Il-5 Ħadd ta' matul is-sena - Sena A
AQRA L-KELMA - Il-liturġija tal-Kelma
L-EWWEL QARI
Qari mill-Ktieb tal-Profeta Isaija (58:7-10)
Dan jgħid il-Mulej: “Mhux dan is-sawm li jiena rrid li taqsam ħobżok ma’ min hu bil-ġuħ, u ddaħħal f’darek lill-imsejken bla saqaf? Mhux li tlibbes lil min tara għarwien, u n-nies ta’ darek ma tinsihomx?
Imbagħad ifeġġ bħaż-żerniq id-dawl tiegħek, u malajr tagħlaqlek il-ġerħa tiegħek. Quddiemek timxi l-ġustizzja tiegħek, u l-glorja tal-Mulej timxi warajk.
Jekk biss issejjaħlu, iwieġeb il-Mulej; jekk tgħajjatlu, jgħidlek: “Hawn jien!” Jekk tneħħi minn nofsok il-moħqrija, ma tmiddx subgħek u ma tagħmilx deni bi lsienek, jekk int qalbek toħroġ għall-imġewwaħ, u xxabba’ qalb l-imnikket, imbagħad id-dawl tiegħek ifiġġ fid-dlam, u s-swied tiegħek ikun bħan-nofsinhar.”
Il-Kelma tal-Mulej. Irroddu ħajr lil Alla.
SALM RESPONSORJALI (Salm 111)
Rit: Dawl fid-dlam ifeġġ għat-tajbin!
Dawl fid-dlam ifeġġ għat-tajbin;
twajjeb u ħanin il-bniedem sewwa.
Tajjeb il-bniedem li jħenn u jislef,
li jmexxi ħwejġu bir-reqqa. Rit…
Għax il-bniedem ġust
qatt ma jitfixkel;
għal dejjem tibqa’ t-tifkira tiegħu.
Xejn ma jibża’ minn aħbar ħażina;
qalbu qawwija bit-tama tal-Mulej. Rit…
Qalbu qawwija,
m’għandux mniex jibża’.
Iqassam u jagħti lill-foqra;
għal dejjem tibqa’ l-ġustizzja tiegħu;
rasu merfugħa bil-ġieħ. Rit…
IT-TIENI QARI
Qari mill-Ewwel Ittra ta’ San Pawl Appostlu lill-Korintin (2:1-5)
Meta jiena wasalt għandkom, ħuti, ma ġejtx inħabbrilkom il-Misteru ta’ Alla bi kliem kbir jew għaref. Ma ppretendejtx li kont naf xi ħaġa fostkom, ħlief lil Ġesù Kristu, u lil dan imsallab.
Jiena ġejt għandkom dgħajjef, imbażża’ u mriegħed. Il-kelma u l-predikazzjoni tiegħi ma kinux imlibbsa bil-kliem qawwi tal-għerf, imma bil-wiri tal-Ispirtu u l-qawwa, sabiex il-fidi tagħkom tinbena mhux fuq l-għerf tal-bniedem, imma fuq il-qawwa ta’ Alla.
Il-Kelma tal-Mulej. Irroddu ħajr lil Alla.
AKKLAMAZZJONI QABEL L-EVANĠELJU
Hallelujah. Hallelujah. (Ġw 8:12)
Jiena d-dawl tad-dinja, jgħid il-Mulej; min jiġi warajja jkollu d-dawl tal-ħajja.
Hallelujah!
L-EVANĠELJU
Qari mill-Evanġelju skont San Mattew (5:13-16)
F’dak iż-żmien: Ġesù qal lid-dixxipli tiegħu: “Intom il-melħ tal-art. Imma jekk il-melħ jaqta’, biex jerġa’ jieħu t-togħma? Ma jibqa’ tajjeb għal xejn iżjed ħlief biex jintrema barra u jintrifes min-nies.
Intom id-dawl tad-dinja. Belt li tkun qiegħda fuq muntanja ma tistax tinħeba. Anqas ma jixegħlu l-musbieħ u jqegħduh taħt is-siegħ, iżda fuq l-imnara, u hekk idawwal lil kull min ikun fid-dar. Hekk għandu jiddi d-dawl tagħkom quddiem il-bnedmin, biex jaraw l-għemejjel tajba tagħkom u jagħtu glorja lil Missierkom li hu fis-smewwiet.”
Il-Kelma tal-Mulej. Tifħir lilek Kristu.
IFHEM IL-KELMA - Kummenti dwar il-qari
- VIDEO -
Fr Elija Vella OFMConv.
- AUDIO -
GĦIX IL-KELMA - Il-Kalendarju Liturġiku tal-ġimgħa
L-ewwel ġimgħa tas-salterju
■ It-Tnejn 6 ta’ Frar: San Pawl Miki u sħabu, martri (TO). Qari: Ġenesi 1:1-19; Salm 103:1-2a.5-6.10 u 12.24 u 35ċ; Mark 6:53-56.
■ It-Tlieta 7 ta’ Frar: Ferja. Qari: Ġenesi 1:20 – 2, 4a; Salm 8:4-5.6-7.8-9; Mark 7:1-13.
■ L-Erbgħa 8 ta’ Frar: Ferja / San Ġirolmu Emiliani, presbiteru u reliġjuż (T) / Santa Ġużeppina Bakhita, verġni (T). Qari: Ġenesi 2:4b-9.15-17; Salm 103:1-2a.27-28.29bċ-30; Mark 7:14-23.
■ Il-Ħamis 9 ta’ Frar: Santa Skolastika, verġni (TO). Qari: Ġenesi 2:18-25; Salm 127:1-2.3.4-5; Mark 7:24-30.
■ Il-Ġimgħa 10 ta’ Frar: L-Appostlu Missierna San Pawl, Patrun ta’ Malta (S). Qari: Għerf 14:3-7; Salm 106:21-31; Atti 27:16 – 28:10; jew 2 Korintin 11:18.24-31; Mark 16:15-20.
■ Is-Sibt 11 ta’ Frar: Ferja / Il-Verġni Mqaddsa Marija ta’ Lourdes (T). Qari: Ġenesi 3:9-24; Salm 89:2.3-4.5-6.12-13; Mark 8:1-10.
S = Solenità; TO = Tifkira Obbligatorja; T = Tifkira.
Il-kulur ħdejn id-data jindika l-kulur liturġiku tal-ġurnata.