Il-5 Ħadd tar-Randan - Sena B
AQRA L-KELMA - Il-liturġija tal-Kelma
L-EWWEL QARI
Qari mill-Ktieb tal-Profeta Ġeremija (31:31-34)
Araw, għad jiġi żmien, oraklu tal-Mulej, meta jien nagħmel patt ġdid ma’ dar Israel u dar Ġuda; mhux bħall-patt li għamilt ma’ missirijiethom fiż-żmien meta qbadthom minn idejhom biex ħriġthom mill-art tal-Eġittu, il-patt tiegħi li huma kisru, għalkemm jien kont l-għarus tagħhom, oraklu tal-Mulej.
Imma dan ikun il-patt li għad nagħmel ma’ dar Israel wara dawk il-jiem, oraklu tal-Mulej. Inqiegħed il-liġi tiegħi fosthom u niktibha f’qalbhom; u jiena nkun Alla tagħhom, u huma jkunu l-poplu tiegħi. Ma jgħallmux iżjed lil xulxin, u ħadd ma jgħid lil ħuh: «Agħraf il-Mulej», għaliex ilkoll kemm huma jkunu jafuni, miż-żgħir sal-kbir, oraklu tal-Mulej. Għax jien naħfrilhom ħżunithom, u ħtijiethom ma niftakarhomx aktar.
Il-Kelma tal-Mulej. Irroddu ħajr lil Alla.
SALM RESPONSORJALI (Salm 50)
R/.: Oħloq fija qalb safja, o Alla!
Ikollok ħniena minni,
o Alla, fi tjubitek;
fil-kobor tal-ħniena tiegħek
ħassar ħtijieti.
Aħsilni kollni mill-ħtija tiegħi;
naddafni mid-dnub tiegħi. R/.
Oħloq fija qalb safja, o Alla,
u spirtu qawwi ġedded fija.
La twarrabnix minn quddiemek,
tneħħix minni
l-ispirtu qaddis tiegħek. R/.
Roddli l-hena
tas-salvazzjoni tiegħek,
u bi spirtu qalbieni wettaqni.
Lill-midinbin ngħallem triqatek,
u l-ħatjin jerġgħu lura lejk. R/.
IT-TIENI QARI
Qari mill-Ittra lil-Lhud (5:7-9)
Meta kien jgħix fuq din l-art, Kristu offra talb u suppliki b’leħen għoli u bid-dmugħ lil dak li seta’ jsalvah mill-mewt. U kien mismugħ minħabba fil-qima tiegħu lejn Alla. Għad li kien Iben, tgħallem minn dak li bata xi tfisser l-ubbidjenza. U billi laħaq il-perfezzjoni, sar awtur tas-salvazzjoni ta’ dejjem għal kull min jisma’ minnu.
Il-Kelma tal-Mulej. Irroddu ħajr lil Alla.
AKKLAMAZZJONI QABEL L-EVANĠELJU
Glorja u tifħir lilek, Kristu! (Ġw12:26)
Jekk xi ħadd irid jaqdini, hu għandu jimxi warajja; u fejn inkun jien, hemm ukoll ikun il-qaddej tiegħi.
Glorja u tifħir lilek, Kristu!
L-EVANĠELJU
Qari mill-Evanġelju skont San Ġwann (12:20-33)
F’dak iż-żmien, fost dawk li telgħu biex iqimu lil Alla fil-festa kien hemm xi Griegi. Dawn marru għand Filippu li kien minn Betsajda tal-Galilija, u talbuh: «Sinjur, nixtiequ naraw lil Ġesù.»
Filippu mar jgħid lil Indrì, u mbagħad Indrì u Filippu marru jgħidu lil Ġesù. U Ġesù weġibhom: «Waslet is-siegħa li fiha Bin il-bniedem ikun igglorifikat. Tassew tassew ngħidilkom, jekk il-ħabba tal-qamħ ma taqax fl-art u tmut, hi tibqa’ weħidha; imma jekk tmut, tagħmel ħafna frott. Min iħobb lil ħajtu jitlifha; imma min jobgħod lil ħajtu f’din id-dinja jħarisha għall-ħajja ta’ dejjem. Jekk xi ħadd irid jaqdini, hu għandu jimxi warajja, u fejn inkun jien, hemm ukoll ikun il-qaddej tiegħi. Min jaqdi lili, il-Missier jagħtih ġieħ. Issa qiegħed inħoss ruħi mħawda. U x’naqbad ngħid? Missier, eħlisni minn din is-siegħa? Imma jien għalhekk ġejt: għal din is-siegħa. Missier, agħti glorja lil ismek.»
Dak il-ħin instama’ leħen mis-sema: «Jien diġà gglorifikajtu, u nerġa’ nigglorifikah.»
In-nies li kienu hemm semgħuh, u qalu li kien qiegħed iriegħed. Oħrajn qalu: «Kellmu xi anġlu.» Ġesù wieġeb: «Dan il-leħen ma ġiex għalija, imma għalikom. Il-ġudizzju ta’ din id-dinja qiegħed isir issa. Issa sa jitkeċċa l-Prinċep ta’ din id-dinja. U meta nintrefa’ ’l fuq mill-art, jiena niġbed il-bnedmin kollha lejja.»
Hu qal dan biex jurihom b’liema mewta kien sa jmut.
Il-Kelma tal-Mulej. Tifħir lilek Kristu.
IFHEM IL-KELMA - Kummenti dwar il-qari
- AUDIO -
GĦIX IL-KELMA - Il-Kalendarju Liturġiku tal-ġimgħa
L-ewwel ġimgħa tas-Salterju
Quddiesa libera: 2 Slaten 4:18-21.32-37; Salm 16:1.6-8.15; Ġwanni 11:1-45.
■ It-Tnejn 18 ta’ Marzu: Ferja tar-Randan / San Ċirillu ta’ Ġerusalemm, isqof u duttur tal-Knisja (TL). Qari: Danjel 13:1-9.15-17.19-30.33-62; Salm 22:1-6; Ġwanni 8:1-11.
■ It-Tlieta 19 ta’ Marzu: San Ġużepp, Għarus tal-Verġni Mqaddsa Marija (S). Qari: 2 Samwel 7:4-5. 12-14. 16; Salm 88:2-5.27.29; Rumani 4:13.16-18.22; Mattew 1:16.18-21.24 jew Luqa 2:41-51.
■ L-Erbgħa 20 ta’ Marzu: Ferja tar-Randan. Qari: Danjel 3:14-20.91-92.95; Salm Danjel 3:52-56; Ġwanni 8:31-42.
■ Il-Ħamis 21 ta’ Marzu: Ferja tar-Randan. Qari: Ġenesi 17:3-9; Salm 104:4-5.6-7.8-9; Ġwanni 8:51-59.
■ Il-Ġimgħa 22 ta’ Marzu: Ferja tar-Randan. Qari: Ġeremija 20:10-13; Salm 17:2-7; Ġwanni 10:31-42.
■ Is-Sibt 23 ta’ Marzu: Ferja tar-Randan. Qari: Eżekjel 37:21-28; Salm Ġeremija 31:10-13; Ġwanni 11:45-56.
S = Solennità; TL = Tifkira Limitata.
Il-kulur ħdejn id-data jindika l-kulur liturġiku tal-ġurnata.