Il-Familja Mqaddsa
AQRA L-KELMA - Il-liturġija tal-Kelma
L-EWWEL QARI
Qari mill-Ktieb tal-Ġenesi (15:1-6; 21:1-3)
F’dak iż-żmien, ġiet il-kelma tal-Mulej lil Abram f’dehra u qallu: «La tibżax, Abram! Jiena tarka għalik; ħlasek ikun kbir ħafna.» U Abram qallu: «Sidi Mulej, x’sa tagħtini, għax sa nibqa’ bla tfal, u l-werriet ta’ dari sa jkun Eligħeżer ta’ Damasku.» U Abram żied jgħid: «Ara, int lili ma tajtnix nisel, u qaddej dari sa jiritni.» U ara, waslitlu l-kelma tal-Mulej u qallu: «Ma jirtekx dan, imma wieħed ħiereġ mill-ġewwieni tiegħek, hu għad jirtek.» U ħarġu barra u qallu: «Ħares sewwa lejn is-smewwiet u għodd il-kwiekeb, jekk għandek ħila tgħoddhom.» U żied jgħidlu: «Hekk għad ikun nislek.» U hu emmen fil-Mulej, u dan għaddhulu b’ġustizzja. U l-Mulej żar lil Sara bħalma kien qalilha, u għamel magħha dak li kien wegħedha. U Sara tqalet u wildet iben lil Abraham fi xjuħitu, fiż-żmien li kien qallu Alla. U Abraham semma ’l ibnu li twelidlu, li kienet wilditlu Sara, Iżakk.
Il-Kelma tal-Mulej. Irroddu ħajr lil Alla.
SALM RESPONSORJALI (Salm 104)
R/.: Jaħweh hu Alla tagħna! Jiftakar għal dejjem fil-patt tiegħu
Faħħru l-Mulej u xandru ismu,
għarrfu lill-ġnus bl-għemejjel tiegħu.
Għannulu u doqqulu,
xandru l-għeġubijiet tiegħu kollha. Rit.
Ftaħru bl-isem qaddis tiegħu;
tifraħ il-qalb ta’ dawk li jfittxu l-Mulej.
Ħabirku biex tagħrfu l-Mulej u
l-qawwa tiegħu,
fittxu ’l wiċċu l-ħin kollu. R/.
Ftakru fil-ħwejjeġ kbar li għamel,
fl-għeġubijiet u l-ġudizzji tiegħu.
Nisel Abraham, il-qaddej tiegħu,
ulied Ġakobb, il-maħtur tiegħu. R/.
Jiftakar għal dejjem fil-patt tiegħu,
fil-kelma li ta għal elf nisel,
fil-patt li għamel ma’ Abraham,
fil-wegħda li ħalef lil Iżakk. R/.
IT-TIENI QARI
Qari mill-Ittra lil-Lhud (11:8.11-12.17-19)
Ħuti, kienet il-fidi li ġagħlet lil Abraham jobdi s-sejħa ta’ Alla, meta dan qallu biex imur f’art li kien sa jagħtih b’wirt; u telaq, bla ma kien jaf fejn kien sejjer. Kienet ukoll il-fidi li biha Sarah, mara mdaħħla fiż-żmien, setgħet titqal, għax hija għarfet li ta’ kelmtu kien dak li għamlilha l-wegħda. Kien għalhekk li minn bniedem wieħed, li kien tista’ tgħid mejjet, twieldu nies bil-kotra daqs il-kwiekeb tas-sema u daqs ir-ramel ta’ xatt il-baħar, li ħadd ma jista’ jgħoddu.
Kienet il-fidi li ġagħlet lil Abraham joffri ’l Iżakk meta Alla ġarrbu; u kien sa joffri lil ibnu l-waħdieni sewwasew dak li kien ħa l-wegħdiet, hu li Alla kien qallu: «Minn Iżakk int għad ikollok nisel.» Huwa fehem li Alla kellu s-setgħa saħansitra li jqajjem mill-mewt; u, fis-sens ta’ tixbiha, ħadu tabilħaqq lura mill-mewt.
Il-Kelma tal-Mulej. Irroddu ħajr lil Alla.
AKKLAMAZZJONI QABEL L-EVANĠELJU (Lhud 1:1-2)
Hallelujah. Hallelujah.
Alla fl-imgħoddi kellem lil missirijietna ħafna drabi u b’ħafna manjieri permezz tal-profeti. Issa f’dan l-aħħar żmien, huwa kellimna permezz ta’ Ibnu.
Hallelujah!
L-EVANĠELJU
Qari mill-Evanġelju skont San Luqa (2:22-40)
(Is-silta bejn qawsejn tista’ ma tinqarax)
Wara li għalqilhom iż-żmien għall-purifikazzjoni tagħhom skont il-Liġi ta’ Mosè, Marija u Ġużeppi ħadu lil Ġesù Ġerusalemm biex jippreżentawh lill-Mulej, (kif hemm miktub fil-Liġi tal-Mulej: «Kull tifel li jitwieled l-ewwel, jiġi kkonsagrat lill-Mulej» - u biex joffru b’sagrifiċċju par gamiem jew żewġ bċieċen, kif jingħad ukoll fil-Liġi tal-Mulej.
F’Ġerusalemm kien hemm wieħed, jismu Xmun, raġel ġust u tajjeb, li kien jistenna l-faraġ ta’ Israel u li kellu l-Ispirtu s-Santu fuqu. L-Ispirtu s-Santu kien nebbħu li ma kienx sa jara l-mewt qabel ma jara l-Messija tal-Mulej. Mar mela fit-tempju, imqanqal mill-Ispirtu, u xħin il-ġenituri daħlu bit-tarbija Ġesù biex jagħmlulu dak li kienet trid il-Liġi, huwa laqgħu fuq dirgħajh, bierek lil Alla u qal: «Issa, o Sid, tista’ tħalli l-qaddej tiegħek imur fis-sliem, skont kelmtek, għaliex għajnejja raw is-salvazzjoni tiegħek li int ħejjejt għall-popli kollha, dawl biex idawwal il-ġnus, u glorja tal-poplu tiegħek Israel.»
Missieru u ommu baqgħu mistagħġba b’dak li kien qiegħed jingħad fuqu. Xmun berikhom, u qal lil ommu Marija: «Ara, dan sa jġib il-waqgħa u l-qawmien ta’ ħafna f’Israel; sa jkun sinjal li jmeruh, – u inti wkoll, sejf jinfidlek ruħek! - biex jinkixfu l-ħsibijiet moħbija fil-qlub ta’ ħafna.» Kien hemm ukoll waħda profetissa, Anna, bint Fanwel, mit-tribù ta’ Aser. Kienet imdaħħla ħafna fiż-żmien; wara xbubitha kienet għamlet seba’ snin miżżewġa, u mbagħad romlot. Sa ma kellha erbgħa u tmenin sena ma kienet titwarrab qatt mit-tempju, lejl u nhar taqdi lil Alla fis-sawm u t-talb. Dak il-ħin stess waslet, u bdiet trodd ħajr lil Alla u titkellem fuq it-tarbija ma’ dawk kollha li kienu jistennew il-fidwa ta’ Ġerusalemm.)
Meta temmew kulma kellhom jagħmlu skont il-Liġi tal-Mulej reġgħu lura lejn il-Galilija fil-belt tagħhom ta’ Nazaret. U t-tifel baqa’ jikber u jissaħħaħ, mimli bl-għerf. U l-grazzja ta’ Alla kienet fuqu.
Il-Kelma tal-Mulej. Tifħir lilek Kristu.
IFHEM IL-KELMA - Kummenti dwar il-qari
- AUDIO -
- TEST -
GĦIX IL-KELMA - Il-Kalendarju Liturġiku tal-ġimgħa
L-ewwel ġimgħa tas-Salterju
■ It-Tnejn 1 ta’ Jannar: L-Imqaddsa Verġni Marija, Omm Alla (S). Qari: Numri 6:22-27; Salm 66:2-3.5.6.8; Galatin 4:4-7; Luqa 2:16-21.
■ It-Tlieta 2 ta’ Jannar: San Bażilju l-kbir u San Girgor Nazjanzenu, isqfijiet u dutturi tal-Knisja (TO). Qari: 1 Ġwanni 2:22-28; Salm 97:1.2-3ab.3ċd-4; Ġwanni 1:19-28.
■ L-Erbgħa 3 ta’ Jannar: Ferja ta’ Żmien il-Milied / L-Isem Imqaddes ta’ Ġesù (T). Qari: 1 Ġwanni 2:29 – 3:6; Salm 97:1.3ċd-4.5-6; Ġwanni 1:29-34.
■ Il-Ħamis 4 ta’ Jannar: Ferja ta’ Żmien il-Milied. Qari:1 Ġwanni 3:7-10; Salm 97:1.7-8.9; Ġwanni 1:35-42.
■ Il-Ġimgħa 5 ta’ Jannar: Ferja ta’ Żmien il-Milied. Qari: 1 Ġwanni 3:11-21; Salm 99:2-5; Ġw 1:43-51.
■ Is-Sibt 6 ta’ Jannar: Ferja ta’ Żmien il-Milied. Qari: 1 Ġwanni 5:5-13; Salm 147:12-13.14-15.19-20; Mark 1:7-11 jew Luqa 3:23-38.
S = Solennità; TO = Tifkira Obbligatorja; T = Tifkira.
Il-kulur ħdejn id-data jindika l-kulur liturġiku tal-ġurnata.