Għid il-Ħamsin - Sena B
AQRA L-KELMA - Il-liturġija tal-Kelma
L-EWWEL QARI
Bidu tal-Ktieb tal-Atti tal-Appostli (2:1-11)
Meta wasal jum Għid il-Ħamsin, huma kienu lkoll flimkien f’post wieħed. F’daqqa waħda ġie mis-sema ħoss bħal ta’ riħ qawwi, u mela d-dar kollha fejn kienu qegħdin. U dehrulhom ilsna qishom tan-nar, li tqassmu u qagħdu fuq kull wieħed minnhom. Imtlew ilkoll bl-Ispirtu s-Santu u bdew jitkellmu b’ilsna oħra, skont ma l-Ispirtu kien jagħtihom li jitkellmu.
F’Ġerusalemm kien hemm xi Lhud, nies twajba minn kull nazzjon li hawn taħt is-sema. Malli nstama’ dan il-ħoss, inġabret kotra kbira, ilkoll imħawdin għax kull wieħed minnhom kien jismagħhom jitkellmu bl-ilsien tiegħu. Miblugħin u mistagħġbin, bdew jgħidu: «Dawn li qegħdin jitkellmu mhumiex ilkoll mill-Galilija? Mela kif kull wieħed minna qiegħed jismagħhom jitkellmu bi lsien art twelidu? Partin, Medin u Għelamin, nies mill-Mesopotamja, mil-Lhudija, mill-Kappadoċja, minn Pontu, mill-Asja, mill-Friġja, mill-Pamfilja, mill-Eġittu, mill-inħawi tal-Libja madwar Ċireni, nies li ġew minn Ruma, kemm Lhud u kemm prosèliti, oħrajn minn Kreta u Għarab, aħna lkoll qegħdin nisimgħuhom ixandru bl-ilsna tagħna l-għeġubijiet ta’ Alla!»
Il-Kelma tal-Mulej. Irroddu ħajr lil Alla.
SALM RESPONSORJALI (Salm 103)
R/. Ibgħat l-Ispirtu tiegħek, Mulej, u ġedded il-wiċċ tal-art!
jew Hallelujah. Hallelujah. Hallelujah!
Bierek ruħ tiegħi, lill-Mulej! Mulej,
Alla tiegħi, inti kbir bil-bosta!
Kemm huma kotrana l-għemejjel tiegħek,
Mulej! Mimlija l-art bil-ħlejjaq tiegħek. R/.
Jekk teħdilhom nifishom, imutu,
u lejn it-trab jerġgħu jmorru.
Malli tibgħat in-nifs tiegħek, jinħolqu,
u inti ġġedded il-wiċċ tal-art. R/.
Jibqa’ sebħ il-Mulej għal dejjem!
Jifraħ il-Mulej bl-għemejjel tiegħu!
Ħa togħġbu l-għanja tiegħi,
għax jiena fil-Mulej l-hena tiegħi. R/.
IT-TIENI QARI
Qari mill-Ittra ta’ San Pawl Appostlu lill-Galatin (5:16-25)
Ħuti, jien ngħidilkom, imxu fl-Ispirtu u taqgħux għall-passjonijiet tal-ġisem. Il-passjonijiet tal-ġisem huma kontra l-Ispirtu, u l-Ispirtu hu kontra l-ġisem; dawn it-tnejn huma kontra xulxin, biex ma jħallukomx tagħmlu dak li tixtiequ.
Jekk lilkom imexxikom l-Ispirtu, m’intomx taħt il-liġi. L-għemejjel tal-ġisem huma magħrufa: żìna, faħx, nuqqas ta’ rażan, idolatrija, seħer, mibegħda, ġlied, għejra, korla, ambizzjoni, firda, partiti, invidja, sokor, tbaħrid, u ħwejjeġ bħal dawn. Inwissikom, bħalma wissejtkom qabel, min jagħmel dawn il-ħwejjeġ ma jiritx is-saltna ta’ Alla. Il-frott tal-Ispirtu huma: l-imħabba, l-hena, is-sliem, is-sabar, il-ħniena, it-tjieba, il-fidi, il-ħlewwa, ir-rażan. Kontra dawn ma hemmx liġi.
Dawk li huma ta’ Kristu Ġesù sallbu l-ġisem bil-ġibdiet u l-passjonijiet tiegħu. Jekk ngħixu bl-Ispirtu, ħalli nimxu bl-Ispirtu.
Il-Kelma tal-Mulej. Irroddu ħajr lil Alla.
SEKWENZA
Spirtu s-Santu, ejja fina,
raġġ ta’ dawl qaddis agħtina,
xerrdu f’ruħna mis-smewwiet.
O Missier il-foqra tiegħek,
inti ġġib id-doni miegħek,
tagħni b’dawlek qalb l-ulied.
Inti l-aqwa faraġ tagħna,
fik kull hena xħin tkun magħna,
tħossok fewġa ħelwa r-ruħ.
Fl-għaja, lejn is-serħ twassalna;
jekk imħeġġa wisq, trażżanna;
mill-għajnejn tixxotta d-dmugħ.
O dawl hieni ta’ qdusija,
nitolbuk li bik mimlija
tkun il-qalb ta’ kull fidil.
Mingħajr dawlek li jmexxina
ebda ħajr ma jkun hemm fina,
ebda safa fil-għemil.
Naddaf kull fejn hemm it-tbajja’,
fejn hemm nixfa reġġa’ l-ħajja,
lill-miġruħ agħtih fejqan.
Rattab fina l-ebusija,
agħti lill-berdin bżulija,
għin fit-triq lil min beżgħan.
Agħti s-seba’ doni tiegħek
lil min jimxi fidil miegħek
u li fik jistrieħ kull ħin.
Agħti ’l kull virtù sabiħa
ħlas ta’ salvazzjoni sħiħa,
agħti l-ġenna lit-tajbin.
AKKLAMAZZJONI QABEL L-EVANĠELJU
Hallelujah. Hallelujah.
Ejja, Spirtu s-Santu, imla l-qlub tal-fidili tiegħek u kebbes fihom in-nar ta’ mħabbtek.
Hallelujah.
L-EVANĠELJU
Qari mill-Evanġelju skont San Ġwann (15:26-27; 16:12-15)
F’dak iż-żmien, Ġesù qal lid-dixxipli tiegħu: «Meta jiġi d-Difensur, li sa nibagħtilkom mingħand il-Missier, l-Ispirtu tal-verità, li ġej mill-Missier, huwa jixhed għalija. U intom ukoll tixhdu, għax intom kontu miegħi sa mill-bidu.
Baqagħli ħafna ħwejjeġ x’ngħidilkom, imma għalissa ma tifilħux għalihom. Meta jiġi hu, l-Ispirtu tal-verità, iwassalkom għall-verità kollha; għaliex hu ma jgħid xejn minn tiegħu, imma jgħid dak li jisma’, u jħabbrilkom il-ġejjieni. Hu jagħtini glorja, għaliex jieħu minn dak li hu tiegħi u jħabbru lilkom. Dak kollu li għandu l-Missier huwa tiegħi. Għalhekk għidt li jieħu minn dak li hu tiegħi u jħabbru lilkom.»
Il-Kelma tal-Mulej. Tifħir lilek Kristu.
IFHEM IL-KELMA - Kummenti dwar il-qari
- AUDIO -
GĦIX IL-KELMA - Il-Kalendarju Liturġiku tal-ġimgħa
It-tielet ġimgħa tas-Salterju
■ It-Tnejn 20 ta’ Mejju: Marija Omm u Xbieha tal-Knisja (TO). Qari: Ġenesi 3:9-15.20; jew Atti 1:12-14; Salm 86:1-3.5-7; Ġwanni 19:25-34.
■ It-Tlieta 21 ta’ Mejju: Ferja / San Kristofru Magallanes, presbiteru, u sħabu, martri (T). Qari: Ġakbu 4:1-10; Salm 54:7-8.9-10a.10b-11a.23; Mark 9:30-37.
■ L-Erbgħa 22 ta’Mejju: Ferja / Santa Rita ta’ Cascia, reliġjuża (T). Qari: Ġakbu 4:13-17; Salm 48:2-3.6-11; Mark 9:38-40.
■ Il-Ħamis 23 ta’ Mejju: Ferja. Qari: Ġakbu 5:1-6; Salm 48:14-15b.15ċd-16.17-18.19-20; Mark 9:41-50.
■ Il-Ġimgħa 24 ta’ Mejju: Ferja. Qari: Ġakbu 5:9-12; Salm 102:1-2.3-4.8-9.11-12; Mark 10:1-12.
■ Is-Sibt 25 ta’ Mejju: Ferja / L-Imqaddsa Marija Verġni f’jum is-Sibt (T) / San Beda l-Venerabbli, presbiteru u duttur tal-Knisja (T) / San Girgor VII, papa (T) / Santa Marija Maddalena de’ Pazzi, verġni (T). Qari: Ġakbu 5:13-20; Salm 140:1-2.3 u 8; Mark 10:13-16.
TO = Tifkira Obbligatorja; T = Tifkira.
Il-kulur ħdejn id-data jindika l-kulur liturġiku tal-ġurnata.