Il-31 Ħadd ta' matul is-sena - Sena A
AQRA L-KELMA - Il-liturġija tal-Kelma
L-EWWEL QARI
Qari mill-Ktieb tal-Profeta Malakija (1: 14b — 2: 2b.8-10)
Jien Sultan kbir – jgħid il-Mulej tal-eżerċti – u ismi ta’ min jibża’ minnu fost il-ġnus.
U issa għalikom, qassisin, huwa dan il-kmandament: Jekk intom ma tisimgħux u jekk ma tfittxux minn qalbkom li ssebbħu lil ismi, jgħid il-Mulej tal-eżerċti, jiena nibgħat fuqkom is-saħta, u nisħet il-barkiet tagħkom.
Intom twarrabtu mit-triq, ġagħaltu ’l ħafna jitfixklu bit-tagħlim tagħkom; ħassartu l-patt ta’ Levi, jgħid il-Mulej tal-eżerċti.
Għalhekk jien ukoll tlaqtkom għaż-żebliħ u għat-tmaqdir tal-poplu kollu, bħalma intom ma żammejtux triqati, u ħaristu lejn l-uċuħ fit-tagħlim tagħkom.
Mhux Missier wieħed għandna lkoll kemm aħna? Mhux Alla wieħed ħalaqna? Mela għaliex nimxu bil-qerq bejnietna u nonqsu mill-ġieħ lejn il-patt ta’ missirijietna?
Il-Kelma tal-Mulej. Irroddu ħajr lil Alla.
SALM RESPONSORJALI (Salm 130)
R/. Mulej, ħarisli ruħi fis-sliem!
Mulej, ma tkabbritx qalbi,
anqas ma ntrefgħu għajnejja;
jien ma ġrejtx wara ħwejjeġ kbar,
jew wara ħwejjeġ ogħla minni. R/.
Imma żammejt ruħi
fis-skiet u l-mistrieħ,
bħal tarbija f’ħoġor ommha;
bħal tarbija miftuma,
hekk hi ruħi ġewwa fija. R/.
Ittama, Israel, fil-Mulej,
minn issa u għal dejjem! R/.
IT-TIENI QARI
Bidu tal-Ewwel Ittra ta’ San Pawl Appostlu lit-Tessalonkin (2:7b-9.13)
Ħuti, aħna ġibna ruħna magħkom bil-ħlewwa, bħalma omm tradda’ u tħaddan lil uliedha. Aħna għożżejniekom hekk li ridna naqsmu magħkom mhux biss l-Evanġelju ta’ Alla imma wkoll ħajjitna stess, daqskemm ħabbejniekom.
Intom, ħuti, tiftakru fit-taħbit u t-tbatija kbira tagħna. Sakemm konna qegħdin inxandrulkom l-Evanġelju ta’ Alla, aħna ħdimna bil-lejl u binhar, biex lil ħadd minnkom ma ngħabbu.
Aħna niżżu ħajr bla heda lil Alla talli l-kelma ta’ Alla, li intom smajtu mingħandna, iltqajtuha mhux bħala kelma ta’ bniedem, iżda bħala kelma ta’ Alla, kif tassew hi, dik il-kelma li qiegħda taħdem fikom li emmintu.
Il-Kelma tal-Mulej. Irroddu ħajr lil Alla.
AKKLAMAZZJONI QABEL L-EVANĠELJU
Hallelujah. Hallelujah. (Mt 23: 9b.10b)
Il-Missier tagħkom wieħed hu, dak li hu fis-smewwiet; il-mexxej tagħkom wieħed hu, il-Messija.
Hallelujah!
L-EVANĠELJU
Qari mill-Evanġelju skond San Mattew (23:1-12)
F’dak iż-żmien, Ġesù kellem lin-nies u lid-dixxipli tiegħu, u qalilhom: «Fuq il-katedra ta’ Mosè qagħdu l-kittieba u l-Fariżej. Mela kulma jgħidulkom huma agħmluh u ħarsuh, iżda tagħmlux kif jagħmlu huma, għax huma kliem biss għandhom, imma fatti xejn. Huma jorbtu qatet kbar u tqal u jgħabbuhom fuq spallejn ħaddieħor, waqt li huma stess anqas b’sebagħhom wieħed ma jridu jħarrkuhom. Kulma jagħmlu, jagħmluh għal għajnejn in-nies; għalhekk ikabbru l-filatteri u jtawlu l-ġmiemen tagħhom. Iħobbu l-postijiet ewlenin fl-imwejjed, u s-siġġijiet ta’ quddiem fis-sinagogi, u jixtiequ min isellmilhom fil-pjazez u li n-nies isejħulhom “rabbi”.
Imma intom tħallux min isejħilkom “rabbi”, għax l-Imgħallem tagħkom wieħed hu, u intom ilkoll aħwa. U ssejħu lil ħadd “missier” fuq din l-art, għax il-Missier tagħkom wieħed hu, dak li hu fis-smewwiet. Hekk ukoll tħallux min isejħilkom “mexxejja”, għax il-Mexxej tagħkom wieħed hu, il-Messija. Il-kbir fostkom għandu jkun il-qaddej tagħkom; min jitgħolla, jitbaxxa, u min jitbaxxa, jitgħolla.»
Il-Kelma tal-Mulej. Tifħir lilek Kristu.
IFHEM IL-KELMA - Kummenti dwar il-qari
- AUDIO -
GĦIX IL-KELMA - Il-Kalendarju Liturġiku tal-ġimgħa
It-tielet ġimgħa tas-Salterju
■ It-Tnejn 6 ta’ Novembru: Ferja. Qari: Rumani 11:29-36; Salm 68:30-31.33-34.36-37; Luqa 14:12-14.
■ It-Tlieta 7 ta’ Novembru: Ferja. Qari: Rumani 12:5-16a; Salm 130:1.2.3; Luqa 14:15-24.
■ L-Erbgħa 8 ta’ Novembru: Ferja. Qari: Rumani 13:8-10; Salm 111:1-2.4-5.9; Luqa 14:25-33.
■ Il-Ħamis 9 ta’ Novembru: Id-Dedikazzjoni tal-Bażilka tal-Lateran (F). Qari: Eżekjel 47:1-2.8-9.12; jew 1 Korintin 3:9b-11.16-17; Salm 45:2-3.5-6.8-9; Ġwanni 2:13-23.
■ Il-Ġimgħa 10 ta’ Novembru: San Iljun il-Kbir, papa u duttur tal-Knisja (TO). Qari: Rumani 15:14-21; Salm 97:1.2-3ab.3bċ-4; Luqa 16:1-8.
■ Is-Sibt 11 ta’ Novembru: San Martin ta’ Tours, isqof (TO). Qari: Rumani 16:3-9.16.22-27; Salm 144:2-3.4-5.10; Luqa 16:9-15.
F = Festa; TO = Tifkira Obbligatorja.
Il-kulur ħdejn id-data jindika l-kulur liturġiku tal-ġurnata.