Il-15 Ħadd ta' matul is-sena - Sena Ċ
AQRA L-KELMA - Il-liturġija tal-Kelma
L-EWWEL QARI
Qari mill-Ktieb tad-Dewteronomju (30:10-14)
Mosè kellem lill-poplu u qal: «Il-Mulej jifraħ bik u jagħmel il-ġid miegħek, jekk int tisma’ l-kelma tal-Mulej, Alla tiegħek, u tħares l-ordnijiet tiegħu u l-liġijiet miktuba fil-ktieb ta’ din il-liġi; jekk terġa’ lejn il-Mulej, Alla tiegħek, b’qalbek kollha u b’ruħek kollha.
Din il-liġi li qiegħed nagħtik illum, mhijiex tqila għalik u anqas ’il bogħod minnek. Mhijiex fis-sema biex int tgħid: “Min sa jitlgħalna s-sema jġibhielna u jsemmagħhielna u nagħmluha?” U anqas ma hi ’l hemm mill-baħar biex int tgħid: “Min sa jmur ’l hemm mill-ibħra u jġibhielna, u jsemmagħhielna, u nagħmluha?” Imma din il-ħaġa hi qribek sewwa f’fommok u f’moħħok, biex tagħmilha.»
Il-Kelma tal-Mulej. Irroddu ħajr lil Alla.
SALM RESPONSORJALI (Salm 68)
Rit: Tagħmlu l-qalb, intom li tfittxu lil Alla!
Jien lilek nitlob, Mulej;
meta jogħġbok, o Alla, weġibni,
fil-kobor ta’ tjubitek
u skont il-wegħda
tas-salvazzjoni tiegħek.
Weġibni, Mulej,
għax mill-aħjar tjubitek;
dur lejja fil-kobor tal-ħniena tiegħek. Rit…
Imma jiena msejken u batut;
terfagħni, o Alla, is-salvazzjoni tiegħek!
Infaħħar l-isem ta’ Alla bl-għana,
inkabbru b’għana ta’ radd il-ħajr. Rit…
Hekk jaraw l-imsejkna u jifirħu;
u tagħmlu l-qalb, intom li tfittxu lil Alla.
Għax jisma’ l-fqajrin il-Mulej,
ma jistmellx l-imjassrin tiegħu. Rit…
Għax Alla jsalva ’l Sijon,
u jibni l-bliet ta’ Ġuda;
u huma jerġgħu lura u jgħammru fiha.
Jirtuha wlied il-qaddejja tiegħu;
dawk li jħobbu lil ismu joqogħdu fiha. Rit…
IT-TIENI QARI
Qari mill-Ittra ta’ San Pawl Appostlu lill-Kolossin (1:15-20)
Ħuti, Kristu hu x-xbieha ta’ Alla li ma jidhirx, il-kbir fost il-ħlejjaq kollha; għax fih kien maħluq kollox, fis-sema u fl-art, dak kollu li jidher u dak kollu li ma jidhirx, Troni u Ħakmiet, Prinċipati u Setgħat. Kollox bih u għalih kien maħluq, hu li hu qabel kollox, u kollox fih qiegħed iżomm.
Hu r-Ras tal-Ġisem, li hu l-Knisja. Hu li hu l-bidu, il-kbir li qam mill-imwiet, biex ikun hu l-ewwel f’kollox. Hekk Alla għoġbu li tgħammar fih il-milja kollha; bih Alla għoġbu jerġa’ jħabbeb kollox miegħu; bid-demm tiegħu, imxerred fuq is-salib, ġieb is-sliem permezz tiegħu fis-sema u fl-art.
Il-Kelma tal-Mulej. Irroddu ħajr lil Alla.
AKKLAMAZZJONI QABEL L-EVANĠELJU
Hallelujah. Hallelujah. (Ġw 6:63ċ.68ċ)
Il-kliem tiegħek Mulej, huwa spirtu u ħajja; inti għandek il-kliem tal-ħajja ta’ dejjem.
Hallelujah!
L-EVANĠELJU
Qari mill-Evanġelju skont San Luqa (10:25-37)
F’dak iż-żmien, iqum wieħed għaref fil-Liġi u, biex iġarrab lil Ġesù, staqsieh: «Mgħallem, x’nagħmel biex niret il-ħajja ta’ dejjem?» Qallu Ġesù: «Fil-Liġi x’hemm miktub? Inti x’taqra fiha?» U dak wieġeb: «Int għandek tħobb il-Mulej, Alla tiegħek, b’qalbek kollha, u b’ruħek kollha, bil-qawwa tiegħek kollha, u b’moħħok kollu, u lill-proxxmu tiegħek bħalek innifsek.» Qallu Ġesù: «Sewwa weġibt; agħmel hekk u tgħix.»
Iżda dak, biex juri li kellu raġun, qal lil Ġesù: «U l-proxxmu tiegħi min hu?» U Ġesù raġa’ qabad jgħidlu: «Wieħed raġel kien nieżel Ġeriko minn Ġerusalemm, u waqa’ f’idejn il-ħallelin; dawn neżżgħuh, biċċruh bis-swat u telqu, u ħallewh nofsu mejjet. Inzerta kien nieżel qassis minn dik it-triq u rah, għadda minn mal-ġenb u baqa’ sejjer.
Hekk ukoll wieħed levita, meta wasal hemm u rah, għadda minn mal-ġenb u baqa’ sejjer. Imma kien għaddej minn hemm wieħed Samaritan, wasal ħdejh, rah u tħassru. Resaq lejh, dewwielu l-ġrieħi biż-żejt u l-inbid u rabathomlu, u mbagħad tellgħu fuq il-bhima tiegħu, wasslu f’lukanda u ħa ħsiebu. L-għada ħareġ biċċtejn flus, tahom lil tal-lukanda u qallu: “Ħu ħsiebu; jekk tonfoq xi ħaġa iżjed, irroddhielek jien meta nerġa’ ngħaddi.”
Minn dawn it-tlieta, int min jidhirlek li ġieb ruħu ta’ proxxmu ma’ dak li waqa’ f’idejn il-ħallelin?» «Min ħenn għalih,» wieġbu dak. Qallu Ġesù: «Mur, u agħmel hekk int ukoll.»
Il-Kelma tal-Mulej. Tifħir lilek Kristu.
IFHEM IL-KELMA - Kummenti dwar il-qari
- VIDEO -
- AUDIO -
GĦIX IL-KELMA - Il-Kalendarju Liturġiku tal-ġimgħa
It-tieni ġimgħa tas-salterju
■ It-Tnejn 4 ta’ Lulju: Ferja / Santa Eliżabetta tal-Portugall (T). Qari: Ħosegħa 2:16-18.21-22; Salm 144:2-9; Mattew 9:8-26.
■ It-Tlieta 5 ta’ Lulju: Ferja / San Anton Marija Zaccaria, Presbiteru (T). Qari: Ħosegħa 8:4-7.11-13; Salm 113b:3-10; Mattew 9:32-38.
■ L-Erbgħa 6 ta’ Lulju: Ferja / Santa Marija Goretti, Verġni u Martri (T). Qari: Ħosegħa 10:1-3.7-8.12; Salm 104:2-7; Mattew 10:1-7.
■ Il-Ħamis 7 ta’ Lulju: Ferja. Qari: Ħosegħa 11:1-4.8-9; Salm 79:2-3.15-16; Mattew 10:7-15.
■ Il-Ġimgħa 8 ta’ Lulju: Ferja. Qari: Ħosegħa 14:2-10; Salm 50:3-4.8-9.12-14.17; Mattew 10:16-23.
■ Is-Sibt 9 ta’ Lulju: Ferja / Santu Wistin Zhao Rong, Presbiteru, u sħabu, Martri (T) / L-Imqaddsa Verġni Marija f’Jum is-Sibt (T). Qari: Isaija 6:1-8; Salm 92:1-2.5; Mattew 10:24-33.
T = Tifkira
Il-kulur tad-data jindika l-kulur liturġiku tal-ġurnata.