IS-17-IL ĦADD TA’ MATUL IS-SENA B
AQRA L-KELMA - Il-liturġija tal-Kelma
L-Ewwel Qari
Qari mit-Tieni Ktieb tas-Slaten (4:42-44)
F’dak iż-żmien, ġie għand Eliżew raġel minn Bagħal-Salisa, u ġieb lir-raġel ta’ Alla ħobż tal-bikri: għoxrin ħobża tax-xgħir, u sbul mimli b’qamħ ġdid.
Eliżew qallu: «Agħtihom lin-nies ħa jieklu.» Imma l-qaddej tiegħu wieġeb: «Kif nista’ nqassam dawn lil mitt ruħ?» Raġa’ qallu Eliżew: «Agħti lin-nies ħa jieklu; għax dan jgħid il-Mulej: “Mhux biss jieklu, imma jifdal ukoll.”»
Dak qassmilhom; u huma kielu, u kien għad fadal minnhom, bħalma qal il-Mulej.
Il-Kelma tal-Mulej. Irroddu ħajr lil Alla.
SALM RESPONSORJALI (Salm 144)
R/. Iftaħ idek, Mulej: ferraħna bil-ġid li tagħtina!
Kulma għamilt iroddlok ħajr, Mulej;
iberkuk il-ħbieb tiegħek kollha.
Is-sebħ tas-saltna tiegħek ixandru,
fuq is-setgħa tiegħek jitkellmu. R/.
Għajnejn kulħadd iħarsu lejk, Mulej,
u inti tagħtihom l-ikel f’waqtu.
Int tiftaħ idek,
u xxabba’ ’l kulħadd bil-ġid. R/.
Ġust il-Mulej fl-imġiba tiegħu kollha,
twajjeb f’dak kollu li għamel.
Qrib il-Mulej lejn kull min isejjaħlu,
lejn kull min isejjaħlu fis-sewwa. R/.
IT-TIENI QARI
Qari mill-Ittra ta’ San Pawl Appostlu lill-Efesin (2:13-18)
Ħuti, inħeġġiġkom jien, il-priġunier tal-Mulej, biex timxu sewwa skont is-sejħa li biha kontu msejħin; billi bl-umiltà kollha, bil-ħlewwa u bis-sabar, taħmlu u tħobbu ’l xulxin.
Ħabirku biex iżżommu spirtu wieħed bir-rabta tas-sliem; ġisem wieħed u ruħ waħda, l-istess kif kontu msejħa għal tama waħda; Mulej wieħed, fidi waħda, magħmudija waħda; Alla wieħed u Missier ta’ kulħadd, li hu fuq kulħadd, b’kulħadd u f’kulħadd.
Il-Kelma tal-Mulej. Irroddu ħajr lil Alla.
AKKLAMAZZJONI QABEL L-EVANĠELJU (Lq 7: 16))
Hallelujah. Hallelujah.
Profeta kbir qam fostna, u Alla żar il-poplu tiegħu.
Hallelujah!
L-EVANĠELJU
Qari mill-Evanġelju skont San Ġwann (6:1-15)
F’dak iż-żmien, Ġesù telaq lejn in-naħa l-oħra tal-baħar tal-Galilija, jew ta’ Tiberija. Ħafna nies marru warajh, għax raw is-sinjali li kien jagħmel bil-fejqan tal-morda. Ġesù tela’ lejn l-għoljiet u qagħad hemm bilqiegħda mad-dixxipli tiegħu. Kien qrib l-Għid, il-festa tal-Lhud.
Ġesù rafa’ għajnejh, lemaħ kotra ta’ nies ġejja lejh, u qal lil Filippu: «Mnejn nixtru l-ħobż biex dawn ikollhom x’jieklu?» Dan qalhulu biex jippruvah, għaliex hu kien jaf x’sa jagħmel. Filippu wieġbu: «Mitejn dinar ħobż ma jkunux biżżejjed għalihom biex kull wieħed minnhom jieħu xi ftit.» Wieħed mid-dixxipli tiegħu, Indrì, ħu Xmun Pietru, qallu: «Hawn tfajjel li għandu ħames ħobżiet tax-xgħir u żewġ ħutiet żgħar; imma dawn x’inhuma għal daqshekk nies?» Ġesù qal: «Qiegħdu n-nies bilqiegħda.»
Dik in-naħa kien hemm ħafna ħaxix. Għalhekk in-nies, xi ħamest elef raġel, qagħdu bilqiegħda. Ġesù ħa l-ħobżiet, radd il-ħajr, u qassamhom lil dawk li kienu bilqiegħda; hekk ukoll għamel bil-ħut, u kulħadd ħa kemm ried. Meta xebgħu, Ġesù qal lid-dixxipli tiegħu: «Iġbru l-loqom li baqa’, biex xejn ma jinħela.» Marru jiġbruhom, u mlew tnax-il qoffa bil-loqom li kien fadlilhom in-nies mill-ħames ħobżiet tax-xgħir wara li kienu kielu.
Għalhekk dawn in-nies, meta raw dan is-sinjal li għamel Ġesù, qalu: «Dan hu tassew il-Profeta li għandu jiġi fid-dinja!» Imma Ġesù, meta ntebaħ li kienu ġejjin biex jeħduh bilfors biex jagħmluh sultan, raġa’ warrab waħdu lejn l-għoljiet.
Il-Kelma tal-Mulej. Tifħir lilek Kristu.
IFHEM IL-KELMA - Kummenti dwar il-qari
- AUDIO -
GĦIX IL-KELMA - Il-Kalendarju Liturġiku tal-ġimgħa
L-ewwel ġimgħa tas-Salterju
■ It-Tnejn 29 ta’ Lulju: Santa Marta, Santa Marija u San Lazzru (TO). Qari: 1 Ġwanni 4:7-16; Salm 33:2-11; Ġwanni 11:19-27 jew Luqa 10:38-42.
■ It-Tlieta 30 ta’ Lulju: Ferja / San Pietru Krisologu, isqof u duttur tal-Knisja (T). Qari: Ġeremija 14:17-22; Salm 78:8-9.11.13; Mattew 13:36-43.
■ L-Erbgħa 31 ta’ Lulju: Sant’Injazju ta’ Loyola, presbiteru (TO). Qari: Ġeremija 15:10.16-21; Salm 58:2-5.10-11.17-18; Mattew 13:44-46.
■ Il-Ħamis 1 t’Awwissu: San Alfons Marija de’ Liguori, isqof u duttur tal-Knisja (TO). Qari: Ġeremija 18:1-6; Salm 145:2abċ.2d-4.5-6; Mattew 13:47-53.
■ Il-Ġimgħa 2 t’Awwissu: Ferja / San Ewsebju, isqof ta’ Vercelli (T) / San Pietru Ġiljan Eymard, presbiteru (T). Qari: Ġeremija 26:1-9; Salm 68:5.8-10.14; Mattew 13:54-58.
■ Is-Sibt 3 t’Awwissu: Ferja / L-Imqaddsa Verġni Marija f’jum is-Sibt (T). Qari: Ġeremija 26:11-16.24; Salm 68:15-16.30-31.33-34; Mattew 14:1-12.
TO = Tifkira Obbligatorja; T = Tifkira.
Il-kulur ħdejn id-data jindika l-kulur liturġiku tal-ġurnata.