Ir-4 Ħadd tal-Avvent - Sena B
AQRA L-KELMA - Il-liturġija tal-Kelma
L-EWWEL QARI
Qari mit-Tieni Ktieb ta’ Samwel (7:1-5.8b-12.14a.16)
Meta s-Sultan David mar joqgħod f’daru, u l-Mulej serrħu mill-għedewwa kollha ta’ madwaru, is-sultan qal lil Natan il-profeta: «Issa, ara jien qiegħed f’dar taċ-ċedru, u l-arka ta’ Alla qiegħda f’nofs ta’ tinda!» U qal Natan lis-sultan: «Kulma għandek fi ħsiebek li tagħmel, mur agħmlu, għax il-Mulej miegħek.» Imma dak il-lejl stess ġiet il-kelma tal-Mulej lil Natan u qallu: «Mur għid lill-qaddej tiegħi David: “Dan jgħid il-Mulej: Sa tibnili int dar biex noqgħod fiha? Ara, jiena ħadtek mill-mergħat minn wara l-imrieħel biex tkun prinċep fuq il-poplu tiegħi Israel. Dejjem kont miegħek f’kulma kont tidħol għalih; u meta int qridt l-għedewwa tiegħek kollha minn quddiemek. Issa jiena nibnilek isem kbir jixbah l-ismijiet il-kbar li hawn fid-dinja. Nagħmel post għall-poplu tiegħi Israel, u nqiegħdu hemm fejn jgħammar bla biża’, u ma jgħakksuhx iżjed il-ħżiena bħalma għamlu sa minn dejjem, jiġifieri sa minn meta qajjimt l-imħallfin fuq il-poplu tiegħi Israel; u nserrħek mill-għedewwa tiegħek kollha.
Lilek imbagħad il-Mulej jagħtik kelma li jibnilek dar. U meta inti ttemm żmienek, u tkun striħajt ma’ missirijietek, jiena nqajjem nislek warajk, nisel ħiereġ mill-ġewwieni tiegħek, u nsaħħaħ is-saltna tiegħu. Jiena nkun għalih missier, u hu jkun għalija iben. Il-familja tiegħek u s-saltna tiegħek jibqgħu sħaħ għal dejjem quddiemi. It-tron tiegħek jibqa’ sħiħ għal dejjem.”»
Il-Kelma tal-Mulej. Irroddu ħajr lil Alla.
SALM RESPONSORJALI (Lq 1:46-50.53-54)
R/.: It-tjieba tal-Mulej irrid dejjem ngħanni!
F’kull żmien ixandar fommi
l-fedeltà tiegħek.
Għax jien għidt:
«Tjubitek tibqa’ sħiħa għal dejjem;
bħas-smewwiet int wettaqt
il-fedeltà tiegħek.» R/.
«Għamilt patt mal-magħżul tiegħi,
ħlift lil David, il-qaddej tiegħi:
Jien nagħmel li nislek
jibqa’ għal dejjem,
li f’kull żmien jibqa’ sħiħ
it-tron tiegħek.» R/.
«Hu jsejjaħli: “Int missieri u Alla tiegħi,
fortizza u salvazzjoni tiegħi!”
It-tjieba tiegħi nżommha
fuqu għal dejjem,
u l-patt tiegħi miegħu
jibqa’ sħiħ.» R/.
IT-TIENI QARI
Qari mill-Ittra ta’ San Pawl Appostlu lir-Rumani (16:25-27)
Ħuti, lil Alla li għandu l-qawwa li jwettaqkom fl-Evanġelju li nħabbar jien, jien u nxandar lil Ġesù Kristu, skont ir-rivelazzjoni tal-misteru li kien moħbi fis-skiet tal-eternità; lil dan Alla li issa rrivelalna dan il-misteru, u għarrfu lill-ġnus bil-kitba tal-Profeti, skont l-ordni tiegħu, Alla ta’ dejjem, biex iwassalhom għall-ubbidjenza tal-fidi; lil dan Alla, waħdu fl-għerf, il-glorja għal dejjem ta’ dejjem b’Ġesù Kristu. Ammen.
Il-Kelma tal-Mulej. Irroddu ħajr lil Alla.
AKKLAMAZZJONI QABEL L-EVANĠELJU (Lq 1:38)
Hallelujah. Hallelujah.
Ara, jiena l-qaddejja tal-Mulej: ħa jsir minni skont kelmtek!
Hallelujah!
L-EVANĠELJU
Qari mill-Evanġelju skont San Luqa (1:26-38)
F’dak iż-żmien, Alla bagħat l-anġlu Gabrijel f’belt tal-Galilija, jisimha Nazaret, għand xebba, mgħarrsa ma’ raġel jismu Ġużeppi mid-dar ta’ David. Dix-xebba kien jisimha Marija. L-anġlu daħal għandha u qalilha: «Sliem għalik, mimlija bil-grazzja, il-Mulej miegħek.»
Hi tħawdet ħafna għal dan il-kliem, u bdiet taħseb bejnha u bejn ruħha x’setgħet qatt tfisser din it-tislima. Iżda l-anġlu qalilha: «Tibżax, Marija, għax int sibt grazzja quddiem Alla. Ara, int sa tnissel fil-ġuf u jkollok iben u ssemmih Ġesù. Hu jkun kbir, u jkun jissejjaħ Bin l-Għoli. Il-Mulej Alla jagħtih it-tron ta’ David missieru, u jsaltan għal dejjem fuq dar Ġakobb, u ma jkunx hemm tmiem għas-saltna tiegħu.»
Iżda Marija qalet lill-anġlu: «Kif ikun dan, ladarba ma nagħrafx raġel?» Wieġeb l-anġlu u qalilha: «L-Ispirtu s-Santu jiġi fuqek, u l-qawwa tal-Għoli tixħet id-dell tagħha fuqek. U għalhekk dak li jitwieled minnek ikun qaddis, u jissejjaħ Bin Alla. Ara, l-qariba tiegħek Eliżabetta, fi xjuħitha, hi wkoll nisslet iben fil-ġuf, u ġa għandha sitt xhur dik li għaliha kienu jgħidu li ma jistax ikollha tfal, għax għal Alla ma hemm xejn li ma jistax isir.» Imbagħad qalet Marija: «Ara, jien il-qaddejja tal-Mulej: ħa jsir minni skont kelmtek!» U l-anġlu telaq minn quddiemha.
Il-Kelma tal-Mulej. Tifħir lilek Kristu.
IFHEM IL-KELMA - Kummenti dwar il-qari
- AUDIO -
GĦIX IL-KELMA - Il-Kalendarju Liturġiku tal-ġimgħa
Ir-raba’ ġimgħa tas-Salterju
■ It-Tnejn 25 ta’ Diċembru: It-Twelid ta’ Sidna Ġesù Kristu (S). Quddiesa ta’ Nofsillejl: Qari: Isaija 9:1-6; Salm 95:1-2a.2b-3.11-12.13; Titu 2:11-14; Luqa 21-14. Quddiesa tas-Sebħ: Qari: Isaija 62:11-12; Salm 96:1.6.11-12; Titu 3:4-7; Luqa 2:15-20. Quddiesa ta’ Binhar: Qari: Isaija 52:7-10; Salm 97;1-6; Lhud 1:1-6; Ġwanni 1:1-18; (Ġw 1, 1-5.9-14).
■ It-Tlieta 26 ta’ Diċembru: San Stiefnu, protomartri (F). Qari: Atti 6:8-10; 7:54-59; Salm 30:3cd-4.6ab.7b.8a.16; Mattew 10:17-22.
■ L-Erbgħa 27 ta’ Diċembru: San Ġwann, appostlu u evanġelista (F). Qari: 1 Ġwanni 1:1-4; Salm 96:1-2.5-6.11-12; Ġwanni 20:2-8.
■ Il-Ħamis 28 ta’ Diċembru: Il-Qaddisin Innoċenti Martri (F). Qari: 1 Ġwanni 1:5 – 2:2; Salm 123:2-5.7b-8; Mattew 2:13-18.
■ Il-Ġimgħa 29 ta’ Diċembru: Il-ħames jum fost l-Ottava tal-Milied / San Tumas Becket, isqof u martri (TL). Qari: 1 Ġwanni 2:3-11; Salm 95:1-2a.2b-3.5b-6; Luqa 2:22-35.
■ Is-Sibt 30 ta’ Diċembru: Is-sitt jum fost l-Ottava tal-Milied. Qari: 1 Ġwanni 2:12-17; Salm 95:7-8a.8b-9.10; Luqa 2:36-40.
S = Solennità; F = Festa; TL = Tifkira Limitata
Il-kulur ħdejn id-data jindika l-kulur liturġiku tal-ġurnata..