Il-11-il Ħadd ta' matul is-sena - Sena A
AQRA L-KELMA - Il-liturġija tal-Kelma
L-EWWEL QARI
Qari mill-Ktieb tal-Eżodu (19:2-6a)
F’dak iż-żmien, wara li refgħu t-tined, minn Rafidim ulied Iżrael waslu fid-deżert tas-Sinaj u waqqfu t-tined fid-deżert. Iżrael waqqaf it-tined hemm, biswit il-muntanja.
Mosè tala’ ħdejn Alla, u l-Mulej sejjaħlu mill-muntanja u qallu: «Dan għid lil dar Ġakobb u għarraf lil ulied Iżrael: “Rajtu intom x’għamilt lill-Eġizzjani, u kif lilkom ġarrejtkom fuq il-ġwienaħ tal-ajkli u ressaqtkom lejja. Issa, jekk tisimgħu leħni u żżommu l-patt tiegħi, intom tkunu l-wirt tiegħi minn fost il-popli kollha, għax l-art kollha tiegħi. Intom tkunu għalija saltna ta’ qassisin u ġens qaddis.”»
Il-Kelma tal-Mulej. Irroddu ħajr lil Alla.
SALM RESPONSORJALI (Salm 99)
Rit: Aħna l-poplu tiegħu u n-nagħaġ tal-mergħa tiegħu.
Għajtu bil-ferħ lill-Mulej,
nies kollha ta l-art,
aqdu bil-ferħ lill-Mulej,
idħlu quddiemu b’għana ferrieħi. Rit…
Kunu afu li Jaħweh hu Alla,
hu ħalaqna u aħna tiegħu,
aħna l-poplu tiegħu
u n-nagħaġ tal-mergħa tiegħu. Rit…
Għax twajjeb il-Mulej,
għal dejjem it-tjieba tiegħu;
minn żmien għal żmien
il-fedeltà tiegħu. Rit…
IT-TIENI QARI
Qari mill-Ittra ta’ San Pawl Appostlu lir-Rumani (5:6-11)
Ħuti, meta aħna konna bla saħħa, Kristu, meta wasal iż-żmien, miet għall-ħżiena. Bilkemm wieħed imut għal wieħed tajjeb, għad li wieħed għandu mnejn jagħmel il-qalb u jmut għal wieħed ġeneruż.
Iżda Alla wriena l-imħabba tiegħu meta Kristu miet għalina, aħna li konna għadna midinbin.
Kemm aktar u aktar issa li aħna ġġustifikati b’demmu, insalvaw permezz tiegħu mill-korla ta’ Alla!
Jekk meta konna għadna għedewwa ta’ Alla tħabbibna miegħu bis-saħħa tal-mewt ta’ Ibnu, kemm iktar issa, li aħna ħbieb miegħu, insalvaw permezz tal-ħajja tiegħu? Mhux hekk biss, imma niftaħru wkoll f’Alla b’Sidna Ġesù Kristu li permezz tiegħu ksibna din il-ħbiberija.
Il-Kelma tal-Mulej. Irroddu ħajr lil Alla.
AKKLAMAZZJONI QABEL L-EVANĠELJU
Hallelujah. Hallelujah. (Mk 1:15)
Hallelujah Is-Saltna ta’ Alla waslet; indmu u emmnu fl-Evanġelju.
Hallelujah!
L-EVANĠELJU
Qari mill-Evanġelju skond San Mattew (9:36 – 10:8)
F’dak iż-żmien, Ġesù ra n-nies u tħassarhom, għax kienu mdejqa u mitluqa bħal nagħaġ bla ragħaj. Imbagħad qal lid-dixxipli tiegħu: «Il-ħsad huwa kbir, iżda l-ħaddiema ftit. Itolbu mela lil Sid il-ħsad biex jibgħat ħaddiema għall-ħsad tiegħu.»
Sejjaħ lejh it-tnax-il dixxiplu tiegħu, u tahom is-setgħa fuq l-ispirti ħżiena biex ikeċċuhom, u jfejqu kull xorta ta’ mard u ’l kull min kien nieqes minn saħħtu.
L-ismijiet tat-tnax-il appostlu huma dawn: l-ewwel Xmun, jgħidulu Pietru, u ħuh Indrì, u Ġakbu ta’ Żebedew, u ħuh Ġwanni, Filippu u Bartilmew, Tumas u Mattew il-pubblikan, Ġakbu ta’ Alfew, u Taddew, Xmun il-Kanani, u Ġuda l-Iskarjota, li mbagħad ittradieh.
Lil dawn it-tnax Ġesù bagħathom b’dawn l-ordnijiet: «Taqbdux triq il-pagani, u tidħlux f’belt tas-Samaritani; imma qabel xejn morru fittxu n-nagħaġ il-mitlufa tad-dar ta’ Iżrael.Intom u sejrin, xandru u għidu li s-Saltna tas-Smewwiet waslet. Fejqu l-morda, qajmu l-mejtin, fejqu l-lebbrużi, keċċu x-xjaten. B’xejn ħadtu, b’xejn agħtu.»
Il-Kelma tal-Mulej. Tifħir lilek Kristu.
IFHEM IL-KELMA - Kummenti dwar il-qari
- VIDEO -
Fr Elija Vella OFMConv.
- AUDIO -
GĦIX IL-KELMA - Il-Kalendarju Liturġiku tal-ġimgħa
It-tielet ġimgħa tas-salterju
■ It-Tnejn 19 ta’ Ġunju: Ferja / San Romwaldu, abbati (T). Qari: 2 Korintin 6:1-10; Salm 97:1.2-3ab.3ċd-4; Mattew 5:38-42.
■ It-Tlieta 20 ta’ Ġunju: Ferja. Qari: 2 Korintin 8:1-9; Salm 145:1b-2.5-6.7.8-9a; Mattew 5:43-48.
■ L-Erbgħa 21 ta’ Ġunju: San Alwiġi Gonzaga, reliġjuż (TO). Qari: 2 Korintin 9:6-11; Salm 111:1-2.3-4.9; Mattew 6:1-6.16-18.
■ Il-Ħamis 22 ta’ Ġunju: Arċidjoċesi ta’ Malta Ferja / San Pawlinu ta’ Nola, isqof (T) / San Ġwann Fisher, isqof u San Tumas More, martri (T). Qari: 2 Korintin 11:1-11; Salm 110:1-2.3-4.7-8; Mattew 6:7-15.
■ Djoċesi ta’ Għawdex Tifkira tal-anniversarju tas-sejħa tal-Madonna lil Karmni Grima (F). Qari: Żakkarija 2:14-17; Salm Luqa 1:46-55; Efesin 4:17-18.20-32; 5:1-2; Ġwanni 2:1-11.
■ Il-Ġimgħa 23 ta’ Ġunju: Ferja. Qari: 2 Korintin 11:18.21b-30; Salm 33:2-3.4-5.6-7; Mattew 6:19-23.
■ Is-Sibt 24 ta’ Ġunju: It-Twelid ta’ San Ġwann Battista (S). Qari: Isaija 49:1-6; Salm 138:1-3.13-15; Atti 13:22-26; Luqa 1:57-66.80.
S = Solennità; F = Festa; TO = Tifkira Obbligatorja; T = Tifkira.
Il-kulur ħdejn id-data jindika l-kulur liturġiku tal-ġurnata.