It-23 Ħadd ta' matul is-sena - Sena Ċ
AQRA L-KELMA - Il-liturġija tal-Kelma
L-EWWEL QARI
Qari mill-Ktieb tal-Għerf (9:13-19)
Min jista’ jagħraf ħsieb Alla? Min jista’ jifhem x’irid il-Mulej?
Beżżiegħa huma ħsibijiet il-bnedmin, u kull pjan tagħna mhu xejn fiż-żgur; għax ruħna mtaqqla b’ġisem li jitħassar, u għar-ruħ li taħseb hu piż it-tafal li fih tgħammar.
Bilkemm nistgħu nintebħu x’hemm fuq l-art, u bit-tbatija nsibu dak li hu taħt għajnejna; mela min jista’ jitkixxef fuq il-ħwejjeġ tas-sema?
Min qatt għaraf ir-rieda tiegħek, jekk int innifsek ma tajtux l-għerf, u ma bgħattx fuqu mill-għoli l-ispirtu qaddis tiegħek?
Hekk saru dritti triqat in-nies tal-art, hekk tgħallmu l-bnedmin dak li jogħġob lilek, u salvaw bis-saħħa tal-għerf.
Il-Kelma tal-Mulej. Irroddu ħajr lil Alla.
SALM RESPONSORJALI (Salm 89)
Rit: Mulej, int kenn għalina!
Int traġġa’ l-bnedmin lejn it-trab,
u tgħidilhom:
«Erġgħu lura, intom bnedmin!»
Elf sena huma għalik
bħal jum tal-bieraħ li għadda,
jew bħal sahra tal-lejl. Rit…
Int taħsadhom, u jsiru bħal ħolma.
Huma bħall-ħaxix li jinbet filgħodu;
filgħodu jwarrad u jħaddar,
filgħaxija jidbiel u jinxef. Rit…
Għalhekk għallimna
ngħoddu jiem ħajjitna,
sabiex aħna nimxu bil-għaqal.
Dur lejna, Mulej! Kemm se ddum?
Ħenn għall-qaddejja tiegħek. Rit…
Imliena kmieni bit-tjieba tiegħek,
biex nifirħu u nithennew ħajjitna kollha.
Ħa tkun fuqna l-grazzja ta’ Alla Sidna!
Wettqilna inti x-xogħol ta’ jdejna,
wettaq, iva, xogħol idejna. Rit…
IT-TIENI QARI
Qari mill-Ittra ta’ San Pawl Appostlu lil Filemon (9b-10.12-17)
Għażiż, jiena, Pawlu, raġel xwejjaħ, u issa priġunier ta’ Kristu Ġesù, qiegħed nitolbok bil-ħerqa għal ibni, li jiena nissilt fil-ktajjen, għal Oneżimu.
Xtaqt kieku żammejtu miegħi, biex, kif jien fil-ħabs għall-Evanġelju, idur bija minflokok hu. Iżda ma ridt nagħmel xejn mingħajr ma nara x’jidhirlek int, biex l-opra tajba tiegħek ma tkunx għamiltha bilfors, imma tkun ħierġa mill-qalb.
Għandu mnejn li għalhekk hu telaq minn miegħek għal ftit, biex inti terġa’ tiksbu lura għal dejjem, mhux aktar bħala lsir, imma xi ħaġa aktar minn ilsir, bħala ħuk għażiż; għażiż fuq kollox għalija, imma kemm aktar għalik, skont id-dinja u skont il-Mulej.
Int mela, jekk inti qalb waħda miegħi, ilqgħu bħallikieku kont jien!
Il-Kelma tal-Mulej. Irroddu ħajr lil Alla.
AKKLAMAZZJONI QABEL L-EVANĠELJU
Hallelujah. Hallelujah. (Salm 118: 35)
Ħa jiddi wiċċek fuq il-qaddej tiegħek, għallimni l-kmandamenti tiegħek.
Hallelujah!
L-EVANĠELJU
Qari mill-Evanġelju skont San Luqa (14:25-33)
F’dak iż-żmien, kotra kbira ta’ nies kienet miexja ma’ Ġesù. Hu dar lejhom u qalilhom: «Min jiġi għandi ma jistax ikun dixxiplu tiegħi jekk ma jobgħodx lil missieru u ’l ommu u lil martu u lil uliedu, ’l ħutu subien u bniet, u saħansitra lilu nnifsu.
Min ma jerfax salibu u jimxi warajja ma jistax ikun dixxiplu tiegħi.
Għax min minnkom ikun irid jibni torri u ma joqgħodx bilqiegħda biex l-ewwel nett iqis in-nefqa, ħalli jara għandux biżżejjed biex iwassal sal-aħħar? Għax jekk jiġrilu li jqiegħed is-sisien biex imbagħad ma jkunx jista’ jtemm il-bini, kull min jarah jibda jwaqqgħu għaċ-ċajt u jgħid: “Dan il-bniedem beda jibni u ma kellux il-ħila jkompli sal-aħħar.”
Jew liema sultan, li jkun sejjer jagħmel gwerra kontra sultan ieħor, ma joqgħodx l-ewwel bilqiegħda biex jara jekk jistax b’għaxart elef raġel iħabbatha ma’ min ġej għalih b’għoxrin elf ruħ? Għax inkella, meta l-ieħor ikun għadu ’l bogħod, ikollu jibgħatlu ambaxxata biex jitolbu l-ftehim għall-paċi.
Hekk ukoll ħadd ma jista’ jkun dixxiplu tiegħi jekk ma jitlaqx ġidu kollu.»
Il-Kelma tal-Mulej. Tifħir lilek Kristu.
IFHEM IL-KELMA - Kummenti dwar il-qari
- VIDEO -
Fr Elija Vella OFMConv.
- AUDIO -
GĦIX IL-KELMA - Il-Kalendarju Liturġiku tal-ġimgħa
It-tielet ġimgħa tas-salterju
■ It-Tnejn 5 ta’ Settembru: Ferja / Santa Tereża ta’ Calcutta, Verġni (T). Qari: 1 Korintin 5:1-8; Salm 5:5-7.12; Luqa 6:6-11.
■ It-Tlieta 6 ta’ Settembru: Ferja. Qari: 1 Korintin 6:1-11; Salm 149:1-6. 9; Luqa 6: 12-19.
■ L-Erbgħa 7 ta’ Settembru: Ferja. Qari: 1 Korintin 7:25-31; Salm 44:11-12.14-17; Luqa 6:20-26.
■ Il-Ħamis 8 ta’ Settembru: It-Twelid tal-Imqaddsa Verġni Marija (S). Qari: Mikea 5:1-4; Salm 12; Rumani 8:28-30; Mattew 1:1-14.18-23.
■ Il-Ġimgħa 9 ta’ Settembru: Ferja / San Pietru Claver, Presbiteru (T). Qari: 1 Korintin 9:16-19.22-27; Salm 83:3-6.12; Luqa 6:39-42.
■ Is-Sibt 10 ta’ Settembru: Ferja / L-Imqaddsa Verġni Marija f’Jum is-Sibt (T). Qari: 1 Korintin 10:14-22; Salm 115: 12-13.17-18; Luqa 6:43-49.
S = Solennità; T = Tifkira
Il-kulur ħdejn id-data jindika l-kulur liturġiku tal-ġurnata.