L-10 ĦADD TA’ MATUL IS-SENA B
AQRA L-KELMA - Il-liturġija tal-Kelma
L-Ewwel Qari
Qari mill-Ktieb tal-Ġenesi (3:9-15)
Wara li Adam kiel mis-siġra, il-Mulej Alla sejjaħ lil Adam u staqsieh: «Fejn int?» U dak wieġeb: «Smajt ħossok fil-ġnien u bżajt għax jien għeri, u nħbejt.» U staqsieh: «Min qallek li int għeri? Jaqaw kilt mis-siġra li jien ordnajtlek li ma tikolx minnha?» U wieġeb Adam: «Il-mara li inti tajtni għal miegħi, hi tatni mis-siġra, u jiena kilt.»
U l-Mulej Alla qal lill-mara: «X’inhu dan li għamilt?» U l-mara wieġbet: «Is-serp qarraq bija, u jien kilt.» U l-Mulej Alla qal lis-serp: «Talli għamilt dan, misħut int fost il-bhejjem kollha u fost l-annimali selvaġġi! Għal żaqqek titkaxkar, u t-trab tal-art tiekol il-jiem kollha ta’ ħajtek. U jien inqajjem mibegħda bejnek u bejn il-mara, bejn nislek u nisilha, u hu jisħaqlek rasek u int tisħaqlu għarqubu.»
Il-Kelma tal-Mulej. Irroddu ħajr lil Alla.
SALM RESPONSORJALI (Salm 129)
R/. Għand il-Mulej hemm it-tjieba, u l-fidwa għandu bil-kotra!
Minn qiegħ l-art insejjaħlek, Mulej:
isma’, Sidi, il-leħen tiegħi!
Ħa jkunu widnejk miftuħa,
jiena u nitolbok bil-ħniena. R/.
Jekk tal-ħtijiet int tagħti kas, Mulej,
Sidi, min jista’ jżomm sħiħ?
Imma għandek hemm il-maħfra,
biex hekk inqimuk fil-biża’ tiegħek. R/.
Jien lill-Mulej nistenna,
ruħi f’kelmtu tittama.
Tistenna ruħi lil Sidi,
aktar milli l-għassiesa s-sebħ. R/.
Jistenna Israel lill-Mulej!
Għax għand il-Mulej hemm it-tjieba,
u l-fidwa għandu bil-kotra.
Hu li jifdi lil Israel
minn ħtijietu kollha. R/.
IT-TIENI QARI
Qari mill-Ittra ta’ San Pawl Appostlu lill-Korintin (4:13 ̶5:1)
Ħuti, billi aħna għandna l-istess spirtu ta’ fidi li fuqu hemm miktub: «Emmint, u għalhekk tkellimt», aħna wkoll emminna, u għalhekk tkellimna; għax nafu li dak li qajjem lill-Mulej Ġesù, lilna wkoll għad iqajjimna flimkien ma’ Ġesù u jressaqna quddiemu flimkien magħkom. Għax dan kollu minħabba fikom, biex il-grazzja tilħaq ħafna bnedmin oħra, u b’hekk jitkattar ir-radd ta’ ħajr, għall-glorja ta’ Alla.
Għalhekk ma naqtgħux qalbna, għax imqar jekk il-bniedem ta’ barra jitħassar, il-bniedem ta’ ġewwa jiġġedded minn jum għal jum. Id-daqsxejn ta’ tbatija tagħna ta’ issa tħejjilna kobor ta’ glorja bla qjies għal dejjem; lilna li ma nħarsux lejn il-ħwejjeġ li jidhru, iżda lejn dawk li ma jidhrux. Dawk li jidhru huma għal żmien qasir, dawk li ma jidhrux huma għal dejjem.
Aħna nafu li jekk din it-tinda tal-għamara tagħna fl-art tiġġarraf, aħna għandna dar oħra, maħduma mhux bl-idejn, imma xogħol ta’ Alla, għal dejjem fis-sema.
Il-Kelma tal-Mulej. Irroddu ħajr lil Alla.
AKKLAMAZZJONI QABEL L-EVANĠELJU (Ġw12:31b-32)
Hallelujah. Hallelujah.
Issa se jitkeċċa l-Prinċep ta’ din id-dinja, jgħid il-Mulej; u meta nintrefa’ ’l fuq mill-art, jiena niġbed il-bnedmin kollha lejja.
Hallelujah!
L-EVANĠELJU
Qari mill-Evanġelju skont San Mark (3:20-35)
F’dak iż-żmien, Ġesù, flimkien mad-dixxipli tiegħu, mar id-dar, u l-kotra reġgħet inġemgħet, hekk li anqas biss setgħu jieklu. Qrabatu, malli semgħu, ħarġu biex iżommuh, għax qalu li tilef moħħu. Il-kittieba li kienu niżlu minn Ġerusalemm bdew jgħidu: «Dan għandu fih lil Begħelżebul u bis-saħħa tal-Prinċep tax-xjaten qiegħed ikeċċihom ix-xjaten.»
Hu sejħilhom lejh u beda jkellimhom bil-parabboli: «Kif jista’ x-Xitan ikeċċi x-Xitan? Jekk saltna tinqasam fiha nfisha, dik is-saltna ma tistax iżżomm wieqfa. U jekk familja tinqasam fiha nfisha, dik il-familja ma tistax iżżomm wieqfa. Li kieku mela x-Xitan qam kontra tiegħu nnifsu u nfired, ma kienx jista’ jżomm sħiħ, imma jkun wasal fit-tmiem. Ħadd ma jista’ jidħol fid-dar ta’ wieħed qawwi u jaħtaflu ġidu jekk qabel ma jkunx rabat lil dak il-qawwi; imbagħad id-dar jaħtafhielu żgur.
Tassew ngħidilkom, kollox jinħafrilhom lil ulied il-bniedem, id-dnubiet u d-dagħa kollu li jidgħu. Imma min jieqaf lill-Ispirtu s-Santu ma jkollu qatt maħfra; jibqa’ ħati għal dejjem.» Għax kienu qalu: «Għandu fih spirtu ħażin.»
Darba ġew ommu u ħutu, baqgħu barra u bagħtu jsejħulu. Dak il-ħin kien hemm ħafna nies bilqiegħda madwaru, u qalulu: «Ara, ommok u ħutek qegħdin hemm barra u jriduk.» U hu weġibhom: «Min huma ommi u ħuti?» Imbagħad dawwar ħarstu fuq dawk li kien hemm madwaru bilqiegħda, u qal: «Dawn, ara, huma ommi u ħuti. Kull min jagħmel ir-rieda ta’ Alla, dak huwa ħija, u oħti, u ommi.»
Il-Kelma tal-Mulej. Tifħir lilek Kristu.
IFHEM IL-KELMA - Kummenti dwar il-qari
- AUDIO -
- TEST -
GĦIX IL-KELMA - Il-Kalendarju Liturġiku tal-ġimgħa
It-tieni ġimgħa tas-Salterju
■ It-Tnejn 10 ta’ Ġunju: Ferja. Qari: 1 Slaten 17:1-6; Salm 120:1-8; Mattew 5:1-12.
■ It-Tlieta 11 ta’ Ġunju: San Barnaba, appostlu (TO). Qari: Atti 11:21b-26, 13:1-3; Salm 97:1-6; Mattew 10:7-13.
■ L-Erbgħa 12 ta’ Ġunju: Ferja. Qari: 1 Slaten 18:20-39; Salm 15:1-2a.4.5 u 8.11; Mattew 5:17-19.
■ Il-Ħamis 13 ta’ Ġunju: Sant’Antnin ta’ Padova, presbiteru u duttur tal-Knisja (TO). Qari: 1 Slaten 18:41-46; Salm 64:10abċd.10e-11.12-13; Mattew 5:20-26.
■ Il-Ġimgħa 14 ta’ Ġunju: Ferja. Qari: 1 Slaten 19:9a.11-16; Salm 26:7-8a.8b-9abċ.13-14; Mattew 5:27-32.
■ Is-Sibt 15 ta’ Ġunju: Ferja / Il-Verġni Mqaddsa Marija f’jum is-Sibt (T). Qari: 1 Slaten 19:19-21; Salm 15:1-2.5.7-10; Mattew 5:33-37.
TO = Tifkira Obbligatorja; T = Tifkira.
Il-kulur ħdejn id-data jindika l-kulur liturġiku tal-ġurnata.