It-13-il Ħadd matul is-sena B
Il-Ħadd li għadda San Mark uriena l-qawwa ta’ Ġesù fuq ir-riħ u l-maltemp. Did-darba jurina l-istess qawwa u setgħa fuq il-mard u l-mewt. Fi kliem ieħor l-Evanġelista qed juri li Ġesù huwa Alla. Ġesù jfejjaq mara li kienet ilha tnax-il sena tbati bit-tnixxija tad-demm u jqajjem mill-mewt lil bint Ġajru. Ġesù ma beżax jitniġġes bil-kuntatt mad-demm u mal-mejtin, kif kienu jemmnu l-Lhud, imma mar lil hinn mil-liġi biex ifejjaq u jagħmel il-ġid. Il-fejqan li jinqala’ hu mibni fuq il-fidi. Lill-mara Ġesù qalilha: “Binti, il-fidi tiegħek fejqitek.” U lil Ġajru, meta l-oħrajn kollha kienu qatgħu qalbhom, qallu: “Tibżax, biss inti emmen.” Dal-kliem Ġesù llum qed jgħidu lilna wkoll. Hu diġà tana sehem mir-rebħa tiegħu fuq id-dnub u l-mewt, għax f’dak kollu li għamel sieħeb lilna miegħu. Dan seħħ fil-Magħmudija tagħna. Iżda jeħtieġ li aħna jkollna l-fidi fih, inħalluh jaħdem fina bla ma nfixkluh, anki meta r-rotta li jqabbadna narawha impossibbli... bih kollox possibbli.