L-11-IL ĦADD TA’ MATUL IS-SENA B
AQRA L-KELMA - Il-liturġija tal-Kelma
L-Ewwel Qari
Qari mill-Ktieb tal-Profeta Eżekjel (17:22-24)
Dan jgħid Sidi l-Mulej: «Jien naqta’ mill-quċċata taċ-ċedru l-għoli, minn tarf il-friegħi l-għolja, rimja żgħira, u nxettilha fuq il-muntanja għolja u kbira; fuq il-muntanja l-għolja ta’ Israel inxettilha.
U hi toħroġ il-friegħi, u tagħmel il-frott, u ssir siġra sabiħa taċ-ċedru. U taħtha jistkenn kull tajr tal-ġwienaħ, jistkennu għad-dell tal-friegħi tagħha.
U jagħrfu s-siġar kollha tar-raba’ li jien il-Mulej, li siġra għolja nċekkinha, u siġra żgħira nkabbarha; innixxef is-siġra l-ħadra, u n-niexfa bil-weraq inħaddarha. Jien, il-Mulej, tkellimt, u li għidt nagħmlu.»
Il-Kelma tal-Mulej. Irroddu ħajr lil Alla.
SALM RESPONSORJALI (Salm 91)
R/. Tajjeb li nfaħħru l-Mulej!
Tajjeb li nfaħħru l-Mulej,
li ngħannu lil ismek, inti l-Għoli,
inxandru filgħodu t-tjieba tiegħek,
u billejl il-fedeltà tiegħek. R/.
Il-bniedem ġust bħall-palma jħaddar,
bħal ċedru tal-Libanu jikber.
Imħawlin f’dar il-Mulej,
iħaddru fil-btieħi tat-tempju ta’ Alla tagħna. R/.
Sa fi xjuħithom il-frott jagħmlu,
kollhom ħajja u ħdura,
biex ixandru li ġust hu l-Mulej,blata tiegħi,
u ebda qerq ma jinsab fih. R/.
IT-TIENI QARI
Qari mill-Ittra ta’ San Pawl Appostlu lill-Korintin (5:6-10)
Ħuti, aħna dejjem qalbna qawwija u nafu li sakemm indumu mlibbsa b’dan il-ġisem, nibqgħu ’l bogħod mill-Mulej - għax aħna ngħixu bil-fidi u mhux bil-viżjoni. Aħna qalbna qawwija u persważi li aħjar noħorġu minn dan il-ġisem u mmorru noqogħdu għand il-Mulej.
Għalhekk fuq kollox aħna nfittxu li nogħġbu lilu, sew jekk nibqgħu hawn, sew jekk noħorġu minn dan il-ġisem.
Jeħtieġ li lkoll kemm aħna nidhru quddiem it-tribunal ta’ Kristu, biex kulħadd jieħu skont it-tajjeb jew il-ħażin li jkun għamel meta kien għadu ħaj fil-ġisem.
Il-Kelma tal-Mulej. Irroddu ħajr lil Alla.
AKKLAMAZZJONI QABEL L-EVANĠELJU
Hallelujah. Hallelujah.
Iż-żerriegħa hi l-Kelma ta’ Alla, min jiżragħha hu Kristu; min isib lilu jgħix għal dejjem.
Hallelujah!
L-EVANĠELJU
Qari mill-Evanġelju skont San Mark (4:26-34)
F’dak iż-żmien, Ġesù qal lill-kotra tan-nies: «Is-Saltna ta’ Alla hi bħal meta raġel ikun xeħet iż-żerriegħa fl-art. Rieqed jew imqajjem, billejl jew binhar, iż-żerriegħa tinbet u tikber, bla ma jaf kif. L-art trodd minnha nfisha l-ewwel il-barma, imbagħad is-sbula, imbagħad il-qamħ mimli fis-sbula. U meta l-frott isir, malajr il-bidwi jmidd idu għall-minġel, għax ikun wasal żmien il-ħsad.»
U qal: «Ma’ xiex sa nqabbluha s-Saltna ta’ Alla, jew b’liema parabbola nfissruha? Qisha żerriegħa tal-mustarda; din meta tinżara’ fil-ħamrija, hi l-iċken fost iż-żrieragħ kollha fuq l-art; imma wara li tinżara’ tikber u ssir l-akbar waħda fost il-ħxejjex kollha, u toħroġ friegħi wesgħin, hekk li l-għasafar tal-ajru jkunu jistgħu jistkennu għad-dell tagħha.»
B’ħafna parabboli bħal dawn kien ixandrilhom il-kelma, kif kienu jistgħu jifhmuha huma, u mingħajr xi parabbola ma kienx ikellimhom; imma lid-dixxipli tiegħu, meta kien ikun waħdu magħhom, kien ifissrilhom kollox.
Il-Kelma tal-Mulej. Tifħir lilek Kristu.
IFHEM IL-KELMA - Kummenti dwar il-qari
- AUDIO -
- TEST -
GĦIX IL-KELMA - Il-Kalendarju Liturġiku tal-ġimgħa
It-tielet ġimgħa tas-Salterju
■ It-Tnejn 17 ta’ Ġunju: Ferja. Qari: 1 Slaten 21:1-16; Salm 5:2-3.5-7; Mattew 5:38-42.
■ It-Tlieta 18 ta’ Ġunju: Ferja. Qari: 1 Slaten 21:17-29; Salm 50:3-6a.11.16; Mattew 5:43-48.
■ L-Erbgħa 19 ta’ Ġunju: Ferja / San Romwaldu, abbati (T). Qari: 2 Slaten 2:1.6-14; Salm 30:20.21.24; Mattew 6:1-6.16-18.
■ Il-Ħamis 20 ta’ Ġunju: Ferja. Qari: Bin Sirak 48:1-14; Salm 96:1-7.12a; Mattew 6:7-15.
■ Il-Ġimgħa 21 ta’ Ġunju: San Alwiġi Gonzaga, reliġjuż (TO). Qari: 2 Slaten 11:1-4.9-18.20; Salm 131:11-14.17-18; Mattew 6:19-23.
■ Is-Sibt 22 ta’ Ġunju: f’Malta: Ferja / L-Imqaddsa Marija Verġni f’jum is-Sibt (T) / San Pawlinu ta’ Nola, isqof (T) / San Ġwann Fisher, isqof u San Tumas Moore, martri (T). Qari: 2 Kronaki 24:17-25; Salm 88:4-5.29-34; Mattew 6:24-34;
■ f’Għawdex: Tifkira tal-anniversarju tas-sejħa tal-Madonna lil Karmni Grima (F). Qari: Żakkarija 2:14-17; Salm Luqa 1:46-55; Efesin 4:17-18.20-32; Ġwanni 2:1-11.
F = Festa; TO = Tifkira Obbligatorja; T= Tifkira.
Il-kulur ħdejn id-data jindika l-kulur liturġiku tal-ġurnata.