Id-19 Ħadd ta' matul is-sena - Sena A
AQRA L-KELMA - Il-liturġija tal-Kelma
L-EWWEL QARI
Qari mill-Ewwel Ktieb tas-Slaten (19:9a.11-13a)
F’dak iż-żmien Elija wasal fil-Ħoreb, il-muntanja tal-Mulej. Hemmhekk daħal fl-għar u għadda l-lejl ġo fih. U Alla qallu: «Oħroġ, u oqgħod fuq il-muntanja quddiem il-Mulej.» U ara, il-Mulej għadda. Riħ qawwi, b’saħħa li jofroq il-muntanji u jfarrak il-blat, għadda quddiem il-Mulej; imma l-Mulej ma kienx f’dan ir-riħ. U wara dan ir-riħ theżhżet l-art imma l-Mulej ma kienx f’din it-theżhiża. U wara t-theżhiża kien hemm in-nar, imma l-Mulej ma kienx fin-nar. Wara n-nar inħasset żiffa ħelwa. Elija, kif ħassha, għatta wiċċu bil-mantell, ħareġ barra, u waqaf f’bieb l-għar.
Il-Kelma tal-Mulej. Irroddu ħajr lil Alla.
SALM RESPONSORJALI (Salm 84)
Rit: Uri lilna, Mulej, it-tjieba tiegħek!
Ħa nisma’ xi jgħid Alla;
il-Mulej is-sliem ixandar,
għall-poplu u l-ħbieb tiegħu.
Qrib hi tassew is-salvazzjoni tiegħu
għal dawk li jibżgħu minnu,
biex jgħammar is-sebħ f’artna. Rit…
It-tjieba u l-fedeltà jiltaqgħu,
il-ġustizzja u s-sliem jitbewsu.
Il-fedeltà mill-art tinbet,
u l-ġustizzja mis-sema tixref. Rit…
Il-Mulej ukoll jagħti l-ġid tiegħu,
u artna tagħti l-frott tagħha.
Il-ġustizzja quddiemu timxi,
u s-sliem fuq il-passi tiegħu. Rit…
IT-TIENI QARI
Qari mill-Ittra ta’ San Pawl Appostlu lir-Rumani (9:1-5)
Ħuti, ngħidilkom is-sewwa fi Kristu, m’iniex nigdeb, tixhidli l-istess kuxjenza tiegħi fl-Ispirtu s-Santu, li jiena mnikket għall-aħħar, u dejjem qalbi maqsuma; nixtieq li kont jiena stess maqtugħ minn Kristu minħabba f’ħuti, nies ġensi skont il-ġisem: l-Israelin. Tagħhom hija l-adozzjoni ta’ wlied Alla u l-glorja, il-pattijiet u l-Liġi, il-liturġija u l-wegħdiet, tagħhom huma l-patrijarki; u kien minnhom li, skont il-ġisem, ħareġ Kristu, li hu fuq kollox, Alla mbierek għal dejjem ta’ dejjem. Ammen!
Il-Kelma tal-Mulej. Irroddu ħajr lil Alla.
AKKLAMAZZJONI QABEL L-EVANĠELJU
Hallelujah. Hallelujah. (ara Salm 129:5)
Jien lill-Mulej nistenna, ruħi f’kelmtu tittama.
Hallelujah!
L-EVANĠELJU
Qari mill-Evanġelju skond San Mattew (14:22-33)
(Is-silta bejn qawsejn tista’ ma tinqarax)
Wara lin-nies kielu u xebgħu, Ġesù minnufih ġiegħel lid-dixxipli jitilgħu fuq id-dgħajsa u jmorru qablu x-xatt l-ieħor, sakemm jibgħat lin-nies. Wara li bagħat lin-nies, tela’ waħdu fuq l-għoljiet biex jitlob. Xħin sar filgħaxija kien għadu hemm fuq, waħdu.
Id-dgħajsa kienet diġà f’nofs il-baħar titħabat mal-mewġ, għax kellhom ir-riħ kontra tagħhom. Fir-raba’ sahra tal-lejl mar lejn in-naħa tagħhom miexi fuq il-baħar. Huma rawh miexi fuq il-baħar u twerwru. «Dan xi fantażma!» qalu; u qabdu jgħajtu bil-biża’. Iżda hu minnufih kellimhom u qalilhom: «Agħmlu l-qalb, jien hu, tibżgħu xejn!» Wieġeb Pietru u qallu: «Mulej, jekk huwa int, ordnali niġi ħdejk fuq l-ilma.» «Ejja,» qallu Ġesù. Pietru niżel mid-dgħajsa, u qabad jimxi fuq l-ilma u jersaq lejn Ġesù. Iżda meta ra li r-riħ kien qawwi, baża’, ħabat jegħreq, u beda jgħajjat u jgħid: «Salvani, Mulej!» Malajr Ġesù medd idu u qabdu: «Bniedem ta’ fidi żgħira,» qallu, «għaliex iddubitajt?»
Meta mbagħad it-tnejn telgħu fid-dgħajsa, ir-riħ waqaf. Dawk li kienu fid-dgħajsa nxteħtu jqimuh u qalulu: «Tassew, int Bin Alla!»
Il-Kelma tal-Mulej. Tifħir lilek Kristu.
IFHEM IL-KELMA - Kummenti dwar il-qari
- AUDIO -
GĦIX IL-KELMA - Il-Kalendarju Liturġiku tal-ġimgħa
It-tielet ġimgħa tas-Salterju
■ It-Tnejn 14 ta’ Awwissu: San Massimiljan Marija Kolbe, presbiteru u martri (TO). Qari: Dewteronomju 10:12-22; Salm 147:12-13.14-15.19-20; Mattew 17:22-27.
■ It-Tlieta 15 ta’ Awwissu: L-Imqaddsa Verġni Marija Mtellgħa s-Sema (S). Qari: Apokalissi 11:19a; 12:1-6a.10ab; Salm 44:10bc.11-12ab.16; 1 Korintin 15:20-26; Luqa 1:39-56.
■ L-Erbgħa 16 ta’ Awwissu: Ferja / San Stiefnu tal-Ungerija (T). Qari: Dewteronomju 34:1-12; Salm 65:1-3a.5.16-17; Mattew 18:15-20.
■ Il-Ħamis 17 ta’ Awwissu: Ferja. Qari: Ġożwè 3:7-10a.11.13-17; Salm 113:1-2.3-4.5-6; Mattew 18:21 – 19:1.
■ Il-Ġimgħa 18 ta’ Awwissu: Ferja. Qari: Ġożwè 24:1-13; Salm 135:1-3.16-18.21-22 u 24; Mattew 19:3-12.
■ Is-Sibt 19 ta’ Awwissu: Ferja / San Ġwann Eudes, presbiteru (T) / L-Imqaddsa Verġni Marija f’Jum is-Sibt (T). Qari: Ġożwè 24:14-29; Salm 15:1-2a u 5.7-8.11; Mattew 19:13-15.
S = Solennità; TO = Tifkira Obbligatorja; T = Tifkira.
Il-kulur ħdejn id-data jindika l-kulur liturġiku tal-ġurnata.