Il-31 Ħadd ta' matul is-sena - Sena Ċ
AQRA L-KELMA - Il-liturġija tal-Kelma
L-EWWEL QARI
Qari mill-Ktieb tal-Għerf (11:22–12:2)
Mulej, quddiemek id-dinja kollha qisha traba fil-miżien, jew qatra nida tal-għodwa li tinżel fuq l-art.
Iżda int tħenn għal kulħadd, għax tista’ kollox; int tagħlaq għajnejk għal dnubiet il-bnedmin biex huma jindmu.
Għax int tħobb il-ħlejjaq kollha, u xejn ma tistmell minn kulma għamilt; li kien hemm xi ħaġa li stajt tobgħodha, int ma kontx tagħmilha.
Kif setgħet tibqa’ xi ħaġa fid-dinja kieku int ma ridthiex? Jew kif setgħet iżżomm, kieku int ma sejjaħtilhiex?
Imma int, o Sid li tħobb kulma jgħix, lil kulħadd tagħder, għax kollox huwa tiegħek. Għax f’kulħadd hemm nifsek bla ma qatt jintemm.
Għalhekk int twiddeb bil-ftit il-ftit lil dawk li jonqsu, twissihom u tfakkarhom fejn dinbu, biex jerġgħu lura mill-ħażen tagħhom, u fik, Mulej, iqiegħdu t-tama tagħhom.
Il-Kelma tal-Mulej. Irroddu ħajr lil Alla.
SALM RESPONSORJALI (Salm 144)
Rit: Mulej, inbierek ismek għal dejjem ta’ dejjem!
Ħa nkabbrek, Alla tiegħi, sultan,
u nbierek ismek għal dejjem ta’ dejjem.
Kuljum irrid inbierkek,
u nfaħħar ismek għal dejjem ta’ dejjem. Rit…
Twajjeb u ħanin il-Mulej,
idum biex jagħdab u kollu tjieba.
Twajjeb ma’ kulħadd il-Mulej,
tjubitu fuq kulma għamel. Rit…
Kulma għamilt iroddlok ħajr, Mulej;
iberkuk il-ħbieb tiegħek kollha.
Is-sebħ tas-saltna tiegħek ixandru,
fuq is-setgħa tiegħek jitkellmu. Rit…
Ta’ kelmtu l-Mulej fil-wegħdiet tiegħu kollha, twajjeb f’dak kollu li għamel.
Iwieżen il-Mulej ’il kull min sa jaqa’,
iqajjem ’il kull min hu mitluq. Rit…
IT-TIENI QARI
Qari mit-Tieni Ittra ta’ San Pawl Appostlu lit-Tessalonikin (1:11–2:2)
Ħuti, aħna dejjem nitolbu għalikom li Alla tagħna jagħmilkom denji tas-sejħa tiegħu, u jagħmel li bil-qawwa tiegħu sseħħ kull rieda tajba tagħkom għall-ġid u kull ħidma tal-fidi tagħkom. U hekk l-isem ta’ Sidna Ġesù Kristu jkun igglorifikat fikom u intom fih skont il-grazzja ta’ Alla tagħna u tal-Mulej Ġesù Kristu.
Ħuti, għal dak li għandu x’jaqsam mal-miġja ta’ Sidna Ġesù Kristu u l-ġemgħa tagħna biex ningħaqdu miegħu, nitolbukom biex ma toqogħdux tħawdu raskom malajr u tinħasdu bħallikieku l-miġja ta’ jum il-Mulej qorbot, u la jekk tkunu mnebbħin mill-ispirtu u lanqas jekk tisimgħu xi kelma jew taqraw xi ittra taparsi mingħandna.
Il-Kelma tal-Mulej. Irroddu ħajr lil Alla.
AKKLAMAZZJONI QABEL L-EVANĠELJU
Hallelujah. Hallelujah. (Ġw 3:16)
Alla hekk ħabb lid-dinja li ta lil Ibnu l-waħdieni, biex kull min jemmen fih ikollu l-ħajja ta’ dejjem.
Hallelujah!
L-EVANĠELJU
Qari mill-Evanġelju skont San Luqa (19:1-10)
F’dak iż-żmien, Ġesù daħal Ġeriko u kien għaddej mit-triq. Mela jkun hemm raġel, jismu Żakkew; dan kien wieħed mill-kapijiet tal-pubblikani, u kien għani. Kellu xewqa li jara min kien Ġesù, imma ma setax minħabba l-folla, billi kien raġel qasir. Għalhekk mar jiġri ’l quddiem u xxabbat ma’ siġra tat-tin selvaġġ, għax minn dik in-naħa kien sa jgħaddi.
Ġesù, kif wasal hemm, ħares ’il fuq u qallu: «Żakkew, isa, inżel minn hemm, għax illum jeħtieġli noqgħod għandek.» Dak niżel bla telf ta’ żmien, u kollu ferħan laqgħu għandu. In-nies, meta rawh, ilkoll bdew igemgmu bejniethom u jgħidu li għand wieħed midneb daħal jistrieħ.
Imma Żakkew, wieqaf, qal lill-Mulej: «Ara, Mulej, nofs ġidi sa nagħtih lill-foqra, u jekk jien qarraqt b’xi ħadd irroddlu għal erba’ darbiet iżjed.»
Qallu Ġesù: «F’din id-dar illum daħlet is-salvazzjoni, għax dan ir-raġel ukoll huwa bin Abraham. Għax Bin il-bniedem ġie jfittex u jsalva l-mitluf.»
Il-Kelma tal-Mulej. Tifħir lilek Kristu.
IFHEM IL-KELMA - Kummenti dwar il-qari
- VIDEO -
Fr Elija Vella OFMConv.
- AUDIO -
GĦIX IL-KELMA - Il-Kalendarju Liturġiku tal-ġimgħa
It-tielet ġimgħa tas-salterju
■ It-Tnejn 31 ta’ Ottubru: Ferja. Qari: Ferja. Filippin 2:1-4; Salm 130:1-3; Luqa 14:12-14.
■ It-Tlieta 1 ta’ Novembru: Il-Qaddisin Kollha (S). Qari: Apokalissi 7:2-4.9-14; Salm 23:1-6; 1 Ġwanni 3:1-3; Mattew 5:1-12.
■ It-Tlieta 2 ta’ Novembru: Tifkira Solenni tal-Fidili Mejtin. Qari: l-ewwel quddiesa: Ġob 19:1.23-27; Salm 26:1.4.7-9.13-18; Rumani 5:5-11; Mattew 5:1-12. It-tieni quddiesa: Għerf 3:1-9; Salm 114: 5-6. 115: 10-11. 15-16; Rumani 5: 17-21; Mattew 11: 25-30. It-tielet quddiesa: Għerf 4:7-15; Salm 22:1-6; Rumani 6: 2-9; Mattew 25:1-13.
■ Il-Ħamis 3 ta’ Novembru: Ferja / San Martin de Porres, reliġjuż (T). Qari: Filippin 3:3-8; Salm 104:2-7; Luqa 15:1-10.
■ Il-Ġimgħa 4 ta’ Novembru: San Karlu Borromeo, isqof (TO). Qari: Filippin 3:17–4:1; Salm 121:1-5; Luqa 16:1-8.
■ Is-Sibt 5 ta’ Novembru: Ferja / L-Imqaddsa Verġni Marija f’Jum is-Sibt (T). Qari: Filippin 4:10-19; Salm 111:1-2.5-6.8.9; Luqa 16:9-15.
S = Solennità; TO = Tifkira Obbligatorja; T = Tifkira
Il-kulur ħdejn id-data jindika l-kulur liturġiku tal-ġurnata.