Il-Preżentazzjoni tal-Mulej
"IL-GRAZZJA TA' ALLA KIENET FUQU"
«It-tifel baqa’ jikber u jissaħħaħ, mimli bl-għerf, u l-grazzja ta’ Alla kienet fuqu.» Hu ta’ faraġ li lanqas l-Iben ta’ Alla, fil-ħajja tiegħu fid-dinja, ma twieled ġa jaf kollox. Ġesù kien jikber, jitgħallem, iġarrab. F’kelma waħda, Ġesù, u miegħu l-familja ta’ Nazaret, kien jgħix ħajja normali. Jekk Kristu għażel u ma stmellx l-umanità u n-normalità tagħna, dan jurina li hi ħaġa sabiħa tkun bniedem. Issa nistgħu nieqfu u naħsbu: bid-dellijiet kollha tagħha, l-eżistenza tiegħi hi sabiħa, hi mdawla, hi spazju li Alla riedu u ħaddnu bl-imħabba. Meta sar bniedem bħalna, Kristu wriena li ta’ min jgħix il-ħajja tagħna, li hi barka li wieħed jitgħallem bil-mod il-mod u jimxi b’passi dgħajfa ta’ tarbija. F’din il-mixja, «il-grazzja ta’ Alla kienet fuqu.» Hija din il-grazzja li l-eżistenza tagħna tagħmilha sabiħa, anki meta nkunu għaddejjin minn żminijiet ħżiena. Din il-grazzja li toħroġ mill-ħarsa tal-Missier li jbierek u li tkattret bil-kbir minn meta Kristu ngħaqad magħna, tkun ma’ kull familja.