.
Il-Kelma tal-Mulej. Irroddu ħajr lil Alla.
SALM RESPONSORJALI (Salm 97)
Rit: Raw it-truf kollha tal-art is-salvazzjoni ta’ Alla tagħna!
Għannu lill-Mulej għanja ġdida,
għax għamel ħwejjeġ tal-għaġeb.
Ġibitlu r-rebħa l-leminija tiegħu,
u d-driegħ imqaddes tiegħu. Rit…
Għarraf il-Mulej is-salvazzjoni tiegħu,
f’għajnejn il-ġnus wera
l-ġustizzja tiegħu.
Ftakar fit-tjieba u l-fedeltà tiegħu
mal-poplu ta’ Israel. Rit…
L-art kollha, minn tarf għall-ieħor,
rat is-salvazzjoni ta’ Alla tagħna.
Għajtu bil-ferħ lill-Mulej fl-art kollha,
infexxu fil-hena, ifirħu u għannu! Rit…
Għannu lill-Mulej biċ-ċetra,
biċ-ċetra u bil-ħlewwa tal-għana,
bit-trombi u bid-daqq tat-trumbetti;
għajtu bil-ferħ quddiem il-Mulej
is-sultan! Rit…
IT-TIENI QARI
Bidu tal-Ittra lil-Lhud (1:1-6)
Alla fl-imgħoddi kellem lil missirijietna ħafna drabi u b’ħafna manjieri permezz tal-profeti. Issa f’dan l-aħħar żmien, huwa kellimna permezz ta’ Ibnu, li hu għamlu werriet ta’ kollox, u li bih ukoll għamel il-ħolqien.
Hu, l-Iben, li hu d-dija tal-glorja ta’ Alla u x-xbieha tal-essenza tiegħu, u li jżomm id-dinja kollha bil-kelma setgħana tiegħu, wara li naddafna minn dnubietna, qagħad fuq il-lemin tal-kobor ta’ Alla fl-għoli tas-smewwiet, u b’hekk sar daqshekk aqwa mill-anġli daqs kemm ogħla minn tagħhom hu l-isem li kiseb.
Għax lil min mill-anġli qatt qal Alla: “Inti ibni, jiena llum nissiltek?” Jew: “Jiena nkun missieru, u hu jkun ibni?” Imbagħad, hu u jdaħħal lil Ibnu l-Kbir fid-dinja, jgħid ukoll: “Ħa jqimuh l-anġli kollha ta’ Alla.”
Il-Kelma tal-Mulej. Irroddu ħajr lil Alla.
AKKLAMAZZJONI QABEL L-EVANĠELJU (Lq 1:28)
Hallelujah. Hallelujah.
Jum imqaddes feġġ għalina: ejjew, ġnus, qimu l-Mulej: għax illum fuq l-art niżel dawl kbir.
Hallelujah!
L-EVANĠELJU
Qari mill-Evanġelju skont San Luqa (1:1-5.9-14)
Fil-bidu kien il-Verb, u l-Verb kien ma’ Alla, u l-Verb kien Alla. Hu kien fil-bidu ma’ Alla. Kollox bih sar, u xejn ma sar mingħajru; kulma sar kellu l-ħajja fih, u l-ħajja kienet id-dawl tal-bnedmin. Id-dawl jiddi fid-dlam, imma d-dlam ma għelbux.
Kien hemm raġel mibgħut minn Alla, jismu Ġwanni. Dan ġie bħala xhud, biex jixhed għad-dawl, biex bih kulħadd jemmen. Ġwanni ma kienx id-dawl, imma ġie biex jixhed għad-dawl, dak id-dawl veru, li jdawwal kull bniedem, huwa u ġej fid-dinja. Kien fid-dinja, u d-dinja saret bih, imma d-dinja ma għarfitux. Ġie f’daru, u niesu ma laqgħuhx.
Imma lil dawk li laqgħuh tahom is-setgħa li jsiru wlied Alla, dawk li jemmnu f’ismu, li twieldu mhux mid-demm, anqas mill-ġibda tal-ġisem, u anqas mir-rieda tal-bnedmin, iżda minn Alla. U l-Verb sar bniedem u għammar fostna, u aħna rajna l-glorja tiegħu, il-glorja li għandu mill-Missier bħala Ibnu l-waħdieni, mimli bil-grazzja u l-verità.
Ġwanni ta xhieda fuqu meta għajjat u qal: “Dan hu li għalih għidtilkom: Jiġi warajja, imma hu aqwa minni, għax kien minn qabli.” Għax mill-milja tiegħu aħna lkoll ħadna, grazzja fuq grazzja. Alla ta l-Liġi permezz ta’ Mosè imma l-grazzja u l-verità seħħu permezz ta’ Ġesù Kristu.
Lil Alla għadu ħadd ma rah; imma għarrafhulna l-Iben il-waħdieni ta’ Alla, li hu fi ħdan il-Missier.
Il-Kelma tal-Mulej. Tifħir lilek Kristu.
IFHEM IL-KELMA - Kummenti dwar il-qari
- AUDIO -
- AUDIO -
GĦIX IL-KELMA - Il-Kalendarju Liturġiku tal-ġimgħa
L-ewwel ġimgħa tas-salterju
■ It-Tnejn 26 ta’ Diċembru: San Stiefnu, protomartri (F). Qari: Atti 6:8-10; 7:54-59; Salm 30:3-4.6-.8.16; Mattew 10:17-22.
■ It-Tlieta 27 ta’ Diċembru: San Ġwann, appostlu u evanġelista (F). Qari: 1 Ġwanni 1:1-4; Salm 96:1-2.5-6.11-12; Ġwanni 20:2-8.
■ L-Erbgħa 28 ta’ Diċembru: Il-Qaddisin Innoċenti Martri (F). Qari: 1 Ġwanni 1:5-2: 2; Salm 123:2-5.7-8; Mattew 2:13-18.
■ Il-Ħamis 29 ta’ Diċembru: Il-ħames jum fl-Ottava tal-Milied. Qari: 1 Ġwanni 2:3-11; Salm 95:1-3.5-6; Luqa 2:22-35.
■ Il-Ġimgħa 30 ta’ Diċembru: Il-Familja Mqaddsa ta’ Ġesù, Marija u Ġużeppi (F). Qari: Sirak 3:2-6.12-14; jew Kolossin 3:12-21; Salm 127:1-5; Mattew 2:13-15.19-23.
■ Is-Sibt 31 ta’ Diċembru: Is-seba’ jum fl-Ottava tal-Milied. Qari: 1 Ġwanni 2:18-21; Salm 95:1-2.11-12.13; Ġwanni 1:1-18.
F = Festa
Il-kulur ħdejn id-data jindika l-kulur liturġiku tal-ġurnata.