Il-25 Ħadd ta' matul is-sena - Sena A
AQRA L-KELMA - Il-liturġija tal-Kelma
L-EWWEL QARI
Qari mill-Ktieb tal-Profeta Isaija (55:6-9)
Fittxu l-Mulej sakemm tistgħu ssibuh, sejħulu sakemm hu fil-qrib!
Ħa jħalli triqtu l-midneb, u l-bniedem il-ħażin fehmietu; ħa jerġa’ lura għand il-Mulej u jħenn għalih, għand Alla tagħna għax hu jaħfer ħafna.
Il-fehmiet tiegħi mhumiex fehmietkom, u t-triqat tiegħi mhumiex triqatkom. Oraklu tal-Mulej.
Għax daqskemm huma ogħla s-smewwiet mill-art, daqshekk ieħor huma triqati ’l fuq minn triqatkom, u l-fehmiet tiegħi mill-fehmiet tagħkom.
Il-Kelma tal-Mulej. Irroddu ħajr lil Alla.
SALM RESPONSORJALI (Salm 144)
Rit: Qrib il-Mulej lejn kull min isejjaħlu!
Kuljum irrid inbierkek, u nfaħħar ismek għal
dejjem ta’ dejjem.
Kbir il-Mulej, ta’ min ifaħħru bil-bosta,
bla tarf il-kobor tiegħu. Rit…
Twajjeb u ħanin il-Mulej,
idum biex jagħdab u kollu tjieba,
Twajjeb ma’ kulħadd il-Mulej,
tjubitu fuq kulma għamel. Rit…
Ġust il-Mulej
fl-imġiba tiegħu kollha,
twajjeb f’dak kollu li għamel.
Qrib il-Mulej lejn kull min isejjaħlu,
lejn kull min isejjaħlu fis-sewwa. Rit…
IT-TIENI QARI
Qari mill-Ittra ta’ San Pawl Appostlu lill-Filippin (1:20c-24.27a)
Ħuti, Kristu jkun imsebbaħ fil-ġisem tiegħi, sew jekk ngħix u sew jekk immut.
Għax għalija l-ħajja hi Kristu, u l-mewt hi rebħ.
Jekk għandi nibqa’ ħaj fil-ġisem, dan ifisser li għandi nagħti l-frott tax-xogħol tiegħi. X’naqbad nagħmel ma nafx; ninsab bejn ħaltejn. Min-naħa l-waħda, nixtieq nintemm u nkun ma’ Kristu, li jkun ħafna aħjar għalija; min-naħa l-oħra, jekk nibqa’ ngħix fil-ġisem, ikun ħafna aħjar għalikom.
Ħaġa waħda ngħidilkom: ġibu ruħkom kif jixraq lill-Evanġelju ta’ Kristu.
Il-Kelma tal-Mulej. Irroddu ħajr lil Alla.
AKKLAMAZZJONI QABEL L-EVANĠELJU
Hallelujah. Hallelujah. (Atti 16:14b)
Mulej iftħilna qalbna biex nifhmu l-kliem ta’ Ibnek Ġesù Kristu.
Hallelujah!
L-EVANĠELJU
Qari mill-Evanġelju skond San Mattew (16:21-27)
F’dak iż-żmien, Ġesù qal lid-dixxipli tiegħu din il-parabbola: «Is-Saltna tas-Smewwiet tixbah lil wieħed sid li ħareġ filgħodu kmieni ħafna biex isib nies tax-xogħol u jħaddimhom fl-għalqa tiegħu tad-dwieli. Ftiehem ma’ xi ħaddiema b’dinar kuljum u bagħathom l-għalqa. Ħareġ ukoll madwar it-tielet siegħa, ra oħrajn qegħdin fil-pjazza, bla xogħol, u qalilhom: “Morru intom ukoll l-għalqa, u nagħtikom li jkun ħaqqkom.” U marru. Raġa’ ħareġ għal xi s-sitt siegħa u mbagħad għal xi d-disgħa siegħa, u għamel l-istess. Għall-ħabta tal-ħdax-il siegħa raġa’ ħareġ u sab oħrajn qiegħda, u qalilhom: “Għaliex qegħdin hawn il-jum kollu ma tagħmlu xejn?” Qalulu: “Għax ħadd ma qabbadna.” Qalilhom: “Morru intom ukoll l-għalqa.”
Għal filgħaxija mbagħad sid l-għalqa qal lill-prokuratur tiegħu: “Sejjaħ lill-ħaddiema u ħallashom, ibda minn dawk li ġew l-aħħar u spiċċa b’dawk tal-ewwel.” Ġew dawk li daħlu għax-xogħol fil-ħdax-il siegħa u ħadu dinar kull wieħed. Ġew tal-ewwel, u stennew li kienu sa jirċievu iktar, iżda huma wkoll ħadu dinar kull wieħed. Huma u jitħallsu qabdu jgemgmu kontra s-sid u jgħidu: “Dawn tal-aħħar siegħa waħda għamlu, u int qisthom bħalna li tgħabbejna bil-piż tal-jum u s-sħana!” Qabeż is-sid u qal lil wieħed minnhom: “Ħabib, minn xejn ma nqastek jien; mhux b’dinar ftehemt miegħi? Ħu li jmissek u itlaq. Lil dan tal-aħħar irrid nagħtih daqs kemm tajt lilek. Ma nistax nagħmel li rrid bi ħwejġi jien? Jew qiegħed tgħir għax jien qalbi tajba?” Hekk tal-aħħar jiġu l-ewwel, u tal-ewwel jiġu l-aħħar.»
Il-Kelma tal-Mulej. Tifħir lilek Kristu.
IFHEM IL-KELMA - Kummenti dwar il-qari
- AUDIO -
GĦIX IL-KELMA - Il-Kalendarju Liturġiku tal-ġimgħa
L-ewwel ġimgħa tas-Salterju
■ It-Tnejn 25 ta’ Settembru: Ferja. Qari: Esdra 1:1-6; Salm 125:1-2a.b.2ċd-3.4-5.6; Luqa 8:16-18.
■ It-Tlieta 26 ta’ Settembru: Ferja / San Kosma u San Damjan, martri (T). Qari: Esdra 6:7-8.12b.14-20; Salm 121:1-2.3-4a.4b-5; Luqa 8:19-21.
■ L-Erbgħa 27 ta’ Settembru: San Vinċenz de Paul, presbiteru (TO). Qari: Esdra 9:5-9; Salm Tobit 13:2.3-4a.4bċd.5.8; Luqa 9:1-6.
■ Il-Ħamis 28 ta’ Settembru: Ferja / San Vinċeslaw, re tal-Boemja, martri (T) / San Lawrenz Ruiz u sħabu, martri (T). Qari: Ħaggaj 1:1-8; Salm 149:1-2.3-4.5-6a u 9b; Luqa 9:7-9.
■ Il-Ġimgħa 29 ta’ Settembru: L-Arkanġli Mqaddsa, Mikiel, Gabrijel u Rafel (F). Qari: Danjel 7:9-10.13-14; jew Apokalissi 12:7-12a; Salm 137:1-5; Ġwanni 1:47-51.
■ Is-Sibt 30 ta’ Settembru: San Ġirolmu, presbiteru u duttur tal-Knisja (TO). Qari: Żakkarija 2:5-9.14-15a; Salm Ġeremija 31:10.11-12ab.13; Luqa 9:43b-45.
F = Festa; TO = Tifkira Obbligatorja; T = Tifkira.
Il-kulur ħdejn id-data jindika l-kulur liturġiku tal-ġurnata.