Il-Preżentazzjoni tal-Mulej
“GĦAJNEJJA RAW IS-SALVAZZJONI TIEGĦEK”
Il-liġi ta’ Mosè kienet titlob li erbgħin jum wara t-twelid tal-ewwel tifel, dan jittieħed fit-tempju u hemm ikun ippreżentat lill-Mulej, u l-familja tiegħu toffri annimal b’sagrifiċċju lil Alla minfloku (ara Eż 13:11-15). Hekk għamlu lil Ġesù wkoll. Imma Ġesù, li hu l-Iben ta’ Alla, hu l-Ikkonsagrat u l-Mibgħut tal-Mulej. Illum hu daħal fit-tempju, li hu dar Missieru u daru stess. Hemm kien hemm Xmun, ir-raġel ġust, li kellu wegħda minn Alla li ma kienx sa jmut qabel ma jara lil Kristu tal-Mulej. Il-ferħ tiegħu hekk kif ħaddan lil Ġesù tarbija miegħu hu mfisser fl-innu li San Luqa jqegħedlu fuq fommu: “Issa, o Sid, tista’ tħalli l-qaddej tiegħek imur fis-sliem, skont kelmtek...” Ta’ importanza kbira huwa l-kliem profetiku li Xmun qal lil Marija. Hu kellimha dwar il-missjoni ta’ Binha: kif sa jkun kriterju ta’ għażla u jkun hemm min ma jaċċettahx. Hi wkoll kellha tissieħeb miegħu f’dik il-missjoni u sejf jinfdilha ruħha. Kien hemm ukoll il-profetissa Anna li tat xhieda bi kliemha dwar dak li kellu jġib il-fidwa ta’ Ġerusalemm. Minn dawn il-foqra tal-Mulej nitgħallmu nagħtu xhieda b’ħajjitna tal-fidi tagħna f’Ġesù.