It-Tifkira Solenni tal-Ġisem u d-Demm ta' Kristu - Sena Ċ
AQRA L-KELMA - Il-liturġija tal-Kelma
L-EWWEL QARI
Qari mill-Ktieb tal-Ġenesi (14:18-20)
F’dak iż-żmien, Melkisedek, sultan ta’ Salem, li kien qassis ta’ El-għeljon, Alla l-għoli, ħareġ bil-ħobż u l-inbid. U bierek lil Abram u qallu: «Imbierek Abram minn Alla l-għoli, li għamel is-sema u l-art. U mbierek Alla l-għoli li reħa f’idejk l-għedewwa tiegħek.»
U Abram tah l-għexur minn kollox.
Il-Kelma tal-Mulej. Irroddu ħajr lil Alla.
SALM RESPONSORJALI (Salm 109)
Rit: Inti qassis għal dejjem bħal Melkisedek!
Il-kelma tal-Mulej lil Sidi:
«Oqgħod fuq leminti,
sa ma nqiegħed l-għedewwa tiegħek
mirfes taħt riġlejk.» Rit...
Ix-xettru tal-qawwa tiegħek
jibgħat il-Mulej minn Sijon:
aħkem f’nofs l-għedewwa tiegħek! Rit...
Tiegħek is-setgħa sa minn twelidek
fuq l-għoljiet imqaddsa,
sa minn qabel is-sebħ
bħan-nida jien nissiltek. Rit...
Ħalef il-Mulej, u ma jisgħobx bih:
«Inti qassis għal dejjem
bħal Melkisedek!» Rit...
IT-TIENI QARI
Qari mill-Ewwel Ittra ta’ San Pawl Appostlu lill-Korintin (11:23-26)
Ħuti, jien irċevejt mingħand il-Mulej it-tagħlim li għaddejt lilkom, jiġifieri, li l-Mulej Ġesù, fil-lejl li fih kien ittradut, ħa l-ħobż u wara li radd il-ħajr qasmu u qal: «Dan hu ġismi li jingħata għalikom; agħmlu dan b’tifkira tiegħi.»
Hekk ukoll għamel bil-kalċi wara li kiel u qal: «Dan il-kalċi hu l-patt il-ġdid b’demmi; agħmlu dan kull meta tixorbu, b’tifkira tiegħi.» Mela kull meta tieklu dan il-ħobż u tixorbu dan il-kalċi, intom ixxandru l-mewt tal-Mulej sa ma jiġi.
Il-Kelma tal-Mulej. Irroddu ħajr lil Alla.
SEKWENZA
Is-sekwenza tista’ ma tingħadx. Tista’ wkoll tingħad fil-forma l-qasira li tibda: Dan ħobż l-anġli, magħmul ikel.
Faħħar, Sijon, lill-Feddej,
ir-ragħaj tiegħek u l-mexxej,
bl-innijiet u bl-għana.
Ibqa’ faħħru daqs kemm tista’,
għax hu ’l fuq minn kull tifħir,
qatt ma tfaħħru kemm jistħoqqlu.
Għat-tifħir ħaġa tal-għaġeb,
il-ħobż ħaj li jagħti l-ħajja,
hawn quddiemna f’dan il-jum.
Dak il-ħobż li fuq il-mejda,
lill-appostli fl-ikla mqaddsa,
kien ingħata biex jikluh.
Ikun sħiħ it-tifħir tiegħek,
b’qalb ferrieħa, b’leħen għoli,
ikun jixraq ferħ ir-ruħ.
Għax dal-jum ta’ festa kbira,
ta’ dik l-ikla hu t-tifkira,
meta saret l-ewwel darba.
F’dina l-ikla s-Sultan tagħna,
l-Għid il-ġdid tal-liġi l-ġdida,
temm għal kollox l-Għid qadim.
Il-qadim twarrab mill-ġdid,
dak li hu ġie flok ix-xbieha,
id-dawl biegħed dlam il-lejl.
Dak li twettaq fl-aħħar ċena,
Kristu ried jibqa’ jiġġedded,
biex ikun tifkira tiegħu.
Imgħallmin b’tagħlim imqaddes,
nibdlu l-ħobż u l-inbid tagħna
b’sagrifiċċju għas-saħħa tagħna.
Twemmin ġdid lilna l-Insara,
li dal-ħobż jinbidel f’Ġisem,
u l-inbid jinbidel f’Demm.
Dak li ma tarax jew tifhem,
it-twemmin isaħħu u jwettqu,
fuq kull ordni tan-natura.
Taħt xbihat fejn aħna nilmħu
mhux il-ħajja, imma sinjali,
jinħbew ħwejjeġ hekk għeżież.
Ikel Ġismu, xorb hu Demmu;
iżda Kristu sħiħ hemm moħbi
taħt kull waħda mix-xbihat.
Sħiħ jittiekel Kristu kollu,
bla jitkisser, bla jitfarrak,
bla jinqasam minn min jieħdu.
Jieklu elf u jiekol wieħed,
kemm ħa dan, hekk jieħdu huma,
bla jintemm meta jittiekel.
Jieklu t-tajba, jieklu l-ħżiena;
imma ’l dawk iġib il-ħajja,
lil dawn jixħet fit-telfien.
Mewt għall-ħżiena, ħajja għat-tajba
ara kif jinbidel fihom,
għalkemm jieħdu l-istess ikel.
Meta l-Ostja tkun maqsuma,
la tibżax, imm’inti ftakar,
taħt ix-xbieha ta’ kull farka
hemm jinsab daqs fl-Ostja sħiħa.
Ebda ksur ma jsir fi Kristu;
biss ix-xbieha tkun miksura:
u b’dal-ksur xejn ma jitnaqqas
f’dak li hu taħt din ix-xbieha.
* * *
Dan ħobż l-anġli, magħmul ikel
għall-bnedmin fit-triq tal-ħajja,
ikel bnin għall-ulied kollha,
li m’għandux fix-xejn jintrema.
Bi xbihat kien ilu mħabbar,
f’dik l-offerta ta’ Iżakk,
fil-ħaruf li nqatel fl-Għid,
u fil-manna tad-deżert.
Int ragħaj tajjeb, ħobż tassew,
Ġesù tagħna, ħenn għalina;
Int itmagħna u ħarisna:
Inti lilna l-ġid urina
fl-art imbierka tal-ħajjin.
Int li taf u tista’ kollox,
li titmagħna hawn f’dil-ħajja,
hemm agħmilna
lkoll imsieħba,
f’għaqda waħda
lkoll werrieta mal-qtajjiet tal-qaddisin.
Ammen. Hallelujah.
AKKLAMAZZJONI QABEL L-EVANĠELJU (Ġw 6:51)
Hallelujah. Hallelujah.
Jiena hu l-ħobż il-ħaj, li niżel mis-sema, jgħid il-Mulej; jekk xi ħadd jiekol minn dan il-ħobż jgħix għal dejjem.
Hallelujah!
L-EVANĠELJU
Qari mill-Evanġelju skont San Luqa (9:11b-17)
F’dak iż-żmien, Ġesù qagħad ikellem il-folol fuq is-Saltna ta’ Alla, u fejjaq lil dawk li kienu jeħtieġu l-fejqan.
Il-jum kien wasal biex jintemm. Resqu lejh it-Tnax u qalulu: «Ibgħathom in-nies biex jmorru fl-irħula u r-rziezet tal-qrib biex isibu fejn jistrieħu u jieklu xi ħaġa, għax hawnhekk qegħdin f’post imwarrab.»
Iżda hu qalilhom: «Agħtuhom intom x’jieklu.» Qalulu: «Ma għandniex aktar minn ħames ħobżiet u żewġ ħutiet, jekk għallinqas ma mmorrux aħna stess nixtru l-ikel għal dawn in-nies kollha!» Għax kien hemm madwar il-ħamest elef raġel. U qal lid-dixxipli tiegħu: «Qegħduhom bilqiegħda ħamsin ħamsin.» Hekk għamlu, u qiegħdu lil kulħadd bilqiegħda.
Imbagħad ħa l-ħames ħobżiet u ż-żewġ ħutiet, rafa’ għajnejh lejn is-sema, berikhom u qasamhom, u tahom lid-dixxipli biex inewluhom lin-nies. U kulħadd kiel u xaba’ u l-bċejjeċ tal-ħobż li kien fadal ġabruhom fi tnax-il qoffa.
Il-Kelma tal-Mulej. Tifħir lilek Kristu.
IFHEM IL-KELMA - Kummenti dwar il-qari
GĦIX IL-KELMA - Il-Kalendarju Liturġiku tal-ġimgħa
Ir-raba’ ġimgħa tas-salterju
■ It-Tnejn 20 ta’ Ġunju: Ferja. Qari: 2 Slaten 17:5-8.13-15.18; Salm 59:3-5.12-13; Mattew 7:1-5.
■ It-Tlieta 21 ta’ Ġunju: San Alwiġi Gonzaga, Reliġjuż (TO). Qari: 2 Slaten 19:9-11.14-21.31-36; Salm 47:2-4.10-11; Mattew 7:6.12-14.
■ L-Erbgħa 22 ta’ Ġunju: Ferja / San Pawlinu ta’ Nola, Isqof (T) / San Ġwann Fisher, Isqof u San Tumas More, Martri (T). Qari: 2 Slaten 22:8-13; 23:1-3; Salm 118:33-37.40; Mattew 7:15-20.
■ Il-Ħamis 23 ta’ Ġunju: It-Twelid ta’ San Ġwann Battista (ST). Qari: Isaija 49:1-6; Salm 138:1-3.13-15; Atti 13:22-26; Luqa 1:57-66.80.
■ Il-Ġimgħa 24 ta’ Ġunju: Il-Qalb Imqaddsa ta’ Ġesù (S). Qari: Eżekel 34:11-16; Salm 22:1-6; Rumani 5:5-11; Luqa 15:3-7.
■ Is-Sibt 25 ta’ Ġunju: Il-Qalb bla tebgħa tal-Imqaddsa Verġni Marija (TO). Qari: Isaija 61:9-11; Salm 1 Samwel 2:1.428; Luqa 2:41-51.
S = Solennità; TO = Tifkira Obbligatorja; T = Tifkira; ST = Solennità Trasferita
Il-kulur ħdejn id-data jindika l-kulur liturġiku tal-ġurnata.