AQRA L-KELMA - Il-liturġija tal-Kelma
L-EWWEL QARI
Qari mill-Ktieb tal-Profeta Danjel (12:1-3)
F’dak iż-żmien iqum Mikiel, il-prinċep il-kbir, dak li qiegħed fuq ulied il-poplu tiegħek.
Imbagħad jiġi żmien ta’ għawġ, li qatt ma jkun deher ieħor bħalu minn mindu ġens kien ġens sa dak iż-żmien. Imma jkun żmien li fih il-poplu tiegħek jinħeles, dawk kollha li jkunu nstabu miktuba fil-ktieb. U ħafna minn dawk li huma rieqda fit-trab tal-art jistenbħu, min għall-ħajja ta’ dejjem u min għall-għajb u l-istmerrija għal dejjem.
Il-bnedmin bil-għaqal ikollhom fuqhom dija bħal dik tas-sema, u dawk li jkunu wasslu ’l ħafna fis-sewwa jkunu jiddu bħal kwiekeb għal dejjem ta’ dejjem.
Il-Kelma tal-Mulej. Irroddu ħajr lil Alla.
SALM RESPONSORJALI (Salm 15)
Rit: Ħarisni, o Alla, għax fik jien nistkenn!
Mulej, inti s-sehem tal-wirt u r-risq tiegħi,
inti żżomm f’idejk xortija.
Inżomm il-Mulej dejjem quddiemi,
għax bih f’leminti qatt ma nitħarrek. Rit...
Hekk tifraħ qalbi u tithenna ruħi,
u ġismi wkoll jistrieħ fil-kwiet.
Għax int ma titlaqnix fl-imwiet,
ma tħallix il-maħbub tiegħek jara l-qabar. Rit...
Int tgħallimni t-triq tal-ħajja;
hemm il-milja tal-ferħ quddiemek,
hemm l-għaxqa għal dejjem f’lemintek. Rit...
IT-TIENI QARI
Qari mill-Ittra lil-Lhud (10:11-14.18)
Kull qassis ieħor imur kuljum biex jaqdi l-ministeru tiegħu, u joffri u jerġa’ joffri l-istess sagrifiċċju, bla ma jistgħu qatt ineħħu d-dnubiet.
Imma Kristu, wara li offra sagrifiċċju wieħed għad-dnubiet, qagħad għal dejjem fuq in-naħa tal-lemin ta’ Alla, fejn qiegħed jistenna sa ma l-għedewwa tiegħu jitqiegħdu mirfes taħt riġlejh. Għax hu b’offerta waħda għamel perfetti għal dejjem lil dawk li huwa jqaddes.
Issa, fejn hemm il-maħfra tad-dnubiet, ma hemmx għalfejn issir aktar l-offerta għad-dnubiet.
Il-Kelma tal-Mulej. Irroddu ħajr lil Alla.
AKKLAMAZZJONI QABEL L-EVANĠELJU (Lq 21: 26)
Hallelujah. Hallelujah.
Ishru u itolbu l-ħin kollu, biex tkunu tifilħu tgħaddu minn kulma għandu jiġri u tieqfu quddiem Bin il-bniedem.
Hallelujah!
L-EVANĠELJU
Qari mill-Evanġelju skont San Mark (13:24-32)
F’dak iż-żmien, Ġesù qal lid-dixxipli tiegħu: «Wara jiem ta’ dwejjaq kbar, ix-xemx tiddallam, il-qamar jitlef id-dija tiegħu, il-kwiekeb jibdew jaqgħu mis-sema, u l-qawwiet tas-smewwiet jitqallbu.
Imbagħad jaraw lil Bin il-bniedem ġej fis-sħab b’qawwa kbira u bi glorja. U mbagħad jibgħat l-anġli biex jiġbor flimkien il-maħturin tiegħu mill-erbat irjieħ, minn tarf l-art sa tarf is-sema.
Mis-siġra tat-tin tgħallmu din il-parabbola. Meta l-fergħa tagħha tirtab u tarmi l-weraq, intom tintebħu li s-sajf fil-qrib. Hekk ukoll meta taraw dan jiġri, kunu afu li hu fil-qrib, fil-bieb.
Tassew ngħidilkom, li ma jgħaddix dan in-nisel qabel ma jiġri dan kollu. Is-sema u l-art jgħaddu, imma kliemi ma jgħaddix.
Dwar dak il-jum u s-siegħa ħadd ma jaf meta sa jaslu, anqas l-anġli fis-sema, u anqas l-Iben; ħadd ħlief il-Missier.
Il-Kelma tal-Mulej. Tifħir lilek Kristu.
IFHEM IL-KELMA - Kumment dwar il-qari minn Patri Edmund Teuma OFMConv
IL-MULEJ FIL-QRIB
Ninsabu fit-tmiem tas-sena liturġika u s-siltiet tal-Iskrittura jridu jfakkruna li kull mibdi mitmum. Kemm San Mark fil-Vanġelu u kemm il-profeta Danjel fl-ewwel qari jfissru ħsibijiethom bi stil ta’ kitba letterarja li tissejjaħ apokalittika, li fl-Iskrittura nsibuh f’bosta bnadi. Huwa stil ta’ kitba li jbeżża’ lil min mhux midħla tiegħu, u aktarx li kien jintuża fi żminijiet ta’ dwejjaq u persekuzzjoni. Kemm f’Danjel u kemm fil-Vanġelu ma għandniex deskrizzjoni ta’ kif sa tintemm id-dinja u kif sa sseħħ it-tieni miġja tal-Mulej, imma dawn huma biss espressjonijiet u impressjonijiet letterarji ta’ dak li tħoss komunità li tkun għaddejja minn żmien ikrah. Il-messaġġ ta’ San Mark huwa wieħed ta’ tama li ma jbeżżax iżda jqawwi l-qalb: “il-Mulej fil-qrib” u l-kwiekeb, li fost l-oħrajn, kienu meqjuma mill-pagani (= l-idolatrija) għad jaqgħu u jiġu fix-xejn quddiem Bin il-Bniedem. Il-fidi Nisranija hija mħarsa mill-Mulej, ma għandhiex minn xiex tibża’.
IFHEM IL-KELMA - Kumment viżiv minn Patri Elija Vella OFMConv
GĦIX IL-KELMA - Il-Kalendarju Liturġiku tal-ġimgħa
L-ewwel ġimgħa tas-salterju
■ It-Tnejn 15 ta’ Novembru: Ferja / Sant’Albert il-Kbir, Isqof (T). Qari: 1Makkabin 1:10-15.41-43.54-57.62-64; Salm 118:53.61.134.150.155.158; Luqa 18:35-43.
■ It-Tlieta 16 ta’ Novembru: Ferja / Santa Margerita tal-Iskozja (T) / Santa Ġertrude, Verġni (T). Qari: 2Makkabin 6:18-31; Salm 3:2-7; Luqa 19: 1-10.
■ L-Erbgħa 17 ta’ Novembru: Santa Eliżabetta tal-Ungerija (TO). Qari: 2Makkabin 7:1.20-31; Salm 16:1.5-6.8.15; Luqa 19:11-28.
■ Il-Ħamis 18 ta’ Novembru: Ferja / Id-Dedikazzjoni tal-Bażilki ta’ San Pietru u San Pawl (T). Qari: 1Makkabin 2:15-29; Salm 49:1-2.5-6.14-15; Luqa 19:41-44.
■ Il-Ġimgħa 19 ta’ Novembru: Ferja. Qari: 1Makkabin 4:36-37.52-59; Salm 1Kronaki 29:10-12; Luqa 19:45-48.
■ Is-Sibt 20 ta’ Novembru: Ferja / Sidtna Marija f’jum is-Sibt (T). Qari: 1Makkabin 6:1-13; Salm 9:2-4.6.16.19; Luqa 20:27-40.
TO = Tifkira obbligatorja; T = Tifkira.
Il-kulur tad-data jindika l-kulur liturġiku tal-ġurnata.