ID-29 ĦADD TA’ MATUL IS-SENA B
AQRA L-KELMA - Il-liturġija tal-Kelma
L-Ewwel Qari
Qari mill-Ktieb tal-Profeta Isaija (53:10-11)
Il-Mulej għoġbu jgħakksu bil-mard. Talli joffri ruħu b’sagrifiċċju ta’ riparazzjoni, huwa għad jara nisel u jtawwal jiemu; u r-rieda tal-Mulej isseħħ bih.
Wara t-tbatija tiegħu għad jara d-dawl, jixba’ bit-tagħrif tiegħu. Il-ġust jiġġustifika lill-qaddej tiegħu quddiem il-kotra, u l-ħażen tagħhom jitgħabba bih hu.
Il-Kelma tal-Mulej. Irroddu ħajr lil Alla.
SALM RESPONSORJALI (Salm 32)
R/. Ħa tkun, Mulej, it-tjieba tiegħek fuqna, kif fik hi t-tama tagħna!
Sewwa hi l-kelma tal-Mulej,
kollox bil-fedeltà huwa għamel.
Hu jħobb id-dritt u s-sewwa;
bit-tjieba tal-Mulej mimlija l-art. R/.
Ara, għajnejn il-Mulej fuq dawk li jibżgħu minnu,
fuq dawk li jittamaw fit-tjieba tiegħu,
biex jeħilsilhom mill-mewt ħajjithom,
u jaħjihom fi żmien il-ġuħ. R/.
Ruħna tixxennaq għall-Mulej,
hu l-għajnuna u t-tarka tagħna.
Ħa tkun, Mulej, it-tjieba tiegħek fuqna,
kif fik hi t-tama tagħna. R/.
IT-TIENI QARI
Qari mill-Ittra lil-Lhud (4:14-16)
Ħuti, meta aħna għandna l-qassis il-kbir, li hu tassew kbir, qassis li daħal fis-smewwiet, Ġesù, Bin Alla, ħa nżommu sħiħa l-fidi tagħna u nistqarruha.
Għax aħna ma għandniex qassis kbir li ma jistax jagħder id-dgħufija tagħna, imma għandna wieħed li kien imġarrab bħalna f’kollox, minbarra d-dnub.
Ħa nersqu, mela, b’qalbna qawwija lejn it-tron tal-grazzja, biex naqilgħu ħniena u nsibu f’waqtha l-grazzja li neħtieġu.
Il-Kelma tal-Mulej. Irroddu ħajr lil Alla.
AKKLAMAZZJONI QABEL L-EVANĠELJU (Mk10:45)
Hallelujah. Hallelujah.
Bin il-bniedem, ma ġiex biex ikun moqdi, imma biex jaqdi u biex jagħti ħajtu b’fidwa għall-kotra.
Hallelujah!
L-EVANĠELJU
Qari mill-Evanġelju skont San Mark (10:35-45)
(Is-silta bejn qawsejn tista’ ma tinqarax)
(F’dak iż-żmien, Ġakbu u Ġwanni, ulied Żebedew, resqu lejh u qalulu: «Mgħallem, dak li sa nitolbuk irriduk tagħtihulna.» «Xi triduni nagħmlilkom?» staqsiehom. U huma weġbuh: «Ħallina noqogħdu wieħed fuq il-lemin tiegħek u l-ieħor fuq ix-xellug fil-glorja tiegħek.»
Imma Ġesù qalilhom: «Ma tafux x’intom titolbu. Għandkom ħila tixorbu l-kalċi li sa nixrob jien, u titgħammdu bil-magħmudija li biha sa nitgħammed jien?» «Għandna,» qalulu. Imbagħad qalilhom Ġesù: «Il-kalċi li sa nixrob jien tixorbuh, iva, u titgħammdu wkoll bil-magħmudija li biha sa nitgħammed jien; imma li wieħed joqgħod fuq il-lemin jew fuq ix-xellug tiegħi, din mhijiex ħaġa tiegħi li nagħtiha jien, imma hi għal dawk li għalihom kienet imħejjija.»
L-għaxra l-oħra, meta semgħu dan, saħnu għal Ġakbu u għal Ġwanni. Imma) Ġesù sejħilhom u qalilhom: «Tafu intom, dawk in-nies, li l-bnedmin jgħodduhom bħala kapijiet tal-pagani, jaħkmu fuqhom, u l-kbarat tagħhom iħaddmu s-setgħa tagħhom fuqhom. Fostkom ma għandux ikun hekk, imma min irid ikun kbir fostkom, għandu jkun qaddej tagħkom, u min irid ikun l-ewwel fostkom, għandu joqgħod ilsir ta’ kulħadd. Għax hekk ukoll Bin il-bniedem, hu ma ġiex biex ikun moqdi, imma biex jaqdi u biex jagħti ħajtu b’fidwa għall-kotra.»
Il-Kelma tal-Mulej. Tifħir lilek Kristu.
IFHEM IL-KELMA - Kummenti dwar il-qari
- AUDIO -
- TEST -
- TEST -
GĦIX IL-KELMA - Il-Kalendarju Liturġiku tal-ġimgħa
L-ewwel ġimgħa tas-Salterju
■ It-Tnejn 21 ta’ Ottubru: f’Malta: Ferja; Qari: Efesin 2:1-10, Salm 99:2.3.4.5; Luqa 12:13-21.
■ f’Għawdex: Sant’Ursola u sħaba, protettriċi tad-djoċesi (TO). Qari: Efesin 2:1-10; Salm 99:2-5; Luqa 12:13-21.
■ It-Tlieta 22 ta’ Ottubru: Ferja / San Ġwann Pawlu II, papa (T). Qari: Efesin 2:12-22; Salm 84:9-14; Luqa 12:35-38.
■ L-Erbgħa 23 ta’ Ottubru: Ferja / San Ġwann minn Capestrano, presbiteru (T). Qari: Efesin 3:2-12; Salm Isaija 12:2-6; Luqa 12:39-48.
■ Il-Ħamis 24 ta’ Ottubru: Ferja / San Anton Marija Claret, isqof (T). Qari: Efesin 3:14-21; Salm 32:1-2.4-5.11-12.18-19; Luqa 12:49-53.
■ Il-Ġimgħa 25 ta’ Ottubru: Ferja. Qari: Efesin 4:1-6; Salm 23:1-6; Luqa 12:54-59.
■ Is-Sibt 26 ta’ Ottubru: Ferja / L-Imqaddsa Marija Verġni f’jum is-Sibt (T). Qari: Efesin 4:7-16; Salm 121:1-5 ; Luqa 13:1-9.
TO = Tifkira Obbligatorja; T= Tifkira.
Il-kulur ħdejn id-data jindika l-kulur liturġiku tal-ġurnata.