IL-5 ĦADD TA’ MATUL IS-SENA
AQRA L-KELMA - Il-liturġija tal-Kelma
L-EWWEL QARI
Qari mill-Ktieb ta’ Ġob (7:1-4. 6-7)
Ġob tkellem u qal: «Ħajjet il-bniedem mhix forsi xogħol bilfors fuq l-art? U għomru mhux bħal jiem il-ħaddiem mikri? Bħalma lsir jixxennaq għad-dell, u bħalma l-mikri jistenna l-ħlas, hekk xhur fiergħa kienu sehmi, u ljieli dwejjaq messew lili. Jekk nimtedd, ngħid: “Meta se nqum?” u meta nqum, ngħid: “Meta sa jidlam?” u hekk nixba’ nhewden sa ma jidlam. Eħfef minn mekkuk għaddew jiemi, u bla tama ntemmu. Ftakar li ħajti buffura riħ, u għajnejja ma jerġgħux jaraw ir-risq.»
Il-Kelma tal-Mulej. Irroddu ħajr lil Alla.
SALM RESPONSORJALI (Salm 146)
R/. Faħħru l-Mulej, li jfejjaq il-qlub maqsuma!
Faħħru l-Mulej,
għax tajjeb li tgħanni lil Alla tagħna;
għax ħelu u xieraq it-tifħir tiegħu.
Jibni ’l Ġerusalemm il-Mulej,
jiġma’ l-imxerrdin ta’ Israel. R/.
Hu jfejjaq il-qlub maqsuma,
hu jorbot il-ġrieħi tagħhom.
Hu jgħodd in-numru tal-kwiekeb;
kollha jsejħilhom b’isimhom. R/.
Kbir Sidna l-Mulej,
u ta’ qawwa kbira;
bla tarf id-dehen tiegħu.
Jerfa’ l-imsejknin il-Mulej,
u jniżżel sal-art il-ħżiena. R/.
IT-TIENI QARI
Qari mill-Ewwel Ittra ta’ San Pawl Appostlu lill-Korintin (9:16-19.22-23)
Ħuti, jekk jiena nxandar l-Evanġelju ma għandix biex niftaħar; jien obbligat nagħmlu dan. Ħażin għalija jekk ma nxandarx l-Evanġelju!
Jekk dan nagħmlu minn rajja, ikolli dritt għall-ħlas; imma jekk nagħmlu għax obbligat, dan ifisser li qiegħed nagħmel ix-xogħol li Alla fdali f’idejja. X’inhu mela l-ħlas tiegħi? Li meta nxandar l-Evanġelju, inxandru b’xejn, bla ma nfittex id-dritt li jagħtini l-Evanġelju stess.
Għax għad li ma jiena marbut ma’ ħadd, jien għamilt lili nnifsi lsir ta’ kulħadd biex nirbaħ lil ħafna. Sirt dgħajjef mad-dgħajfin, biex nirbaħ id-dgħajfin. Sirt kollox ma’ kulħadd, biex insalva lil kulħadd. Nagħmel dan kollu minħabba l-Evanġelju biex ikolli sehem minnu.
Il-Kelma tal-Mulej. Irroddu ħajr lil Alla.
AKKLAMAZZJONI QABEL L-EVANĠELJU (Mt 8:17)
Hallelujah. Hallelujah.
Kristu rafa’ fuqu d-dgħufija tagħna, u tgħabba bil-mard tagħna.
Hallelujah!
L-EVANĠELJU
Qari mill-Evanġelju skont San Mark (1:29-39)
F’dak iż-żmien, Ġesù u d-dixxipli ħarġu mis-sinagoga u baqgħu sejrin ma’ Ġakbu u Ġwanni għand Xmun u Indrì. Issa omm il-mara ta’ Xmun kienet fis-sodda bid-deni, u malajr qalulu biha. Resaq lejha, qabadha minn idha u qajjimha. U d-deni ħallieha, u bdiet isservihom.
Filgħaxija, imbagħad, fi nżul ix-xemx, ħadulu quddiemu lil dawk kollha li kienu morda jew li kienu maħkuma mix-xitan. U quddiem il-bieb inġabret il-belt bi ħġarha. U fejjaq ħafna morda minn kull xorta ta’ mard, u ħareġ għadd kbir ta’ xjaten li hu ma kienx iħallihom jitkellmu, għax huma kienu jafu min kien.
L-għada filgħodu kmieni, qabel ma żernaq, qam, ħareġ u mar f’post imwarrab u qagħad hemm jitlob. Xmun u sħabu l-oħrajn marru jfittxuh. Kif sabuh, qalulu: «Kulħadd jistaqsi għalik.» U qalilhom: «Ejjew immorru band’oħra, fl-irħula tal-qrib, ħalli nipprietka hemmhekk ukoll, għax għalhekk ħriġt.»
U dar il-Galilija kollha, jipprietka fis-sinagogi tagħhom u joħroġ ix-xjaten.
Il-Kelma tal-Mulej. Tifħir lilek Kristu.
IFHEM IL-KELMA - Kummenti dwar il-qari
- AUDIO -
- TEST -
GĦIX IL-KELMA - Il-Kalendarju Liturġiku tal-ġimgħa
L-ewwel ġimgħa tas-Salterju
■ It-Tnejn 5 ta’ Frar: Sant’Agata, verġni u martri (TO). Qari: 1 Slaten 8:1-7.9-13; Salm 131:6-7.8-10; Galatin 4, 4-7; Mark 6:53-56.
■ It-Tlieta 6 ta’ Frar: San Pawl Miki u sħabu, martri (TO). Qari: 1 Slaten 8:22-23.27-30; Salm 83:3.4.5 u 10.11; Mark 7:1-13.
■ L-Erbgħa 7 ta’ Frar: Ferja. Qari: 1 Slaten 10:1-10; Salm 36:5-6.30-31.39-40; Mark 7:14-23.
■ Il-Ħamis 8 ta’ Frar: Ferja / San Ġirolmu Emiliani, presbiteru u reliġjuż (T) / Santa Ġużeppina Bakhita, verġni (T). Qari: 1 Slaten 11:4-13; Salm 105:3-4.35-36.37 u 40; Mark 7:24-30.
■ Il-Ġimgħa 9 ta’ Frar: Santa Skolastika, verġni (TO). Qari: 1 Slaten 11:29-32; 12, 19; Salm 80:10-11ab.12-13.14-15; Mark 7:31-37.
■ Is-Sibt 10 ta’ Frar: L-Appostlu Missierna San Pawl, Patrun ta’ Malta (S). Qari: Għerf 14:3-7; Salm 106:21-31; Atti 27:16 – 28:10 jew 2 Korintin 11:18.24-31; Mark 16:15-20.
S = Solennità; TO = Tifkira Obbligatorja; T = Tifkira.
Il-kulur ħdejn id-data jindika l-kulur liturġiku tal-ġurnata.